‘खुलामञ्च अतिक्रमण हुँदा महानगर किन मुकदर्शक ?’

A+ A A-

काठमाडौंको खुलामञ्च अतिक्रमणको विरोधमा आन्दोलन सुरु गरिएको छ । काठमाडौं महानगरपालिकाको मिलेमतोमा खुलामञ्च अतिक्रमण गरिएपछि त्यसको विरोधमा स्थानीयबासी र सरोकारवालाले आन्दोलन सुरु गरेका हुन् ।

बिहीबार बिहान खुलामञ्चमै उपस्थित भएर विरोध प्रर्दशनमा उत्रिएका उनीहरुले त्यहाँ बनाएका सटरहरु पनि बन्द गराएका थिए । काठमाडौं महानगरपालिकासँग खुलामञ्च खुलाउन माग गर्दै उनीहरुले सम्बोधन नभए कडा आन्दोलन गर्न बाध्य हुने चेतावनी दिएका छन ।

खुलामञ्च अतिक्रमण हुँदा पनि काठमाडौं महानगरपालिकाले वास्ता नगरेपछि त्यसको विरोधमा स्थानीय आफैं आन्दोलनमा आउनुपरेको असनका योगेशकुमार खड्गीले बताए । उनले जनताबाट निर्वाचित निकाय काठमाडौं महानगरपालिकाले समेत कमिसन खाएर खुला मञ्च अतिक्रमणमा सघाउ पुर्याएपछि स्थानीय जनता त्यसको विरोधमा स्वःस्तफूर्त सहभागी भएको पनि स्पष्ट पारे ।

विरोध प्रर्दशनमा कांग्रेस नेता एवम् काठमाडौं क्षेत्र नम्बर ७ का सांसद भिमसेनदास प्रधान पनि थिए । खुला क्षेत्र अतिक्रमण गरेर काठमाडौं महानगरपालिकाले खुलामञ्चमा बसपार्क र सटर संचालन गर्न अनुमति दिएकोे भन्दै उनीहरुले आक्रोश व्यक्त गरे । उनीहरुले खुला मञ्च अतिक्रमण गर्न दिएको भन्दै काठमाडौं महानगरपालिकाका प्रमुख विद्यासुन्दर शाक्यविरुद्ध नाराबाजी गरेका थिए ।

काठमाडौं महानगरपालिका र ठेकेदार कम्पनी जलेश्वर स्वच्छन्द बिकोईले खुला मञ्च अतिक्रमण गरी सटर बनाई व्यापारीहरुलाई भाडामा दिएपछि स्थानीय र सराेकारवालाले ‘खुला मञ्च खुला राखौं’ अभियान सुरु गरेका हुन् ।

ठूलो क्षेत्रफलमा रहेको काठमाडौंको सबैभन्दा ठूलो खुला क्षेत्र खुलामञ्चमा हाल बसपार्क चलाइएको छ । पूरानो बसपार्कमा व्यापारिक टावर बनाउन दिएर काठमाडौं महानगरपालिकाले खुलामञ्चलाई ठेकेदारको जिम्मामा छाडेपछि स्थानीय आक्रोशित बनेका छन् । ४० वटा नयाँ सटर निर्माण गरी नियम, मापदण्ड र सहमति विपरितका गतिविधि त्यहाँ भएपछि त्यसको विरोध गरिएको हो । स्थानीयले सो सटर डोजर लगाएर नहटाएसम्म आन्दोलन जारी राख्ने चेतावनी पनि दिएका छन ।

स्थानीयले खुलामञ्च अतिक्रमण तत्काल रोक्न र त्यहाँ निर्माण गरिएका अस्थायी सटर तत्काल हटाउन माग गर्दै काठमाडौं महानगरपालिकाका प्रमुख शाक्यलाई ज्ञापन पत्र बुझाउने तयारी पनि गरेका छन् ।

प्रकाशित मिति: बिहीबार, वैशाख १२, २०७६ २३:३०