बझाङको सामुदायिक अस्पताल बन्यो भैँसीको थलो

A+ A A-

छबिसपाथिभेरा गाउँपालिका- १ मा रहेको डोब्रा सामुदायिक अस्पताल संरक्षण अभावमा जीर्ण बन्दै गएको छ । आर्थिक वर्ष (आव) २०६६/०६७ करिब ७५ लाख रुपैयाँमा निर्माण भएको उक्त सामुदायिक अस्पतालको संरक्षणमा लगानीकर्ता र स्थानीय तहको ध्यान नपुग्दा जीर्ण बन्दै गएको हो ।

जिल्लाको 'रेफरल' अस्पतालका रूपमा विकास गर्ने लक्ष्य भए पनि कसैले अस्पताल विकासमा ध्यान नदिँदा अस्पताल जीर्ण बन्दै गएको तत्कालीन छबिस ग्रामीण चेतनालय (प्यारेन्ट्स नेपाल) का कार्यकारी सचिव धनबहादुर रावलले बताए ।

जिल्लाकै दोस्रो सुविधा सम्पन्न अस्पतालमा कर्मचारी अभावमा पाँच वर्षदेखि बन्द भएको छ । आफूहरूले जिल्ला र केन्द्रस्तरमा अस्पताल संचालनका लागि पटकपटक पहल गरे पनि कतैबाट वास्ता नगरिएपछि आफूहरूले सहयोगको लागि पहल गर्नै छोडेको उनले बताए ।

अस्पताल बन्द भएपछि छबिस पाथिभेरा र दुर्गाथली गाउँपालिका क्षेत्रका साबिकका आठ गाविसका बासिन्दालाई सामान्य उपचारका लागि सदरमुकाम र बाहिरी जिल्ला धाउनुपर्ने बाध्यता रहेको र आपतकालीन उपचार नपाएर कतिपयले ज्यान गुमाइसकेको उनले बताए ।

अस्पताल बन्द भएपछि झण्डै एक करोडभन्दा बढी मूल्यका संरचना र उपकरणसमेत तोडफोड भएर काम नलाग्ने अवस्थामा पुगेका छन् । साबिकको मटेला गाविसको जिउली गाउँस्थित डोब्रा सामुदायिक अस्पताल बेवारिसे भएपछि भवनका झ्याल ढोकाहरू तोडफोड भएका छन् । अस्पतालभित्र रहेका उपकरणमा पनि क्षति पुगेको छ ।

अस्पतालमा रहेका उपकरण लाखौँ मूल्य पर्ने एक्स-रे मेसिन, जेनेरेटर, बेड, टेबुल, कुर्ची, उपचारका औजार खिया लाग्ने अवस्थामा छन् । बचेको औषधि पनि सडेको छ । कोठाभित्रका फर्निचर र उपकरण धुलाम्मे छन् । झट्ट हेर्दा अस्पताल कवाडी भण्डार जस्तो देखिन्छ । भाडेबगर-जयपृथ्वी नगर सडक खन्दा डोजरले अस्पतालको आगनको डिल ताछेपछि अस्पतालका चार वटामध्ये एउटा भवन चर्किएर भत्किनै लागेको छ भने दुईवटा अरू भवन पनि जोखिममा छन् ।

‘केटाकेटी र गोठालाको खेल्ने ठाउँ भएको छ,' स्थानीय शान्ति रेग्मीले भनिन्, ‘जसले जे गरे पनि कसैलाई मतलब छैन । हुँदाहुँदा घर पनि काम नलाग्ने भइसक्यो ।’ स्थानीयस्तरमा गुणस्तरीय सेवा दिइरहेको अस्पताल हेर्दाहेर्दे खतम भएको उनले बताइन् ।

स्थानीयले गाउँपालिकालाई बुझाए ध्यानाकर्षणपत्र

जापानी राजदूतावास, ग्रामीण विकास सेवा समूह नेपाल र प्यारेन्ट्स नेपालको साझेदारीमा निर्माण भएको १५ शय्याको अस्पताल सञ्चालनमा कसैको ध्यान नपुगेको भन्दै छबिसपाथिभेरा- १, जिब्ली टोलका स्थानीयले ध्यानाकर्षणपत्र गाउँपालिकालाई बुझाएका छन् ।

जिब्ली टोलका प्रतिनिधिले बुधबार गाउँपालिका अध्यक्ष अक्कलबहादुर धामीलाई संरक्षण र सञ्चालनका लागि भन्दै ध्यानाकर्षणपत्र बझाएको हो ।

ध्यानाकर्षणपत्र बुझ्दै अध्यक्ष धामीले आफू सदैव जनताको आधारभूत स्वास्थ्य सेवाप्रति संवेदनशील रहेको र अस्पताल सञ्चालनका लागि विभिन्न चरणमा छलफल भई निष्कर्षमा पुग्न नसकेको भए तापनि हाललाई सो अस्पताललाई कोभिड- १९ अस्पतालको रूपमा सञ्चालन गर्दै सेवा विस्तार गर्न आफू सकारात्मक बताए ।