हत्या गरिएकी दलित बालिकाका बाजे भन्छन् : नातिनीले भनेकी थिई, 'बाज्या, मलाई डर लाग्न थाल्यो'

हत्या गरिएकी दलित बालिकाका बाजे भन्छन् : नातिनीले भनेकी थिई, 'बाज्या, मलाई डर लाग्न थाल्यो'

A+ A A-

मेरो नाम गोरख कामी हो । मेरा छोराबुहारी ४ वर्षदेखि भारतमा छन् । छोराबुहारीलाई फोन गरिसकेँ । छिट्टै आउँछौँ भनेका छन् । घरमा म, मेरी श्रीमती र तीन नातिनी थियौँ । बुधबार बेलुका ४ बजे म धुलो पिस्न घट्ट गएको थिएँ । धुलो पिसेर ६ बजेअगाडि म घर पुगेँ । घरमा पुग्दा दुई नातिनी र श्रीमती मात्रै घरमा थिए ।

जेठी नातिनी सीता कामी (नाम परिवर्तन) सधैँ गाईगोरुलाई दानापानी खुवाउन जान्थिन् । घरबाट आधा घण्टा लाग्ने ठाउँमा गाईगोरु बाँध्ने गोठ छ । साँझ ६ बजेसम्म पनि नआएपछि म नातिनी खोज्न निस्किएँ । धेरै खोजेँ । म एक्लोको प्रयासले भेटाउन सकिनँ, त्यसपछि गाउँलेलाई गुहारेँ ।

सबै गाउँलेहरू लागेर खोजी सुरु गर्‍यौँ । खोज्दाखोज्दै राति भइसकेको थियो । राति ८ः३० बजे नातिनी मन्दिरभित्र शरीरको तल्लो भाग नाङ्गाे अवस्थामा मृतक भेटिइन् । शवलाई वल्टाइपल्टाई गरी हेर्‍यौँ । शरीरभरि निलडाम थिए । उनीहरूबीच ठूलो झगडा भएजस्तो देखिन्थ्यो ।

घटनास्थल गोरु बाँध्ने छाना नपुग्दै अगाडि छ । नातिनीको क्षतविक्षत् शव देखिएपछि म होसमा नै थिइनँ । प्रहरी कतिबेला पुगे ? शव कहाँ राखियो ? हामीलाई केही थाहा भएन ।

नातिनीले घटना हुनुभन्दा एक हप्ताअगाडिदेखि ‘बाज्या, मलाई डर लाग्न थाल्यो । मेरा कानका मुन्द्रा निकाली राखिदेऊ । मलाई गाउँकै एक राजेन्द्र बोहरा भन्ने केटाले सुन देऊ भन्दै छ’ भनेर भन्दै आएकी थिई । मैले 'किन डर मान्छ्याै, हामी छौँ नि नातिनी' भनेर सम्झाउँदै आएको थिएँ ।

यो पनि,

मन्दिरभित्र १२ वर्षीया बालिका मृत फेला, बलात्कारपछि हत्याको आशंका

बुधबार नातिनी गोरुलाई घाँस हाल्न जाने बेलामा उसकै घरनजिक बाटोमा बसेको थियो भन्ने मैले गाउँलेबाट सुनेको छु । नातिनी घाँस हाल्न जाने बाटो नै त्योे केटाको घर हुँदै जान्छ । नातिनीको शव राति भेटिएकाले सबै ध्यान त्यतातिर गयो । केटा कता के गर्दै थियो मैले थाहा पाइनँ ।

अहिले उसलाई (राजेन्द्रलाई) पुलिसले समातेर जिल्ला प्रहरी कार्यालय ल्याएको छ । प्रहरीलाई सोध्दा उसले मुख खोलेको छैन । डीएसपी साहेबले चाँडै अपराधी पत्ता लगाउँछौँ भनेर हामीलाई आश्वासन दिनुभएको छ । नातिनीको शव पोष्टमार्टमका लागि जिल्ला अस्पताल ल्याइएको छ । म पनि चैनपुरमै छु ।

(शिलापत्रका बझाङ संवाददाता प्रताप ओलीसँगकाे कुराकानीमा आधारित । केही बेरपछि शिलापत्रमा उनकाे भिडियाे हेर्न सकिनेछ । सं.)

प्रकाशित मिति: शुक्रबार, असोज ९, २०७७ ०१:००