दसैँले ल्याउन सकेन चारपाङ्ग्रे अटो व्यवसायीमा उत्साह, शाेरुम अझै सुनसान

A+ A A-

दसैँ नजिकिरहँदा दुईपाङ्ग्रे र चारपाङ्ग्रे सवारीसाधनका शाेरुमहरू झकिझकाउ देखिने अघिल्ला वर्षहरूभन्दा यस वर्ष शाेरुमहरूमा त्यस्ताे कुनै राैनक देखिएकाे छैन । अघिल्ला वर्षहरूमा स्कुटर, मोटरसाइकल र गाडीहरूका बिक्रेता कम्पनीले आकर्षक छुटमा सवारीसाधन बिक्री गर्ने हुनाले ७० प्रतिशत ग्राहकले सवारी किन्न दसैँ नै पर्खिने गर्दथे ।

यस पटक दसैँ नजिकिइसक्दासमेत शाेरुमहरूमा नयाँ सवारी किन्न आउने ग्राहक खासै देखिएका छैनन् । वर्ष दिनको कमाइ दसैँ र तिहारबाटै उठाउने अटो व्यवसायीहरू यतिबेला सामान्य दिनको जति पनि सवारी बिक्री गर्न सकेका छैनन् ।

दसैँको अवसरमा मात्रै करिब ५ अर्ब रुपैयाँकाे काराेबार गर्ने अटो व्यवसाय दसैँ नजिकिइसक्दासमेत सुस्त नै देखिएको छ ।

सुजुकी ब्राण्डका चारपाङ्ग्रे सवारी बिक्री गर्दै आएका व्यवसायी तथा नाडा अटोमोबाइल एसाेसिएसनका सचिव अनुप बरालले दसैँमा नयाँ सवारी किन्ने ग्राहकभन्दा पुराना थन्क्याइएका सवारी बनाउन आउने ग्राहक बढेको बताए ।

उनले भने, ‘अहिले अर्थतन्त्र सुस्त छ, व्यापार व्यवसाय छैन । त्यसमाथि दसैँको चमक पनि यस वर्ष छैन । यस्तो अवस्थामा चारपाङ्ग्रे गाडी किन्नका लागि ग्राहकलाई पैसा जुटाउन नै हम्मेहम्मे परेको छ ।’

व्यापार व्यवसायले लय नसमात्दा चारपाङ्ग्रे तथा व्यावसायिक प्रयोजनका लागि गाडी किन्ने प्रयोगकर्ताहरू घटेको सचिव बरालको भनाइ छ ।

यस्तै, हुण्डाई ब्राण्डका गाडी बेच्दै आएको लक्ष्मी इन्टरकन्टिनेन्टलले यस वर्ष ग्राहक नआउने भन्दै गत वर्षजस्तो धेरै मात्रामा दसैँका लागि भनेर गाडी पनि आयात नगरेको बताएकाे छ । गाडी किन्न आउने ग्राहक घटेपछि कम्पनीले विभिन्न आकर्षक छुटको योजना ल्याए पनि ग्राहक तान्न सकेको छैन ।

लक्ष्मी इन्टरकन्टिनेन्टलका निर्देशक निराकार श्रेष्ठले यस वर्ष ग्राहक नहुँदा शाेरुम सुनासान भएको बताए । उनले भने, ‘दसैँ नजिकिएसँगै बजारमा चहलपहल बढे पनि हामी चारपाङ्ग्रे सवारी बिक्रेताहरूलाई भने छोएको छैन । भरिभराउ हुने शाेरुममा यस वर्ष फाट्टफुट्ट गाडीका बारेमा बुझ्न आए पनि खरिददर शून्य छ ।’ श्रेष्ठका अनुसार १ असोजदेखि हुण्डाईका दुईवटा मात्रै गाडी बिक्री भएको छ ।

हुण्डाई सुजुकी मात्रै नभएर व्यापारिक प्रयोजनका लागि जमेको ब्राण्ड महिन्द्राको पनि अवस्था उस्तै छ । व्यापार व्यवसाय काेराेना महामारीका कारण चौपट भएपछि नयाँ गाडी किन्ने ग्राहक घटेका छन् ।

त्यसो त बन्दाबन्दीको असर चारपाङ्ग्रे सवारी बिक्रेताहरूलाई मात्रै लागेको छ । दुईपाङ्ग्रे सवारीसाधन बन्दाबन्दीमा पनि बिक्री भइरहेको थियो भने दसैँ नजिकिएसँगै खरिद गर्न शाेरुममै आउने ग्राहकको भीड लाग्ने गरेको छ ।

यमाहाको स्कुटर तथा मोटरसाइकल बिक्री गर्दै आएको एमएडब्लू इन्टरप्राइजेजका सेल्स इन्चार्ज मनोज न्यौपाने ग्राहक थामिनसक्नु भएको बताउँछन् । उनका अनुसार ६० प्रतिशत ग्राहकले बैंकले दिएको सहुलियतपूर्ण ऋणले नै सवारी किन्ने गरेका छन् ।

मनोज शून्य डाउनपेमेन्टदेखि आकर्षक छुटको अफर ल्याएसँगै फाइनान्स गरेर अथवा बैंकबाट ऋण लिएर सवारी किन्नेहरू बढेको बताउँछन् ।

त्यसो त होण्डा ब्राण्डको स्कुटर/मोटरसाइकल बिक्री गर्दै आएको स्याकार ट्रेडिङ कम्पनीलाई पनि ग्राहक थाम्न हम्मेहम्मे नै पर्ने गरेको छ । होण्डा ब्राण्डका स्कुटरको स्टक सकिए पनि किन्न आउने ग्राहक घटेका थिएनन् । कम्पनीका अनुसार शून्य डाउनपेमेन्टमा होण्डा ब्राण्डका ग्राजिया, एक्टिभा, डिओ किन्न आउने ग्राहकको संख्या धेरै छ ।

व्यापार व्यवसाय चौपट भएसँगै ग्राहकलाई पैसाको अभाव भएर सवारी किन्न नआएको अड्कलबाजीमा नाडा अटोमोबाइल एसाेसिएसनका अध्यक्ष कृष्णप्रसाद दुलाल पनि सहमत देखिन्छन् ।

‘ठूला सवारी र चारपाङ्ग्रे सवारी व्यावसायिक र विलासिताको कोटामा पर्छ । कोभिडले भोलिको दिन कस्तो आउला भन्ने भएपछि अहिले व्यवसायी र सर्वसाधारण खर्च गर्नुको साटो बचततर्फ लागेका छन् ।’ अत्यावश्यक पर्ने ग्राहकहरूले मात्र सस्तो ब्याजदरमा थोरै रकम खर्चेर दुईपाङ्ग्रे सवारी किनिरहेकाे उनकाे बुझाइ छ ।

यस वर्ष चारपाङ्ग्रे सवारीसाधनप्रति ग्राहकको आकर्षण बढाउन बिक्रेता कम्पनीहरूले खरिदमा भारी मात्रामा छुटदेखि लक्की ड्र र स्क्र्याच कुपनमार्फत १ देखि १० लाखसम्म रकम जित्न सकिने अफरहरू सार्वजनिक गरिसकेका छन् । तैपनि अधिकांश चारपाङ्ग्रे सवारी बिक्रेता कम्पनीहरूले ग्राहक पाउन सकेका छैनन् ।

प्रकाशित मिति: बुधबार, असोज २८, २०७७ १७:२२