सहकारीको समयसापेक्ष कार्यक्रम निर्माण गरी कार्यान्वयन गर्छौँ : मन्त्री अर्याल

सहकारीको समयसापेक्ष कार्यक्रम निर्माण गरी कार्यान्वयन गर्छौँ : मन्त्री अर्याल

A+ A A-

राष्ट्रिय सहकारी विकास बोर्डले तयार पारेको नेपालको सहकारी क्षेत्रको २५ वर्षे रणनीतिक योजना (२०७७/०७८/२१०२/०३) को मस्यौदा भूमि व्यवस्था, सहकारी तथा गरिबी निवारणमन्त्री पद्माकुमारी अर्याललाई बुझाएको छ ।

बाेर्डले आज मन्त्री अर्याललाई २५ वर्षे रणनीतिक योजनाको मस्यौदा हस्तान्तरण गरेको हो । मस्यौदा बुझ्दै मन्त्री अर्यालले सहकारी आन्दोलनको बिस्तार, विकास र सुदृढीकरणका निम्ति रणनीतिक दस्तावेज निर्माण गरेको बताइन् । ‘सहकारी क्षेत्रको विकासको अवस्था, त्यसका सबल पक्षहरू के छन् ? अहिलेसम्म प्राप्त उपलब्धि के छन् ? यी कुराको चर्चा गर्दै समग्र सहकारी क्षेत्रको विश्लेषण यो डकुमेन्टमा गरिएकाे छ,’ उनले भनिन् ।

अन्तर्राष्ट्रिय अभ्यास, राष्ट्रिय अवस्थालाई समेत ध्यानमा राख्दै सहकारी क्षेत्रको समग्र विकासका निम्ति स्पष्ट भिजनका साथ रणनीति तयार गरिएको मन्त्री अर्यालले बताए । संविधानले ३ खम्बे अर्थनीतिमा सहकारी क्षेत्रलाई महत्वपूर्ण क्षेत्रको रुपमा लिएको प्रसङ्ग जोड्दै उनले संविधानको कार्यान्वयनसँग जोडेर २५ वर्षे रणनीति तयार गरेको उल्लेख गरिन् ।

सहकारी क्षेत्र उद्यमशीलतातर्फ लाग्नुपर्ने भन्दै मन्त्री अर्यालले उद्यमशीलताको विकास र रोजगारीलाई महत्त्वका साथ जोड दिइएको बताइन् ।

बोर्डले तयार पारेको सहकारी क्षेत्रको २५ वर्षे रणनीति मन्त्रालयको तर्फबाट छिट्टै कार्यान्वयनमा ल्याइने समेत उनले बताइन् । सहकारी अभियानलाई यो कार्यमा सहभागी गराउने बताउँदै मन्त्री अर्यालले समयसापेक्ष कार्यक्रम बनाउने समेत बताइन् ।

मन्त्रालयका सचिव टेकनारायण पाण्डेले रणनीति २५ वर्षमा सहकारी क्षेत्र कसरी अगाडि बढाउने भन्ने भिजनरी दस्तावेज भएको बताए । उक्त रणनीति सरकारले आवधिक योजना, वार्षिक कार्यक्रममा व्यवस्था गर्दै कार्यान्वयनमा लैजाने भन्दै सचिव पाण्डेले सहकारीलाई समाजवादको आधारशिलामा व्यवस्थित गर्दै अगाडी बढाउने बताए ।

प्रकाशित मिति: बुधबार, असोज २१, २०७७ २०:१८