परीक्षाको प्राप्ताङ्कमा चित्त बुझेन ? जनप्रशासन क्याम्पस जानुस्

A+ A A-

दलीय भागवण्डा र प्रभावमा क्याम्पस प्रमुख नियुक्त हुने र क्याम्पसलाई बिर्ता ठान्ने विद्यार्थी नेताहरूको हर्कत कतिसम्म हुन्छ भन्ने गतिलो उदाहरण जनप्रशासन क्याम्पसमा देखिएको छ । करिब २० दिनअघिको त्यो घटनाले त्रिभुवन विश्वविद्यालयको परीक्षा प्रणालीप्रति पनि गम्भीर प्रश्न उठाएको छ ।

क्याम्पसले विद्यार्थीको चित्त बुझाएर परीक्षामा नम्बर दिने गरेको तथ्य ९ असोज २०७७ मा सार्वजनिक भयो । विद्यार्थी संगठनका नेता र क्याम्पस प्रशासनको मिलेमतोमा सार्वजनिक सूचना जारी गरेर नै शिक्षकले एक पटक आन्तरिक मूल्यांकन गरिसकेको प्राप्ताङ्क हेरफेर गर्न थालिएको छ । सेमेस्टर प्रणालीअन्तर्गत स्नातक र स्नातकोत्तर तहका विद्यार्थीको आन्तरिक परीक्षाको प्राप्ताङ्क धमाधम थपिँदै छ ।

यो प्रकरणलाई क्याम्पस प्रमुख हरिभक्त शाही भने खुलेआम जायज ठहर्‍याइरहेका छन् र परीक्षाको मर्यादाको खिल्ली उडाइरहेका छन् ।

सेमेस्टर प्रणालीमा ४० पूर्णाङ्कको आन्तरिक परीक्षा अर्थात् क्याम्पसले आन्तरिक मूल्यांकनका आधारमा नम्बर डीन कार्यालयमा पठाइन्छ । बाँकी ६० पूर्णाङ्कको लिखित परीक्षा हुन्छ । तर, जनप्रशासन क्याम्पसले चाँहि आन्तरिक परीक्षाको नम्बर पनि विद्यार्थीको रोजाइमा दिइरहेको छ ।

क्याम्पस प्रशासनको सूचना पढ्दा स्नातक तह र स्नातकोत्तर तहका विद्यार्थीले क्याम्पसका प्राध्यापकले आन्तरिक मूल्यांकनपछि दिएको नम्बरमा चित्त नबुझाएपछि क्याम्पस प्रशासन सूचना प्रकाशित गरेरै नम्बर हेरफेर गर्न राजी भएको देखिन्छ । यो सबै प्रकरण क्याम्पस प्रशासनले आन्तरिक परीक्षा डीन कार्यालयमा पठाउनुअगाडि गरेको हो ।

क्याम्पस प्रशासनले ९ असोजमा सूचना प्रकाशित गरेको हो । क्याम्पस प्रमुख शाहीले जारी गरेको सूचनामा भनिएको छ, ‘बीपीए प्रथम, तेस्रो, पाँचौँ र सातौँ सेमेस्टर र एमपीएको दोस्रो तथा चौथो सेमेस्टरको आन्तरिक परीक्षाको नतिजा प्रकाशनमा चित्त नबुझेको छ भने यस क्याम्पसको परीक्षा शाखामा १५ असाेज २०७७ भित्र निवेदन पेस गर्न अनुरोध गरिन्छ ।’

नेकपा र कांग्रेसनिकट विद्यार्थी संगठनका नेताहरूको दबाबमा क्याम्पस प्रशासनलाई आन्तरिक परीक्षाको नम्बर बढाउने सूचना जारी गराउन बाध्य बनाएका हुन् । क्याम्पसले सूचना निकालेको दुई दिनपछि ११ असोजमा विद्यार्थीहरू आन्तरिक परीक्षाको नम्बर बढाउन सामूहिक निवेदन दिएका छन् । त्यस निवेदनमा कम नम्बर दिएको भन्दै विषय शिक्षक र परीक्षा शाखालाई गाली गरेका छन् । गैरजिम्मेवार प्राध्यापक र परीक्षा शाखालाई गैरजिम्मेवार भन्दै गाली गर्ने ती विद्यार्थीले आफूहरूको भविष्यमाथि खेलवाड गरेको दाबी गरेका छन् ।

क्याम्पस प्रमुख हरिभक्त शाहीले लकडाउनका कारण विद्यार्थी र शिक्षकको उपस्थिति नभएको र शिक्षकलाई काम गर्न पनि गाह्रो भएकाले विद्यार्थीलाई मर्का नपरोस् भनेर सूचना निकालेको दाबी गरे । शाही भन्छन्, ‘विद्यार्थीलाई मर्का नपरोस् र कम नम्बर नहोस् भन्नलाई डीन कार्यालयसँग सल्लाह गरेर सच्याउन लागेको हो ।’

तर, जनप्रशासन क्याम्पसको परीक्षा हेर्न व्यवस्थापन संकायको डीन कार्यालय शाहीको कुरा पत्याउन मञ्जुर छैन । सहायक डीन धुव्र गौतम जनप्रशासन क्याम्पसले आन्तरिक परीक्षाको नम्बर थपघट गर्ने बारेमा डीन कार्यालयमा कुनै छलफल र सल्लाह नगरेको बताउँछन् । गौतम भन्छन्, ‘सल्लाह गरेको वा डीन कार्यालयको निर्णयअनुसार भएको भए त क्याम्पसले निकालेको सूचनामा पनि त्यो कुरा उल्लेख हुन्थ्यो नि ।’

परीक्षाको नम्बर विद्यार्थीको चित्त बुझाउन दिने हो कि विद्यार्थीको क्षमताअनुसार प्राप्त गर्ने हो ? भन्नेमा चाँहि शाही नाजवाफ छन् । बरु, सूचनाको भाषा नमिलेको भन्दै पन्छिए ।

सहायक डीन गौतम क्याम्पस प्रशासनले सूचना जारी गरेर नम्बर थप्नु गलत भएको उल्लेख गर्दै भन्छन्, ‘त्यसलाई स्वीकार गर्न सकिँदैन । त्यो परीक्षाको मर्यादाभित्र पनि पर्दैन । क्याम्पस प्रशासनका आन्तरिक किचलो के छ र ककसलाई थामथुम पार्नुपर्नेछ त्यसको जिम्मेवार डीन कार्यालय हुँदैन ।’

आन्तरिक परीक्षाको प्राप्ताङ्क विद्यार्थीलाई सुनाउने र सच्याउन नमिल्ने त्रिविका प्राध्यापकहरू बताउँछन् । एक क्याम्पस प्रमुखको भनाइ जनप्रशासन क्याम्पस प्रमुखले भनेजस्तो विद्यार्थीलाई आन्तरिक नम्बर सुनाउने र चित्त नबुझे थप गरेर पठाउने प्रचलन त्रिविमा छैन । तर, शाहीले के आधारमा भनेको भन्नेमा चाहिँ जनप्रशासन क्याम्पसको परीक्षा हेर्ने व्यवस्थापन संकाय र डीन कार्यालयका पदाधिकारी पनि चकित परेका छन् ।

प्रकाशित मिति: बुधबार, असोज २८, २०७७ १३:४१