मुख्यमन्त्रीविरुद्ध मोर्चाबन्दी : झन् सकसमा उपेन्द्र यादव

A+ A A-

नेकपाले नेतृत्व गरेको संघीय सरकारमा मन्त्री हेरफेरको प्रसङ्ग उत्कर्षमा छ । संघीय सरकार हेरफेर भएलगत्तै प्रदेश सरकारका मुख्यमन्त्री र मन्त्रीको हेरफेर पनि हुनेछ । त्यसले नेकपा नेतृत्वका प्रदेश सरकारमा जति हलचल पैदा भएको छ, यही अनुपातको कम्पन प्रदेश २ मा पनि छ । प्रदेश २ मा जनता समाजवादी पार्टीको सरकार छ ।

पाँच महिनाअघि पार्टी एकता गरेका राजपा र संघीय समाजवादी पार्टीले प्रदेश २ को संसदीय दल मात्र होइन, संघीय संसदमा पनि एकता टुंगो लगाएका छैनन् । प्रदेश २ को मुख्यमन्त्री बन्ने दौडमा दर्जनजति नेता सक्रिय भएपछि प्रदेशको संसदीय दल एकता प्रक्रियाले गति लिन नसकेको जसपाका नेताहरू बताउँछन् ।

हुन पनि प्रदेश २ का मुख्यमन्त्री लालबाबु राउतविरुद्ध प्रदेश सांसद मोर्चाबन्दीमा लागेका छन् । राष्ट्रिय जनता पार्टी र संघीय समाजवादी पार्टीबीच एकतालगत्तै माेर्चाबन्दी सुरु भएको हो ।

मुख्यमन्त्री फेर्ने उद्देश्यकै लागि प्रदेश २ मा संसदीय दलको नेता चयनको प्रयास भइरहेको छ । तर, जनता समाजवादी पार्टीको केन्द्रीय समिति र संघीय परिषद् गठन प्रक्रिया नै समस्यामा परेका कारण प्रदेश २ मा संसदीय दलको नेता छनाेट हुन नसकेको हो ।

दर्जन दाबेदार, सकसमा उपेन्द्र

संसदीय दलको नेता नै मुख्यमन्त्री हुने भएकाले यस पदका लागि दर्जनजति नेताले दाबी गर्दै आएका छन् । जसले गर्दा नेता छनाेटको प्रक्रिया अगाडि बढाउन झन् समस्या छ ।

मुख्यमन्त्री राउतले सकेसम्म निरन्तरता चाहेका छन् । तर, उनको साथमा रहेका नेताहरू नै अहिले बाउँठिएपछि राउत अप्ठ्याराेमा छन् । अध्यक्ष उपेन्द्र यादवकाे साथ पाए मात्रै राउतले निरन्तरता पाउने कुरा सम्भव हुन्छ ।

जसपाका एक नेताका अनुसार संसदीय दलको नेताका लागि हिजो राउतसँग नजिक भएर काम गरेका पूर्वराजपाका नेता तथा भौतिक पूर्वाधारमन्त्री जीतेन्द्र सोनल मात्र होइन, विगतमा संघीय समाजवादी पार्टीबाट आन्तरिक मामिला मन्त्रीसमेत रहेका ज्ञानेन्द्र यादवसम्म दाबेदार छन् ।

मनीष सुमन, विजय यादव, कौशल सिंह, उपेन्द्र महतोलगायतका नेता पनि संसदीय दलको नेतामा दाबी गरिरहेका छन् । उनीहरू काठमाडौंमा आएर शीर्ष नेताहरूसँग निरन्तर भेट पनि गरिरहेका छन् ।

एकतापछि आफ्नो समूहले मुख्यमन्त्री पाउनुपर्ने दाबी राजपा पक्षले गरेको छ । मुख्यमन्त्री राउत सरकार सञ्चालनमा असफल भएको दाबी गर्दै राजपा समूहले विकल्पको खोजी गरे पनि उपेन्द्र यादवले राउतको विकल्प खोजिसकेका छैनन् ।

यादव सकेसम्म अहिलेको सरकारलाई नै कायम राख्ने मनस्थितिमा छन् । विकल्प नै खोज्नुपर्ने अवस्था सरकारको पुरै सेटको विकल्पमा अध्यक्ष यादव देखिएका जसपा स्रोतको दाबी छ । तर, त्यो अवस्थामा पनि उनी आफ्नो पूर्वसमूहकै नेतालाई मुख्यमन्त्री बनाउनुपर्ने अडानमा छन् ।

तर, केन्द्रीय समितिको टुंगो लागेपछि मात्रै प्रदेश समिति र सरकारबारे छलफल गर्ने भनेर जसपाले औपचारिक छलफल भने गरेको छैन । आन्तरिक छलफल र दौडधुप भने थप बढेकाे देखिन्छ ।

काठमाडौंमा घरदैलो

मुख्यमन्त्री फेर्ने अभियान प्रदेश २ मा निकै पहिलादेखि सुरु भएको हो । त्यसैको निरन्तरता थियो- १५ साउनदेखि २१ गतेसम्म प्रदेश सांसदको काठमाडौं दौडधुप । पार्टी एकताको प्रमाणपत्र निर्वाचन आयोगले दिएलगत्तै दुई दर्जन प्रदेश सांसद काठमाडौं आएर नेताहरूलाई भेटेका थिए ।

उनीहरूको प्रष्ट भनाइ थियो कि मुख्यमन्त्री लालबाबु राउतको विकल्प खोज्नुपर्छ । जसपा स्रोतका अनुसार त्यसरी काठमाडौंमा आएर नेताहरूको घरदैलो गर्नेमा कौशल सिंह, मनीष सुमन, अशोक यादव, विक्की यादव, बाबुलाल साह, उपेन्द्र महतोलगायत दुई दर्जन नेता हुन् ।

प्रकाशित मिति: मंगलबार, असोज ६, २०७७ २१:५४