कालिका मिडियाले भर्चुअलबाट वार्षिकोत्सव मनाउँदै

A+ A A-

चितवनस्थित कालिका एफएमले आफ्नाे १८औं तथा कालिका एचडीको छैटौँ वार्षिकोत्सव महिनाव्यापी कार्यक्रम सञ्चालन गरेर मनाउने भएकाे छ । २६ असाेज २०५९ देखि औपचारिक रूपमा प्रसारणमा आएको कालिका एफएम १८ वर्ष पूरा गरी १९औँ वर्षमा प्रवेश गर्दै छ ।

पूर्वमन्त्रीसमेत रहेका कालिका ग्रुपका अध्यक्ष विक्रम पाण्डेले प्रेस विज्ञप्ति जारी गर्दै यस वर्षका वार्षिकोत्सवका कार्यक्रम सूचना प्रविधिको भरपूर उपयोग गर्दै अनलाइनका माध्यमबाट गर्न लागिएको जानकारी दिए ।

उनका अनुसार कालिका एफएमले यस वर्ष वार्षिकाेत्सवकाे अवसर पारेर ८ असोजमा देवघाटस्थित वृद्धाश्रममा रहेका जेष्ठनागरिकलाई खाना खुवाउने कार्यक्रमको सुरुवात गर्दै छ ।

त्यस्तै, ८ असोजदेखि २५ सम्म फोन, भाइबर कलबाट कालिकाको चौतारीमा कलाकार, स्राेता र दर्शक कार्यक्रम सञ्चालन हुनेछ ।

९ असाेजमा कृषिमा आधुनिकीकरण र अवसर, १० असाेजमा अपांगता भएका व्यक्तिबीचको वादविवाद प्रतियोगिता, १२ असाेजमा वर्तमान अवस्थामा शिक्षाक्षेत्रका चुनौती, समस्या र समाधान विषयक अन्तरक्रिया, १४ असाेजमा बढ्दै गएको एसिड आक्रमण र सरोकारवालाको भूमिका विषयक अन्तरक्रिया कार्यक्रम गरिने भएकाे छ ।

साथै, एसिड आक्रमण रोकथामका लागि आएका सुझाव र छलफलको प्रतिवेदन प्रधानमन्त्री कार्यालयमा पेस गरिने कालिका मिडियाका निर्देशक दीपक पौडेलले जानकारी दिए ।

१६ असाेजमा कालिकासँगका यादहरू, १७ असाेजमा अन्तर्राष्ट्रिय साहित्यिक सम्मेलन, १९ असाेजमा कोभिड–१९ र स्वास्थ्यकर्मीको अनुभव तथा बृहत् अन्तरक्रिया, २१ असाेजमा अन्तरविद्यालय वक्तृत्वकला प्रतियोगिता, २४ असाेजमा लोकगीत गायन प्रतियोगिता हुनेछ ।

राष्ट्रिय पञ्चेबाजा तथा गन्धर्व बाजा प्रतियोगिता, राष्ट्रिय लाकदोहोरी महोत्सव, कालिका म्युजिक अवार्डलगायतका विगतका वार्षिकोत्सवमा गरिँदै आएका कार्यक्रमलाई सहज परिस्थिति बनेपछि निरन्तरता दिइने निर्देशक पौडेलले बताए ।