नेकपाको जिल्ला नेतृत्व कति समावेशी ?

A+ A A-

७०औं स्थापना दिवसको अवसरमा नेपाल कम्युनिस्ट पार्टीले जिल्ला अध्यक्ष र सचिवको नामावली घोषणा गरेको छ । नेकपाले मंगलबार ७७ वटा जिल्लाका अध्यक्ष र सचिव घोषणा गरेको हो । ११ महिनादेखि नेतृत्वविहीन जिल्लाले सोमबारबाट नेतृत्व पाएका छन् ।

नेकपाको जिल्ला नेतृत्व समावेशी नभएको नेकपाका नेता नै बताउँछन् । नेकपाले घोषणा गरेका जिल्ला नेतृत्वमा तीन महिला छन् । ७७ जिल्लामा तीन महिला नेतृत्वमा पुगेका हुन् । नेकपाको विधानमा केन्द्रीय कमिटीमा ३३ प्रतिशत महिला हुनुपर्ने व्यवस्था छ । तर, केन्द्रीय कमिटीमा ३३ प्रतिशत महिलाको सहभागिता छैनन् ।

जिल्ला नेतृत्वमा पुग्ने तीन महिलामा मकवानपुरबाट मुनु सिग्देल छिन् । यसअघि उनी एमालेबाट मकवानपुरको जिल्ला अध्यक्षमा निर्वाचित भएको थिइन् ।

लमजुङकी मधु अधिकारी पनि जिल्ला अध्यक्षमा चुनिएकी छन् । यसअघि उनी माओवादीको जिल्ला संयोजक थिइन् । हाल उनी गण्डकी प्रदेश सांसद छिन् ।

काभ्रेपलान्चोककी रुकु चौलागाईंले जिल्लाको नेतृत्व पाएकी छन् । उनी तत्कालीन माओवादी केन्द्रका तर्फबाट जिल्ला नेतृत्वमा थिइन् । उनी माओवादीको सशस्त्र विद्रोहदेखि नै राजनीतिमा सक्रिय थिइन् ।

इलाममा सोममाया राई सचिव भएकी छन् । उनी पूर्वएमालेका तर्फबाट सचिव बनेकी हुन् । उनी ७७ जिल्लाकै एक मात्र महिला सचिव बनेकी छन् ।

जनजाति

नेकपाको जिल्ला अध्यक्षमा १८ जना जनजाति पुगेका छन् । जनजाति बाहुल्य जिल्लामा अन्य जातिले बाजी मारेका छन् । जनजातिबाट २५ जना सचिव बनेका छन् ।

एक मात्र दलित अध्यक्ष

नेकपाको जिल्ला अध्यक्षमा एकजना मात्र दलित समुदायबाट पुगेका छन् । चितवनका यमबहादुर परियार जिल्ला अध्यक्ष बन्ने एक मात्र दलित हुन । उनी, तत्कालीन माओवादी केन्द्रका तर्फबाट नेतृत्वमा पुगेका हुन् ।

मधेसी

मधेसी समुदायबाट ५ जनाले जिल्लाको अध्यक्ष पाएका छन् । प्रदेश २ का ८ जिल्लामा मधेसी समुदायबाट ५ जनाले नेतृत्व पाएका छन् । अन्य तीन जिल्लामा एक जना जनजातिबाट अध्यक्ष भएका छन् ।

त्यस्तै, मधेसी समुदायबाट ४ जना सचिव बनेका छन् । ८ जिल्लामा चार जनाले मात्र सचिवको जिम्मेवारी पाएका छन् । एक जना दलित समुदायबाट सचिव बनेका छन् ।

प्रकाशित मिति: मंगलबार, वैशाख १०, २०७६ २३:२१