लकडाउनमा स्कुल बन्द भएपछि शिक्षक बने उद्यमी

A+ A A-

डडेल्धुराको अमरगढी- ५ का रामशरण रोका ३७ वर्षका भए । १० वर्षदेखि उनी शिक्षण पेसामा कार्यरत छन् । यो पेसाबाटै उनको दैनिकी राम्रैसँग चलिरहेको थियो ।

कोरोना संक्रमण रोकथाम तथा नियन्त्रणको प्रयासमा सरकारले गत ११ चैतबाट देशव्यापी लकडाउन घोषणा गर्‍याे । डडेल्धुराको एक निजी विद्यालयमा अध्यापन गराइरहेका उनलाई लकडाउन भएपछि भने दैनिकी चलाउन समस्या हुन थाल्यो ।

लकडाउनले विद्यालय बन्द भएपछि उनले विकल्प खोज्न थाले । पहिले पोखरामा बस्ने भएकाले राशरणका त्यहाँ थुप्रै साथी छन् । कोरोनाका कारण बेरोजगार भएको समयमा एक दिन उनको पुराना साथीहरूसँग फोनमा कुराकानी भयो । साथीहरूको सुझाव र इन्टरनेटको सहायतबाछ उनी आफ्नै ठाउँ डडेल्धुरामा चप्पल उद्योग खोल्न तयार भए ।

रामशरण अहिले डलेडेल्धुरा सदरमुकामको विद्युत् रोड छेउमै चप्पल उद्योग खोलेका छन् । ‘सफल चप्पल उद्योग’ नाम दिएर उनले सो उद्योग चलाएका हुन् । ८ लाख लगानी गरेर विराटनगरबाट मेसिन तथा चप्पल बनाउन प्रयोग हुने कच्चा पदार्थ ल्याएर उत्पादन रामशरणले उद्योग सञ्चालन सुरु गरेका हुन् ।

‘घरमै बसेर के गर्नु भनेर धेरैसँग सुझाव लिए । फेरि सबैले गरेजस्तो व्यापार गरेर कुनै फाइदा थिएन । बजारको अध्ययन गरेपछि उद्योग सञ्चालन गरेको हुँ,’ उनले भने, ‘सुदूरपश्चिमका पहाडी जिल्लामा अहिले कतै पनि चप्पल उद्योग छैन् । ७ पहाडी जिल्लामा आफूले उत्पादन गरेका चप्पल आपूर्ति गर्ने योजना छ ।’

उनले सुदूरपश्चिमका पहाडी जिल्लामा पहिलो पटक चप्पल उद्योग सञ्चालनमा ल्याएपछि स्थानीयसहित यहाँका व्यापारी पनि खुसी भएका छन् ।

चप्पल उत्पादनबाट दैनिक पाँच हजारको आम्दानी गर्ने लक्ष्य रहेको रामशरणले बताए । दिनमा पाँच सय जोर चप्पल बेच्न सके दैनिक ५ हजारसम्म आम्दानी गर्न सकिने उनको भनाइ छ । ‘चप्पलको मूल्य एक सय रुपैयाँ हाराहरी आउँछ । सबै ठाउँबाट माग आए अर्को मेसिन पनि ल्याउने विचार गरेको छु,’ उनले भने, ‘सुलभ मूल्य हुने हुँदा तराईबाट समेत माग आउँछ कि भन्ने लागेको छ।’

परिवारको साथ, बेरोजगार युवालाई रोजगारी दिने लक्ष्य

रामशरणलाई उद्योग सञ्चालन गर्नमा परिवारका सदस्यको राम्रो साथ मिलेको छ । उद्योग पूर्णरूपमा सञ्चालनमा आउने बितिक्कै कम्तिमा ५ जनालाई रोजगारी दिन सकिने उनको भनाइ छ ।

उनले अहिलेलाई घरकै सदस्यबाट सहयोग पाइरहेका छन् । बेरोजगार बसेका घरका सदस्यलाई समेत रोजगार दिने उनी बताउँछन् । ‘सुरुमा सञ्चालनमा आउँदा घरकै परिवारका सदस्य मिलेर काम गछौँ । अनि उद्योग विस्तार गरेर बेरोजगार युवालाई रोजगारी दिने सोचमा छु,’ उनले भने ।अहिले रोजगारी नपाएर थुप्रै युवा बेरोजगार भएर विदेश गइरहेका छन् ।

स्थानीय तहको आश्वासन

रामशरणले स्थानीय तहबाट समेत उद्योग सञ्चालनका लागि हौसला पाइरहेको बताए । उद्योग सञ्चालनका लागि सामग्री डडेल्धुरा पुर्‍याएकै दिन अमरगढी नगरप्रमुख विश्वेस्वरप्रसाद ओझाले फोन गरेर सहयोगको आश्वासन दिएको उनले बताए ।

‘फोन गरेको दोस्रो दिन नगरप्रमुख ज्यू आफैँ यता आउनुभयो । अनुगमन गरेर जानु भयो,’ उनले भने, स्थानीय उत्पादनलाई प्राथमिकता दिन आफूले पनि सक्दो सहयोग गर्ने बताउनु भएको छ । उहाँले उत्पादनको बजारीकरणमा सहयोग गर्ने प्रतिवद्धता पनि व्यक्त गर्नुभएको छ ।’

प्रकाशित मिति: मंगलबार, असोज २०, २०७७ १७:५९