लुम्बिनी विकास बैंक र शाइन रेसुङ्गा डेभलपमेन्ट बैंकले कति देलान् लाभांश

A+ A A-

राष्ट्रियस्तरको लुम्बिनी विकास बैंक र १० जिल्ला कार्यक्षेत्र भएको शाइन रेसुङ्गा डेभलपमेन्ट बैंकले आर्थिक वर्ष २०७५/७६ को तेस्रो त्रैमासिक वित्तीय विवरण सार्वजनिक गरेका छन् । त्यस्तै, ३ जिल्ला कार्यक्षेत्र भएका तिनाउ, मिसन र पूर्णिमा बैंकले पनि वित्तीय विवरण प्रकाशित गरेका छन् |

लुम्बिनी विकास बैंकको स्थिति

लुम्बिनीले यस वर्षको चैत मसान्तसम्म ३४ करोड ३४ लाख खुद नाफा आर्जन गरी वार्षिक प्रतिसेयर आम्दानी २० रुपैयाँ ७२ पैसा कायम गरेको छ ।

२ अर्ब ५२ करोड रुपैयाँ ब्याज आम्दानी र १ अर्ब ५१ करोड रुपैयाँ ब्याज खर्चपछि ७३ करोड २४ लाख रुपैयाँ खुद ब्याज आम्दानी गरेको छ ।

त्यस्तै, फी, कमिसन अन्य सञ्चालनसमेत गरेर ८३ करोड ८२ लाख रुपैयाँ कुल सञ्चालन आम्दानी गरेको छ ।

कर्मचारी र सञ्चालन खर्चपछिको सञ्चालन आम्दानी ४९ करोड २१ लाख रुपैयाँ छ ।

खुद नाफा गत वर्षभन्दा ८६ प्रतिशतले बढेको छ ।

निक्षेप र लगानी बढेको हुँदा ब्याज आम्दानीमा वृद्धि भएको छ | खुद ब्याज आम्दानी ३७ प्रतिशत बढेको छ ।

भिबोर सोसाइटी र लुम्बिनी फाइनान्स गाभिने क्रममा प्राप्त भएको स्वाप रकमबाट १७ प्रतिशत बोनस सेयर लाभांश घोषणा बैंकले आव २०७४/७५ को साधारण सभासमेत गरेको छैन ।

लामो समयसम्म सञ्चित घाटामा रहेको बैंक सञ्चित घाटा पूरा गरी नाफामा गएको छ । राष्ट्रियस्तरको विकास बैंकलाई तोकिएको २ अर्ब ५० करोड चुक्ता पुँजी पुर्याउन बाँकी रहेको छ । प्रस्तावित बोनस सेयर केन्द्रीय बैंकबाट स्वीकृत भए/नभएको बैंकले जानकारी गराएको छैन । प्रस्तावित बोनस सेयर स्वीकृत भएमा तोकिएको पुँजी पुग्नेछ ।

बैंकले तोकिएको पुँजी पुर्याएपछि अहिलेको आम्दानीको आधारमा बैंकको प्रतिसेयर आम्दानी १७ रुपैयाँ कायम हुनेछ । आगामी वर्ष १२ प्रतिशतसम्म लाभांश दिन सक्ने देखिन्छ ।

बैंकको चुक्ता पुँजी २ अर्ब २० करोड रुपैयाँ, निक्षेप २४ अर्ब रुपैयाँ र कर्जा लगानी २२ अर्ब रुपैयाँ छ ।

अन्य सूचकमा पुँजीकोष अनुपात १५.७९ प्रतिशत, खराब कर्जा २.१३ प्रतिशत, कोषको लागत ८.७८ प्रतिशत, कर्जा निक्षेप अनुपात ७८.४७ प्रतिशत, आधार दर ११.१३ प्रतिशत, ब्याज अन्तर ४.६४ प्रतिशत रहेको छ ।

शाइनको स्थिति

शाइनले यस वर्षको चैत मसान्तसम्म ३१ करोड ९ लाख खुद नाफा आर्जन गरी वार्षिक प्रतिसेयर आम्दानी २५ रुपैयाँ ५५ पैसा कायम गरेको छ ।

१ अर्ब ५४ करोड रुपैयाँ ब्याज आम्दानी र ९० करोड ८६ लाख रुपैयाँ ब्याज खर्चपछि ६३ करोड लाख रुपैयाँ खुद ब्याज आम्दानी गरेको छ ।

त्यस्तै, फी, कमिसन अन्य सञ्चालनसमेत गरेर ७२ करोड ९७ लाख रुपैयाँ कुल सञ्चालन आम्दानी गरेको छ ।

कुल सञ्चालन आम्दानीको २७ प्रतिशत कर्मचारी र सञ्चालन खर्च गरेर बैंकले नाफामा योगदान दिएको छ । यो खर्च तुलनात्मक रूपमा अन्य बैंकको भन्दा कम हो | कर्मचारी र सञ्चालन खर्चपछिको सञ्चालन आम्दानी ५२ करोड ४७ लाख रुपैयाँ छ । खुद नाफा गत वर्षभन्दा ३० प्रतिशतले बढेको छ ।

बैंकको चुक्ता पुँजी १ अर्ब ६२ करोड रुपैयाँ, निक्षेप १७ अर्ब रुपैयाँ र कर्जा लगानी १५ अर्ब रुपैयाँ रहेको छ ।

पुँजीकोष अनुपात १३.५७ प्रतिशत, खराब कर्जा ०.१९ प्रतिशत, कोषको लागत ७.७९ प्रतिशत, कर्जा निक्षेप अनुपात ७७ प्रतिशत, आधार दर ९.५८ प्रतिशत, ब्याज अन्तर ५.७५ प्रतिशत रहेको छ ।

गुल्मीको रेसुङ्गा, प्यूठानको गौमुखी बैंकलाई गाभिसकेको शाइनले भैरहवामा रहेको तीन जिल्ला कार्यक्षेत्र भएको पूर्णिमा विकास बैंकलाई विलय गर्ने अन्तिम चरणमा पुगेको छ |

विलय र गाभिन लागेका ३ बैंक

पूर्णिमा, तिनाउ र मिसन बैंकले पनि वित्तीय प्रतिवेदन सार्वजनिक गरेका छन् ।

शाइनसँग विलयको अन्तिम चरणमा पुगको पूर्णिमा विकास बैंकले ५ करोड ६७ लाख खुद नाफा गरेको छ । बैंकको अघिल्लो वर्षभन्दा खुद नाफा ३ प्रतिशत घटेको छ ।

एकअर्कासँग गाभिन लागेका मिसन र तिनाउले क्रमशः ६ करोड ४६ लाख र ६ करोड १० लाख खुद नाफा गरेका छन् ।

प्रकाशित मिति: बिहीबार, वैशाख १२, २०७६ ०१:४३