सुदूरपश्चिममा थपिँदै प्रयोगशाला, परीक्षणकाे दायरा भने घट्दै

A+ A A-

सुदूरपश्चिम प्रदेशमा छ वटा प्रयोगशालामार्फत कोरोना परीक्षण भइरहेको छ । डडेल्धुरा, बैतडी, डोटी, बझाङ र सेती प्रादेशिक अस्पतालमा दुई प्रयोगशालामार्फत परीक्षण भइरहेको हो ।

कोरोना संक्रमण परीक्षणका लागि प्रयोगशाला विस्तार भए पनि परीक्षणको दायरा भने बढ्न सकेको छैन । बैतडी, डोटी, सेतीमा प्रदेश सरकारको लगानी, बझाङमा स्थानीय सरकारको र डडेल्धुरामा निजी क्षेत्र र सरकारको सहयोगमा प्रयोगशाला सञ्चालनमा आएको हो ।

सबै प्रयोगशालामा गरी दैनिक ६ हजार जनासम्मको पीसीआर परीक्षण गर्न सकिने स्वास्थ्य निर्देशनालायको दाबी छ । प्रदेशको धनगढीस्थित सेती प्रादेशिक अस्पतालमा २० चैत, डडेल्धुरामा १८ असारमा, डोटीमा २ भदौमा, बैतडीमा १ असाेजमा र बझाङमा ८ असोजदेखि पीसीआर परीक्षण सुरु गरिएको थियो ।

छ वटै प्रयोगशालामा सबैभन्दा धेरै ४ असोजमा कोरोना नमुना परीक्षण भएको सुदूरपश्चिम प्रदेश स्वास्थ्य निर्देशनालयले जनाएकाे छ । सो दिन सुदूरपश्चिम प्रदेशमा नौ सय ९४ नमुना परीक्षण भएको थियो ।

प्रदेशमा दैनिक छ हजार नमुना परीक्षण गर्न सक्ने क्षमता रहेको भए पनि अहिले दैनिक एक हजार पनि नमुना परीक्षण हुन नसकेको सुदूरपश्चिम प्रदेश स्वास्थ्य निर्देशनालयका निर्देशक डाक्टर गुणराज अवस्थीले जानकारी दिए । उनले स्थानीय तहहरूले नमुना संकलन गर्न नसक्दा परीक्षणको दायरा बढ्न नसकेको बताए ।

अछाममा कोरोना परीक्षण प्रयोगशाला सञ्चालन आउने

अहिले प्रदेशका छ वटा प्रयोगशालामार्फत कोरोना परिक्षण गरिँदै आएकोमा अब सात वटा प्रयोगशालाबाट कोरोना परिक्षण गरिने स्वास्थ्य निर्देशक डाक्टर अवस्थीले जानकारी दिए । उनले अब केही दिनमै अछाममा पनि कोरोना परीक्षण प्रयोगशाला सञ्चालनमा आउने बताए ।

‘निर्देशनालयले आवश्यकताअनुसार प्रयोगशाला स्थापना गरिरहेको छ । क्वारेन्टाइनमा रहेका र कोरोना संक्रमितको सम्पर्कमा आएका शंकास्पद व्यक्तिको नमुना संकलन गर्ने जिम्मेवारी सम्बन्धित स्थानीय तहको हो । स्थानीय तहले जति धेरै स्वाब संकलन गर्ने सक्यो त्यति धेरै परिक्षणको दायरा बढ्छ,’ उनले भने ।

सुदूरपश्चिममा झण्डै १२ सय सक्रिय संक्रमित

सुदूरपश्चिम प्रदेशमा कोरोनाका सक्रिय संक्रमित एक हजार दुई सय नजिक पुगेको छ । सुदूरपश्चिम प्रदेशमा कोरोनाका सक्रिय संक्रमित एक हजार एक सय ९३ पुगेकोे स्वास्थ्य निर्देशनालय डोटीले जनाएको छ ।

नाै वटा जिल्ला रहेको सुदूरपश्चिममा हालसम्म सबैभन्दा धेरै सक्रिय संक्रमित कैलालीमा छन् । यहाँ सक्रिय संक्रमितको संख्या ६ सय ५७ रहेको छ भने डोटीमा एक सय ३४, बझाङमा एक सय ११, अछाममा एक सय, बैतडी ८५, कञ्चनपुरमा ६३, दार्चुलामा ३० र डडेल्धुरामा १२ जना कोरोनाका सक्रिय संक्रमित छन् । बाजुरामा भने अहिले संक्रमणमुक्त भएको छ ।

६ हजार बढीले जिते कोरोना

सुदूरपश्चिममा हालसम्म ६ हजार १ सय बढीले कोरोना जितेका छन् । स्वास्थ्य निर्देशनालय डोटीका अनुसार हालसम्म प्रदेशमा ७ हजार ३ सय ४५ जनामा कोरोनाको संक्रमण पुष्टि भएकोमा ६ हजार १ सय ३६ जना निको भएका छन् ।

सबैभन्दा धेरै संक्रमित रहेको कैलालीका १ हजार ८ सय ७२ जना निको भएर घर फर्किएका छन् । अछामका ९ सय ६९, डोटीका ९ सय ६० र कञ्चनपुरका ७ सय ४७ जना संक्रमित निको भएर घर फर्किएको स्वास्थ्य निर्देशनालयले जनाएकाे छ ।

बाजुराका ४ सय ५१ जना, बझाङका ४ सय ३१, बैतडीका ३ सय ३१, डडेल्धुराका ३ सय २४ र दार्चुलाका ५१ जना संक्रमित पनि डिस्चार्ज भएका छन् । चार महिनाको अवधिमा सुदूरपश्चिमका २१ जना कोरोना संक्रमितको मृत्यु भएको छ ।

कैलालीका नाै, अछामका पाँच, बझाङका तीन, बाजुराका दुई, बैतडी र डडेल्धुराका एक/एक जना संक्रमितको मृत्यु भएको हो । त्यसमध्ये तीन जनाले भने आत्महत्या गरेका हुन् । दुई जनामा आत्महत्यापछि कोरोना पुष्टि भएको हो भने एक जनाले कोरोना देखिएपछि आत्महत्या गरेका हुन् ।

प्रकाशित मिति: बिहीबार, असोज १५, २०७७ १८:३४