भर्चुअल प्रविधिमार्फत् टोयोटा कोरोला क्रसको बिक्री सुरु

A+ A A-

नेपालका लागि टोयोटा गाडीहरूको एक मात्र आधिकारिक वितरक युनाइटेड ट्रेडर्स सिण्डिकेट प्रालिले नेपालमा टोयोटा कोरोला क्रस एसयूभीको बिक्रीवितरण सुरु गरेको छ ।

कोभिड– १९ लाई मध्यनजर गर्दै कम्पनीले पहिलो पटक भर्चुअल प्रविधिको सहायताले बिक्रीवितरण प्रारम्भ गरेको हो ।

टोयोटा नेपालको औपचारिक एवं आधिकारिक फेसबुक-इन्स्टाग्राम पेजमा बिहीबार मध्यान्ह १२ बजे उक्त समारोहको प्रत्यक्ष प्रसारण गरिएको थियो ।

टोयोटा कारहरू नेपालमा अत्यन्त रुचाइएको जापनिज कार हुन् । विश्वप्रसिद्ध यस टोयोटा कारको नयाँ संस्करण क्रस एसयूभी थाइल्याण्डमा निर्माण गरिएको हो ।

चार सिलिण्डरको कार टीजीएनए प्लेटफर्ममा तयार भएको हुँदा यसले अत्याधुनिक डिजाइन, स्थिरता र पूर्ण कार्यक्षमतालाई समर्थन गर्दछ ।

यो सीभीटी ट्रान्समिसन कार भएकाले एसयूभी गति छिटो लिने, न्यून उत्सर्जन पैदा गर्ने खालको छ भने यो हलुका सवारीसाधन पनि बनेको छ ।

कारको बाह्य बनोटमा रहेको फ्रन्ट ग्रीलले राम्रो लुक्स दिन्छ र यो कार कच्ची सडकमा समेत चलाउन उपयुक्त छ ।

यस्तैगरी, कारको बडीमा रहेका एसेन्ट लाइनहरूले गाडीलाई आकर्षक स्वरुप दिएको छ । कोरोला क्रसमा सबैभन्दा लामो ह्वीलबेस छ, जसले कारलाई खास गरेर सडकमा उच्च गतिमा दौडिरहेको समयमा पनि अधिक स्थिरता तथा आरामदायी सवारी प्रदान गर्दछ ।

टोयोटा कोरोला क्रस एसयूभी भित्री रूपमा पनि सुविधाजनक एवं आरामदायी छ । यसको भित्री भाग फराकिलो छ ।

यो कारमा न्यून ५.२ मिटरको मोडाउन मिल्ने व्यास छ, जुन यस श्रेणीका कारहरूमध्ये उत्कृष्ट हो । कार हाँक्ने चालकलाई अधिकतम सुविधाप्र्रदान गर्न कोरोलाक्रस एसयूभी नवीन टर्सन बिम सस्पेन्सनका साथ निर्माण भएको छ ।

यसैगरी, डाइनामिक क्रुज नियन्त्रण, स्वचालित उच्च बीमलाइट, यो कारमा ब्याक मोनिटर, एबीएसका साथ ईबीडी, हिल स्टार्ट एसिस्ट कन्ट्रोल, इमर्जेन्सी स्टप सिग्नल आदि विशेषताहरू पनि छन् ।

हाल नेपालमा कोरोलाक्रस एसयूभी दुई प्रकारका छन् । जसअनुसार इन्ट्री मोडलको बजारमूल्य १ करोड १२ लाख र हाई मोडलको १ करोड ३३ लाख रुपैयाँ कायम गरिएको छ ।

प्रकाशित मिति: शुक्रबार, असोज १६, २०७७ १८:४८