सुन तस्करी र भन्सार छलीभन्दा पनि बढी राजस्व उठ्छ ट्राफिक कारबाहीबाट

A+ A A-

बाइकमा सवार ललितपुर भैंसेपाटीका रमेश महर्जनलाई २७ चैतमा ट्राफिक प्रहरीले थापाथली चोकमा एक्कासि रोक्यो । उनीसँगैका अन्य चालकलाई भने ट्राफिक प्रहरीले सरासर जान दियो ।

रमेश छक्क परे । ट्राफिक महिला प्रहरी थिइन् । उनले सोधे, ‘किन म्याडम ?’

ट्राफिक प्रहरीले जवाफ दिइन्, ‘तपाईंको लाइसेन्स र बिलबुक देखाउनुहोस् ।’

रमेशले आफ्नो पाइन्टको दायाँ साइडको पछाडिको खल्तीबाट मोटर साइकलको बिलबुक र सवारी चालक अनुमतिपत्र (लाइसेन्स) देखाए । ट्राफिक प्रहरीले उनको बिलबुक फिर्ता गरिन् । लाइसेन्स भने आफ्नै साथमा राखिन् । चिट काटेर हातमा थमाइदिइन् ।

उनी अक्क न बक्क भए । उनले सोधे– चिट किन म्याडम ?

‘तपाईंले लेन क्रस गरेर चलाउनुभयो । पाँच सय ग्लोबल बैंकमा जम्मा गरेर बग्गीखानामा कक्षा लिनू । तपाईंको लाइसेन्स त्यही पाउनुहन्छ,’ ट्राफिक प्रहरीले भनिन् ।

उनी त्रिपुरेश्वर जाने सडकबाट लेन क्रस गरेर थापाथली चोकतिर मोडिएका थिए ।

दाङ घोराही (हाल काठमाडौं बस्दै आएका) का प्रकाश मल्लले मादक पदार्थ सेवन (मापसे) गरेर गाडी चलाउँदा गत माघमा बालाजु ट्राफिक प्रहरीले समात्यो । उनले मापसे गरेर सवारी चलाएको कसुरमा १ हजार जरिमाना र एक घण्टा कक्षा लिनुपरेको थियो ।

यी दुई प्रतिनिधि घटना मात्र हुन् । यसरी ट्राफिक प्रहरीले ट्राफिक नियम अनुशासन पालना नगर्ने सवारी चालकलाई कारबाही प्रक्रिया तीव्र पारेको छ ।

देशभरि नै ट्राफिक नियम उल्लंघन गरेर सवारी चालाउने चालक अधिक रहेको महानगरीय ट्राफिक महाशाखाका प्रमुख एसएसपी वसन्त पन्तको भनाइ छ ।

यसमध्ये पनि लेन अनुशासन र मापसे गरेर चलाउने सवारी चालक अधिक रहेको उनले जानकारी दिए । ट्राफिक नियम पालना नगर्दा अधिकांश दुर्घटनासमेत हुने गरेको पन्तको बुझाइ छ ।

ट्राफिक कारबाहीमा १ अर्ब राजस्व असुली

देशभरबाट ट्राफिक नियम पालना नगर्ने सवारी चालकबाट प्रहरीले २०७५ सालमा मात्रै १ अर्ब ६ करोड ६८ लाख ९१ हजार रुपैयाँ असुल गरेको छ । अन्य क्षेत्रबाट संकलन भएभन्दा बढी देखिएको प्रहरी प्रधान कार्यालयले जनाएको छ ।

प्रहरीले अवैध सुनबाट एक वर्षमा ४५ करोड ४ लाख ६० हजार ६५ रुपैयाँ र भन्सार छली ल्याइएका विभिन्न सामग्रीबाट एक वर्षमा ४२ करोड २३ लाख ९ हजार १ सय रुपैयाँ राजस्व संकलन गरेको छ । प्रहरीले एक वर्षमा कुल १ अर्ब ९३ करोड ९६ लाख ६० हजार १६५ रुपैयाँ राजस्व संकलन भएको जनाएको छ ।

ट्राफिक प्रहरीले ट्राफिक नियम पालना नगर्ने सवारी चालकलाई हाल न्यूनतम ५ सयदेखि ३ हजारसम्म जरिमाना गर्ने गरेको छ । यातायात व्यवस्था विभागसम्म पुग्ने कसुरमा भने विभागले ५ हजारसम्म जरिमाना गर्ने गरेको छ ।

जनता आफैं सचेत हुनुपर्छ: प्रहरी

ट्राफिक नियमबारे आममानिसमा जानकारी नहुँदासम्म कारबाही गरेर यसमा कमी नहुने प्रहरी प्रवक्ता एसएसपी उत्तम सुवेदीको भनाइ छ ।

आमनागरिक सचेत हुनुपर्ने र सडक विभागदेखि सबै सम्बन्धित निकायले भूमिका खेल्नुपर्ने उनको भनाइ छ । विभिन्न चोकमा ट्राफिक बत्तीदेखि सडक विभागले सडक निर्माणमा समेत सुधार गर्नुपर्ने सुवेदीले बताए ।

जेब्राक्रसदेखि सडक लेन छुट्याउन स्पष्ट रेखा हुनु पर्ने उनको भनाइ छ । हाल उपत्यकाकालगायत विभिन्न ठाउँमा निर्माण भएका सडक व्यवस्थित नहुँदा कारबाहीमा पर्ने गरेको चालकको गुनासो छ ।

प्रकाशित मिति: बुधबार, वैशाख ११, २०७६ ०४:०८