को हुन् घरजग्गा र शेयर बजारमा कालोधन छिराउने मधु र विनोद ?

A+ A A-

सम्पत्ति शुद्धीकरण अनुसन्धान विभागले घरजग्गा तथा शेयरमा स्रोत नखुलेको सम्पत्ति प्रयोग गरेको अभियोग लगाएर २ जनालाई कारवाहीको माग गर्दै मुद्दा दायर गरेको छ ।

राजस्व चुहावट गरेको तथा कालोधन प्रयोग गरेको अभियोगमा विभागले भारतीय नागरिक बिनोदकुमार गुप्ता र उनकी श्रीमती मधुकुमारी चौधरीलाई विपक्षी बनाएर विशेष अदालत काठमाडौंमा मुद्दा दायर गरेको हो । गुप्ताकी श्रीमती चौधरी भने नेपाली नागरिक हुन् ।

दुबै जनाबाट २२ करोड ९५ लाख रुपैयाँ बिगो भराउन पनि विभागले माग गरेको छ । गुप्ता र चौधरीले हिमालयन कार्गाे नेपाल (स्थायी लेखा नम्बर ३०१७९७८६३) र मधुकुमारी चौधरीको नाममा दर्ता रहेको हिमालयन कार्गाे (स्थायी लेखा नम्बर ६०४८६०४७५) फर्मका प्रोपाइटर मधु कुमारी चौधरीका पति भारतीय नागरिक विनोद कुमार गुप्ता समेतले आव २०६५/६६ देखि आव २०७४/७५ सम्म राजश्व चुहाबट गरेको देखिएको आरोपत्रमा विभागको आरोपपत्रमा उल्लेख छ ।

यी दुबै फर्मको नामबाट राजस्व अपचलन भएको राजस्व अनुसन्धान विभागको अनुसन्धानबाट फेला परेको थियो । राजस्व अनुसन्धानले गत भदौ २० गते सम्पत्ति शुद्धीकरण अनुसन्धान विभागलाई गुप्ता र उनकी श्रीमती चौधरीको फर्मबाट सम्पत्ति शुद्धीकरण भएको हुन सक्ने भन्दै अनुसन्धान गर्न पत्राचार गरेको थियो । राजस्व अपचलनको विषय राजस्व अनुसन्धान विभागले हेर्ने भएपनि सम्पत्ती शुद्धीकरणको विषय सम्पत्ति शुद्धीकरण अनुसन्धान विभागले हेर्ने गर्छ ।

उनीहरुले आफु तथा फर्मका कर्मचारी समेतका नाउँमा विभिन्न बैंकमा खोलिएका खाताहरुमा १० करोड रुपैयाँ जम्मा गरेको र काठमाडौंका र भक्तपुरका विभिन्न स्थानहरुमा २०६५ सालपछिको अवधिमा ८ करोड ३० लाख रुपैयाँ घरजग्गामा लगानी गरेको देखिएको आरोपत्रमा उल्लेख छ ।

चौधरी एकल संचालक रहेको मंगला रियलस्टेट प्रालिमा २ करोड र र अर्काे एप्पल पोलिमर्स प्रालिमा २ करोड ५० लाख लगानी गरेको देखिएको विभागको भनाइ छ । यस्तै चौधरीले विभिन्न बैंक तथा वित्तीय संस्थाको ४ लाख ९७ हजार रुपैयाँ बराबरको शेयर किनेको आरोप लगाइएको छ ।

प्रकाशित मिति: शुक्रबार, वैशाख १३, २०७६ ०५:५७