एनसेलले कर निर्धारणविरुद्ध सर्वोच्चमा मुद्दा हाल्यो

A+ A A-

निजी क्षेत्रको दूरसञ्चार सेवाप्रदायक एनसेलले ठूला करदाता कार्यालयले गरेको कर निर्धारणविरुद्ध सर्वोच्चमा रिट हालेको छ । सोमबार सर्वोच्चमा एनसेलले दायर गरेको रिटमा ठूला करदाता कार्यालयले आफूलाई पुँजीगत लाभ कर तिराउन खोज्नु गैरकानुनी भएको दाबी गरिएको छ ।

कार्यालयले ३ वैशाखमा मा सातदिने म्याद दिएर एनसेललाई कर बुझाउन भनेको थियो । कार्यालयले दिएको उक्त म्याद सकिनुभन्दा एक दिनअगाडि एनसेल सर्वोच्च गएको हो । एनसेलले तिर्नुपर्ने बाँकी पुँजीगत लाभकर ३९ अर्ब ६ करोड ६ लाख ८४ हजार ८ सय १५ रूपैयाँ निर्धारण गरिएको छ ।

सर्वोच्चले गत २३ माघमा एनसेल बिक्रीको पुँजीगत लाभकर एक्जियटा र एनसेलबाटै असुल्नुपर्ने आदेश दिएको थियो ।

आदेश अगाडिसम्म पुँजीगत लाभकर टेलियासोनेरा कम्पनीकै नाममा निर्धारण गरिएको थियो ।

सर्वोच्चले गत २३ माघमा फैसलाको पूर्ण पाठ गत साता दिँदै तीन महिनाभित्र एनसेलबाट पुँजीगत लाभकर उठाउन भनेपछि ठूला कर दाता कार्यालयले कर निर्धारण गरेको थियो ।

उक्त फैसलाअनुसार ठूला करदाता कार्यालयले टेलियासोनेराले एक्जियटालाई बेच्दा १ खर्ब ४३ अर्ब ६५ करोड ३७ लाख ६ हजार पुँजीगत लाभ भएको थियो । त्यसको कर ६० अर्ब ७१ करोड २४ लाख ९६ हजार ९७ रूपैयाँ निर्धारण भएको थियो । त्यसमध्ये एनसेलले २१ अर्ब ५४ करोड ८० लाख ५५ हजार ९ सय रूपैयाँ अग्रिम रूपमा तिरिसकेको थियो । यसैगरी, विलम्ब शुल्कबापत् २ अर्ब २६ करोड २३ लाख ४ हजार ८ सय ५१ रूपैयाँ पनि एनसेलले तिरेको थियो ।

प्रकाशित मिति: सोमबार, वैशाख ९, २०७६ २३:०२