सकियो हिउँदे अधिवेशन, टुंगिएन राजधानी र नामकरण

A+ A A-

प्रदेशको राजधानी र नामकरणको विषय टंगिनुपर्ने माग राख्दै आएको प्रतिपक्ष दलको विरोध र संसद् अवरुद्ध गर्नेसम्मको तयारीलाई मत्थर पार्दै गत १७ चैतमा सुरु गरिएको हिउँदे अधिवेशन आज १० वैशाखबाट सकिँदै छ ।

संसद्मै सहमति गराउने र सक्दो चाँडो यो विषय टुंग्याइने भनिए पनि अन्ततः सवाल फेरि ओझेलमा परेको छ । प्रदेश ३ सरकारले प्रदेशको स्थायी राजधानी र नामकरण टुंगो नै नलाई १० वैशाखको राति १२ बजेबाट प्रदेश सभाको हिउँदे अधिवेशन अन्त्य हुँदै छ ।

१७ चैतबाट सुरु भएको हिउँदे अधिवेशनमा कुनै पनि हालतमा प्रदेशको नामकरण र राजधानीको विषयले टुंगो पाउने बताइए पनि अन्ततः फेरि यो विषय ओझेलमै परेको छ ।

प्रदेश सभाको हिउँदे अधिवेशन अन्त्यका लागि सरकारले प्रदेश प्रमुख अनुराधा कोइरालासमक्ष बैठकको निर्णयसहित सिफारिसका लागि पत्र पठाएको छ । सोमबार बिहान बसेको मन्त्रिपरिषद्को बैठकले प्रदेश सभाको वर्षे (बजेट) अधिवेशन आगामी ३० वैशाखमा १ बजे बोलाउने निर्णय गरेको छ ।
प्रदेश ३ को हिउँदे अधिवेशनको पहिलो दिन मुख्यमन्त्री डोरमणि पौडेलले हिउँदे अधिवेशनभित्रै प्रदेशको स्थायी राजधानी र नामकरण टुंगो लाग्ने दाबी गर्दै सदन अवरुद्ध हुनबाट रोकेका थिए ।
पौडेले स्थायी राजधानीको विषयमा संसद् र जनतालाई झुक्याउँदै आएकामा उनीप्रति सांसदहरू आक्रोशित छन् ।

स्थायी राजधानी तोक्ने र नामकरण टुंगो लगाउने विषयलाई प्रक्रियामै अघि बढाउने सहमतिअनुरूप पहिलो प्रदेश सभा बैठकमा सभामुख सानुकुमार श्रेष्ठले प्रदेशको स्थायी राजधानी तोक्ने विषयमा प्रक्रियाका लागि समिति बनाई अघि बढ्ने परामर्श समितिले गरेको निर्णय सांसदहरुलाई पढेर सुनाएका थिए ।
स्थायी राजधानी र नामकरणका लागि समिति बनाई कार्यविधि तयार गरेर संसदीय प्रक्रिया अघि बढाउन सभामुख श्रेष्ठलाई अधिकार दिइएको थियो ।
२४ अप्रिलदेखि चिनियाँ राष्ट्रपति सी जिङपिङको विशेष निमन्त्रणामा राष्ट्रपति विद्यादेवी भण्डारीसँगै मुख्यमन्त्री पौडेल पनि चीन भ्रमणमा जाँदै छन् ।