मान्छेकाे गल्तीमा गोरु र कुकुरलाई गाली किन ?

A+ A A-

कसैलाई गाली गर्नुपर्दा मान्छेहरूले कुकुर भन्ने गरेकाे सन्छु । कसैलाई होच्याएर बोल्दा गोरु भनेकाे सुन्छु । नरमाइलाे लाग्छ । कुकुरले घरको गोठालो गर्छ । बच्चाहरूसँग खेल्छ । आफ्नो धनीलाई भुक्दैन । नयाँ मान्छेलाई त्यति सजिलै घरभित्र छिर्न दिँदैन । बाटोतिर हुने छाडा कुकुरले पनि कसैको केही बिगारेको हुँदैन ।

कुनै आपत अथवा समस्या नपरी त्यसले कसैलाई टोक्दैन । मानिसले जस्तो बेइमानी कुकुरले कहिल्यै गर्दैन । कसैलाई धोका दिँदैन । कसैको चित्त दुखाउँदैन । नबुझ्नेले बुझ्दैनन्, कतिले बुझ्नै खाेज्दैनन् । कुकुरले आफ्नो धनीलाई निकै माया गर्छ ।

गोरुले त मान्छेको परिवार नै चलाइदिएको हुन्छ । अहिले नयाँ टेक्नोलोजीले गर्दा गोरुको प्रयोग अलिक कम हुन थालेको छ । गाउँतिर त अझै धेरैको सहारा गोरु नै हो । गोरुले खेतबारी जोत्ने मात्र होइन, मल पनि दिन्छ । त्यसको सट्टामा उसले बिहान बेलुका घाँस खान्छ । त्यो पनि मान्छेले जस्तो दाल, तरकारी, अचार, पानी छुट्टाछुट्टै दिनु पर्दैन । मान्छेले चाहिँ त्यो गोरुलाई जोताएर फलेको अन्नले भात मात्रै खाँदैनन्, छोराछोरी पढाउँछन् । सम्पत्ति जोड्छन् । उस्तै परे मोजमस्ती पनि गर्छन् ।

तर, मान्छेको बेइज्जत वा गाली गर्नुपर्दा कहिले कसैलाई धोका नदिने कुकुर र मान्छेलाई जीवन दिइरहेको गोरुको नाम किन लिइन्छ ?

कहिलेकाहीँ सडक पेटीमा हिँडिरहेको कुकुरलाई मानिसले बित्थामा कुट्छन् । गल्ती नै नभए पनि कुकुर भाग्छ । किनकि, ऊ मान्छेको सामना गर्न सक्दैन । कुनै मान्छेले बाटोमा सुसु गर्छ, कसैले बाटोमै थुक्छन्, कोही रक्सी खाएर छाडा बोल्दे हिँडिरहेका हुन्छन् । तर, त्यस्ता मान्छेलाई कसैले कुट्न सक्दैन । मैले सुनेको छु, परिवारले त्यस्ता मान्छेलाई गोरु, कुकुर भन्दै हकार्छन् ।

यहाँ पनि दोष गोरु र कुकुरलाई नै किन दिइन्छ ?

कहिलेकाहीँ सोच्छु- गोरु र कुकुरहरू आपसमा झगडा गर्दा गालीमा ‘मान्छेजस्तो’ भन्ने शब्द प्रयोग गर्छन् कि गर्दैनन् होला ?

जोत्ने क्रममा गोरुको गर्धन गोहोरोको छालाजस्तै अररो भएको हुन्छ । ऊ आफू गलेको कुरा जोत्ने मान्छेसँग शेयर गर्न सक्दैन । उसले काडेको र्‍यालमा हलीले कुनै कुरा बुझ्दैन, बरु लौरोले ढाडमा सुम्ला बस्ने गरी कुट्छ ।

त्यही हलीले गोरुलाई फाली लगाउँदा उसलाई कसैले कुट्दैन ।

गोरु र कुकुरमाथि मान्छेले गरेको यो अन्याय कुनै अर्थमा उचित होला त ? शान्तिसँग बाँच्न पाउने अधिकार मान्छेलाई मात्र हो त ? जनावरको पक्षमा पनि कुनै कानुन छ भने गोरु र कुकुरको हकमा किन लागू हुँदैन ?

प्रकाशित मिति: सोमबार, कात्तिक ७, २०७९ ०६:००