स्पर्श र वोमी लघुवित्तकाे वित्तीय विवरण : लाभांश कति देलान् ?

A+ A A-

स्पर्श लघुवित्त र वोमी लघुवित्तले आर्थिक वर्ष २०७५/७६ को तेस्रो त्रैमासिक वित्तीय विवरण सार्वजनिक गरेक छन् । प्रकाशित वित्तीय विवरणअनुसार दुवै लघुवित्तको खुद आम्दानी अघिल्लो वर्षको यही अवधिको तुलनामा ५० प्रतिशतभन्दा बढी बढेको छ ।

स्पर्श लघुवित्तको स्थिति

स्पर्श लघुवित्तले यस वर्षको चैत मसान्तसम्म ६० लाख ३९ हजार रुपैयाँ खुद नाफा गरेर प्रतिसेयर वार्षिक आम्दानी ९ रुपैयाँ ७१ पैसा कायम गरेको छ । ६ करोड ७७ लाख रुपैयाँ ब्याज आम्दानी र ४ करोड ५२ लाख रुपैयाँ ब्याज खर्चपछि २ करोड २४ लाख रुपैयाँ खुद ब्याज आम्दानी गरेको छ ।

त्यस्तै, फी कमिसनबाट १ करोड ८३ लाख रुपैयाँसमेत गरी ४ करोड ७ लाख रुपैयाँ कुल सञ्चालन आम्दानी गरेको छ ।

कर्मचारी र कार्यालय सञ्चालन खर्चपछिको सञ्चालन आम्दानी १ करोड १३ लाख रुपैयाँ छ ।

ब्याज आम्दानी २६० र ब्याज २२० प्रतिशत वृद्धि भए पनि खुद ब्याज आम्दानी ४८६ प्रतिशतले वृद्धि भएको छ । त्यस्तै, फी कमिसन आम्दानी २४६ प्रतिशतले वृद्धि भएको छ । कार्यालय सञ्चालन खर्च ४० प्रतिशत र कर्मचारी खर्च २३४ प्रतिशतले खर्च बढे पनि खुद नाफा गर्न सकेको छ | अघिल्लो वर्षको यही अवधिमा ५६ लाख खुद घाटा परेको थियो | खुद आम्दानी वृद्धिमा ब्याज र अन्य सञ्चालन आम्दानीमा आएको वृद्धिलाई कारण मान्न सकिन्छ ।

आगामी वर्ष ५ प्रतिशतसम्म नाफा दिन सक्ने हैसियत बनाएको देख्न सकिन्छ ।

कम्पनीको चुक्ता पुँजी ८ करोड २९ रुपैयाँ, सापट ५९ करोड, सदस्यको बचत १३ करोड र कर्जा लगानी २ अर्ब ७५ करोड रुपैयाँ छ ।

खराब कर्जा शून्य दशमलव ४६ प्रतिशत र कोषको लागत ११ दशमलव ५ प्रतिशत छ ।

वोमी लघुवित्तको स्थिति

वोमी लघुवित्तले यस वर्षको चैत मसान्तसम्म ४ करोड ४८ लाख रुपैयाँ खुद नाफा गरेर प्रतिशेयर वार्षिक आम्दानी ५९ रुपैयाँ १६ पैसा कायम गरेको छ । १८ करोड ६७ लाख रुपैयाँ ब्याज आम्दानी र ९ करोड ६४ लाख रुपैयाँ ब्याज खर्चपछि ९ करोड २ लाख रुपैयाँ खुद ब्याज आम्दानी गरेको छ ।

त्यस्तै, अन्य सञ्चालन आम्दानी ३ करोड ८५ लाख रुपैयाँसमेत गरी १३ करोड ३५ लाख रुपैयाँ कुल सञ्चालन आम्दानी गरेको छ ।

कर्मचारी र कार्यालय सञ्चालन खर्चपछिको सञ्चालन आम्दानी ३ करोड ३८ लाख रुपैयाँ छ ।

ब्याज आम्दानी ५७ र ब्याज खर्च ६२ प्रतिशत वृद्धि भए पनि खुद ब्याज आम्दानी ५२ प्रतिशतले वृद्धि भएको छ । त्यस्तै, अन्य सञ्चालन आम्दानी २७ प्रतिशतले वृद्धि भएको छ ।

कर्मचारी खर्च ३७ प्रतिशत र कार्यालय सञ्चालन खर्च ४० प्रतिशतले वृद्धि भएको छ । कर्मचारी र सञ्चालन खर्चमा वृद्धि भए पनि खुद आम्दानी ५१ प्रतिशतले वृद्धि भएको छ ।

चालू वर्षको आम्दानीबाट ४५ प्रतिशतसम्म लाभांश दिन सक्ने हैसियत बनाएको देख्न सकिन्छ ।

कम्पनीको चुक्ता पुँजी १० करोड १० लाख रुपैयाँ, सापट ९३ करोड, सदस्यको बचत ५६ करोड र कर्जा लगानी १ अर्ब ६७ करोड रुपैयाँ छ ।

खराब कर्जा शून्य दशमलव ७ प्रतिशत र कोषको लागत १० दशमलव ९३ प्रतिशत छ ।

प्रकाशित मिति: बुधबार, वैशाख ११, २०७६ २१:१०