सुदूरपश्चिमका सबै विमानस्थलमा नियमित उडान हुन्छ : पर्यटनमन्त्री भट्टराई

A+ A A-

सुदूरपश्चिमका सबै विमानस्थलमा नियमित उडान गरिने संस्कृति, पर्यटन तथा नागरिक उड्डयन मन्त्री योगेश भट्टराईले बताएका छन् ।

सुदूरपश्चिमका पहाडी जिल्लामा परीक्षण उडान तथा विमानस्थल निरीक्षणका लागि शनिबार डोटी पुगेका मन्त्री भट्टराईले सुरुमा धनगढीबाट नियमित उडान भए पनि चाँडै काठमाडौंबाट पनि सुदूरपश्चिमका सबै विमानस्थलमा नियमित उडान उडान सुरु गर्ने बताएका हुन् ।

अझै दिपायल विमानस्थलको स्तरोउन्नति गर्न बाँकी रहेको बताउँदै उनले रनवे अझै बढाउनुपर्ने महसुस गरेकोले के कति जग्गा प्रयोगमा आउँछ त्यसको बारेमा चाँडै अध्ययन गरि अगाडि बढाउने बताए ।

‘लामो समयदेखि सुदूरपश्चिमका विमानस्थल बन्द अवस्थामा थिए। अब चाँडै नियमित रूपमा संचालनमा आउँछ । सुदूरपश्चिम पर्यटकीय हिसाबले पनि रमणिय ठाउँ हो,’ उनले भने, ‘तर, सरकारले पहिलेदेखिनै यस क्षेत्रलाई प्राथमिकता नदिँदा पछाडि पर्‍यौँ । अब नेकपाको सरकार आइसकेकोले हामी सुदूरपश्चिमको विकासका लागि लागि परेका छौँ ।’

उनले लामो समयदेखि यहाँका विमानस्थलहरू सञ्चालनमा नआउँदा आफू चिन्तित रहेको बताए । प्राकृतिक रूपमा पनि सुन्दर रहेको डोटी सुदूरपश्चिमको राजधानी बन्न नसके पनि नियमित रूपमा उडान थालेपछि राजधानीबाट टाढा नहुने उनको भनाइ छ ।

‘सुदूरपश्चिम र कर्णाली प्रदेश सामाजिक र आर्थिक रूपमा पछाडि परेको आभास हुन्छ । हाम्रा लाखौँ दाजुभाइ विदेश जान बाध्य छन् । सधैँ यस्तो अवस्था आउनु हुँदैन । यस क्षेत्रमा सबै कुरा छ,’ उनले भने।

आले विकासको पर्यावाची नाम हो

दिपायल विमानस्थल निरीक्षण गर्दै मन्त्री भट्टराईले विमानस्थल सञ्चाल तथा स्तरोउन्नतिका लागि डोटीबाट निर्वाचित प्रतिनिधिसभा सदस्य प्रेम आले मगरको महत्वपूर्ण भूमिका रहेको बताए ।

उनले आलेलाई जिल्लामा कुन नामले चिन्छन् भन्ने थाहा नभएको तर, काठमाडौंमा विकासबादी नेताका रूपमा चिन्ने गरेको बताए। आले भनेको विकासको पर्यावाची नाम भएको उनको भनाइ थियो ।

विमानस्थलमा करिव १०/१२ मिनेट बोलेका मन्त्री भट्टराईले ४ मिनेट आलेले गरेको कामको बारेमा खर्च गरे । डोटीलाई सुदूरपश्चिमको राजधानी बनाउन पनि आलेले धेरै प्रयास गरेको उनको भनाइ छ ।

‘काठमाडौं बस्दा उहाँ नपुगेको कुनै मन्त्रालय छैन। हामी तेती धेरै दौडधुप गर्दैनौँ जति उहाँले डोटीको विकासका लागि गनुहुन्छ । उहाँको देश विकासमा ठूलो योगदान छ,’ उनले भने।

प्रकाशित मिति: शनिबार, असोज १७, २०७७ २०:३७