विकास भन्छन् : मैले पठाइदिएकाे नयाँ स्यान्डल देख्नै नपाई संसार छाडिन्

A+ A A-

पिलपिल आँसु बग्दै थिए विकास कामीका आँखामा । रुँदै भन्दै थिए, ‘छोरी जन्माउने सबै बुबा पापी हुन् । म पनि पापी बुबा हुँ ।'

लगत्तै तीन हप्ताअघि छोरीले भनेको कुरा सम्झिए । छोरीले त्यताबाट स्यान्डल पठाइदिनू है भनेकी रहिछिन् । उनले स्थानीय शेर कामीसँग छोरीका लागि स्यान्डल पनि पठाइदिए । तर, छोरीले स्यान्डल देख्नै नपाई संसार छाडिन् ।

'तीन हप्ताअगाडि मेरी छोरीले त्यताबाट स्यान्डल ल्याइदिनू है बाबा भनेकी थिई । स्थानीय शेर कामी दाइको हातमा स्यान्डल पठाएको थिएँ । मैले पठाएका स्यान्डल पनि नलगाई छोडेर गई मेरी छोरी,' उनी भन्छन्, 'फूलजस्ती छोरी त्यो पापीले चटक्कै चुँडेर लग्यो । उसका कति सपना थिए, सबै अधुरै रहे । छोरीलाई नदेखेको ४ वर्ष पुग्यो ।’

भारतबाट आएदेखि विकास चैनपुरस्थित एक सानो बन्द कोठाभित्र छन् । जतिखेर पनि आँखा रसाइरहन्छन् । छोरीको बलात्कारी र हत्यारालाई कि त फासी कि त आजीवन जेलमा सडाए मात्रै छोरीले न्याय पाउने भन्दै छाती पिटीपिटी रोइरहन्छन् विकास । १२ वर्षीया सीता (नाम परिवर्तन) जेठी छोरी हुन् । त्यसपछि चार बहिनी र एक भाइ छन् सीताका । सीतासहित तीन बहिनी बाजेबज्यैसँग थिए भने दुई बहिनी र एक भाइ भारतमा बुबाआमासँग थिए ।

माफ गर्नू छोरी, म सबैभन्दा ठूलो अपराधी हुँ । मैले नै कसैले बलात्कार गरोस्, कसैले निर्मम तरिकाले हत्या गरोस् भनेर तँलाई जन्माएको रहेछु । त्यो मन्दिरभित्रको देवता जानोस् । मेरी छोरी त्यो पापीले थिचिकुटी बलात्कार गरेर मार्‍यो । मन्दिरभित्र मेरी छोरी कति रोई होली ?

कति चोटि त ए बाबा, ए आमा भनी होली तर म त उसको त्यो चिच्याहट सुन्ने अवस्थामा थिइनँ । म कसरी भनूँ ? के मैले आफ्नी छोरी घरमा बुबाआमासँग राख्न नपाइने हो ? के मैले त्यो पापीको सुन चोरेर ल्याएको थिएँ र मेरी छोरीको सुन लुट्न यत्रो दुस्साहस गर्‍यो ?

सरकार ! छोरीका लागि न्याय दिलाइ दे, होइन भने मेरो नागरिकता बुझाइदिन्छु । मलाई देशनिकाला गरिदे । यदि म यो देशको नागरिक हुँ, मेरी छाेरीको लुटपाट, बलात्कार र हत्या हुँदा अपराधीलाई फासी हुने कानुन बनाइ दे । हामी बुबा पापी भइसक्यौँ, अब त अति भो ।

छोरीचेलीको जीवनलीला सकिन लाग्यो । अपराधी खुलेआम गाउँघरमा डुल्न थाले । हामी गरिब, दीनदुःखीका आवाज सुन्ने को छ ? हाम्रो रगत-पसिनाको महत्त्व बुझ्ने को छ ?

मेरी छोरीको हत्यारा राजेन्द्र बोहरा नै हो । ऊ यदि हत्यारा होइन भने मेरी छोरीलाई मार्नुभन्दा एक हप्ताअगाडि 'कानका मुन्द्रा दे' किन भन्यो ? किन मेरी छोरीलाई धम्क्यायो ?

उसका अघिल्ला अपराध पनि धेरै छन् । मेरै घरभन्दा पल्लो घरकी एक बालिकालाई पनि उसले बलात्कार गरेर 'बच्चा बसे म जिम्मा लिन्छु' भन्दै कागज गरेर ५ सय रुपैयाँ दिएर घटना थामथुम पारेकाे छ । त्यो नरपिचासबाहेक मेरी छोरीको हत्यारा अरु कोही हुन सक्दैन । त्यसलाई प्रहरीले बाहिर निकालोस् न मात्र, जनकारबाही गर्छौं हामी ।विकास गाउँमा गरिखाने वातावरण नहुँदा २०५८ सालमा भारत छिरेका थिए । त्यसपछि एउटा छोरीको आँखामा समस्या आउँदा धेरै खर्च गरे, तर आँखा काम नलाग्ने गरी बिग्रियो । दु:खैदु:खले भरिएको विकासको जीवनमा दैवले ठूलो वज्रपात पारिदियो । फूलको कोपिलाजस्तै फक्रिन लागेकी सीताले बुबा र भाइलाई देख्नै नपाई संसारबाट बिदा भइन् ।

छोरीको बलात्कारपछि हत्या भएको खबर सुनेपछि बुबा विकासले ९ असोजमा बेङ्लाेरदेखि लखनउसम्म जहाजको यात्रा तय गरे । लखनउबाट निजी गाडी बुक गरी गौरीफन्टासम्म आइपुगे । त्यसको भोलिपल्ट १० असोजमा विकास बझाङ पुगे । तर, उनले न छोरीको लास देख्न पाएका छन्, न त न्यायका लागि लड्न नै सकेका छन् ।

भारतबाट आएकाले उनलाई चैनपुरस्थित एक क्वारेन्टाइनमा राखिएको छ । क्वारेन्टाइनकाे बन्द कोठाभित्र बस्दा उनी झन् अचेत बनेका छन् । उनमा झन् डिप्रेसनको समस्या आउन सक्ने देखिएको छ ।

अस्पतालमा शव

हत्या भएको पछिल्लो दिन ८ असोजमा सम्झनाको शव पोष्टमार्टमका लागि जिल्ला अस्पताल ल्याइएको थियो । पोष्टमार्टमको रिपोर्टले बलात्कारपछि हत्या भएको देखाइसकेको छ । मृत्युको कारण कलेजाेमा दुईवटा ठूलो चोट लागेको देखिएको छ ।

हत्याराले बालिकाको पछाडिबाट तिखो वस्तुले छेडेर हत्या गरेको रिपोर्टमा उल्लेख छ । गर्मीको समयमा आइस नहुँदा शव अस्पतालमा कुहिएर गन्हाउने अवस्थामा पुगेको जिल्ला अस्पतालका डा. मिलन खड्काले बताए ।

यता सम्झनाका आफन्तले पत्रकार सम्मलेनमार्फत हत्यारा सार्वजनिक नगरेसम्म शव नउठाउने बताएका छन् । प्रहरीले विज्ञप्ति इमेलमार्फत पठाएको छ ।

विज्ञप्तिमा राजेन्द्र बोहरालाई हत्या आशंकामा पक्राउ गरी हिरासतमा ल्याएको र जिल्ला अदालतको म्याद थपको आदेशअनुसार म्याद थप भई विस्तृत रूपमा अनुसन्धान भइरहेको बताइएको छ ।

त्यस्तै, विज्ञप्तिमा सोही ठाउँकी अर्की नाम परिवर्तित डी कुमारीले गत २९ साउनकाे बेलुका ५ बजेतिर खिकाला गाउँकै तल धनचढी बोहराको घट्टभित्र जबर्जस्ती करणी गरेको भन्दै जाहेरी दिएको कुरा मात्रै उल्लेख छ तर हत्यारा नै हुन् भनेर आराेप लगाइएकाे छैन ।

प्रहरी नायब उपरीक्षक रूपक खड्काका अनुसार हत्याका आरोपित राजेन्द्र बोहराले बारम्बार झुटो मात्रै बोलिरहेका छन् । हिजो झुटो बोलेको पत्ता लगाउने मेसिन झिकाइएको छ । परीक्षण हुन बाँकी छ ।

अझै पनि प्रहरी टोली घटनास्थल र गाउँमा पुगेर अनुसन्धान गरिरहेकाे छ । अन्य घटनालाई हेर्ने हो र स्थानीयको बयानलाई हेर्ने हाे भने त शंका गर्ने कुनै आधार छैन तर अपराधीले मुख खोलेको अवस्था छैन ।

प्रकाशित मिति: सोमबार, असोज १२, २०७७ २१:५८