बाँझो जमिनमा भविष्य खोज्दै डडेल्धुराका युवा, टहरा बनाएर आलु खेती

A+ A A-

डडेल्धुराको गन्यापधुरा गाउँपालिकाको बन्तोलीमा करिब २ सय रोपनी जमिन बाँझो छ । घना जंगलको बीचमा रहेको यो जमिनमा २०३२ यता यहाँ खेतीपाती गरिएको छैन ।

बाजेका दिनमा जंगलमा भैँसी पालेर यो ठाउँमा खेतीपाती हुन्थ्यो । तर, ४५ वर्ष यता उक्त स्थानमा खेतीपाती भएको छैन । यहाँका युवाहरू भारत गएकै कारण गाउँमा खेतीपाती गर्ने कोही नभए र खेत बाँझो रहेको बुढापाका बताउँछन् । तर, पछिल्लो समयमा करिब ५ दशकदेखि बाँझो रहेको जमिनमा गन्यापधुराका युवाले आलु खेती गर्न सुरु गरेका छन् ।

गन्यापधुरा गाउँपालिका- ४ रूमाईलका युवाहरू मिली आलु खेती गर्न जुटेका हुन् । रूमाईल गाउँका ८ परिवारको उक्त जमिनमा कोरोना कहरका कारण नेपाल फर्किएका युवा मिलेर सामूहिक रूपमा आलु खेती गर्न जुटेका छन् ।

बाँझो जमिनमा आलु खेती गर्दै युवाले गाउँमै आयआर्जनका स्रोत खोजी आफ्नो भविष्य खोजी रहेका हुन् । जमिन दर्ता रहेका परिवारका युवाहरू नै मिलेर आलु खेती गर्न लागेका हुन् । अहिले करिब एक सय ५ रोपनी बढी जमिनमा आलु लगाइँदै छ ।

कोरोना भाइरसको संक्रमणका कारण अहिले अधिकांश युवा गाउँघर फर्किएका छन् । भारतका विभिन्न ठाउँमा काम गर्ने युवा घर फर्किएपछि अहिले सबै बेरोजगार बनेका छन् । गाउँमै रोजगारी सिर्जना गर्न बाँझो जमिनमा आलुखेती थाले उनीहरू बताउँछन् ।

आलुखेती खेती गर्न गाउँपालिकाले प्राविधिक सहयोग गरिरहेको छ । आलु उत्पादनमा सहयोग पुगोस् भनेर ६ जना कृषि प्राविधिको समुह खटाइएको गाउँपालिकाले जनाएको छ । युवाहरूले सामूहिक रूपमा आलु खेती थालेकोले गाउँपालिका र वडाको पूर्ण रूपमा साथ सहयोग रहने गाउँपालिका- ४ का वडाअध्यक्ष चेतराज भट्टले बताए ।

गत १७ भदौदेखि बाँझो जमिन खन्ने कामको सुरुवात गरिएको छ । दैनिक करिब ७०/८० जनाको संख्यामा स्थानीयलाई काममा लगाई बाँझो जमिन खनिएको छ । पहिलोपटक खन्ने काम सकिएको छ । अहिले बारीमा हाते ट्याक्टर पनि पुर्‍याएकाे गाउँपालिका अध्यक्ष नवल मल्लले बताए । उनले चिसो भेग भएकाले समयमै आलु लगाई सक्नुपर्ने बताए ।

कोरोना संक्रमण फैलिएपछि घर आएका स्थानीय जयराज भट्ट पनि आयस्रोत केही नभएपछि आलु खेतीमा लागेका छन् ।

‘बाजेले कमाई खाने जमिन बाँझो थियो । सिँचाईको पनि व्यवस्था गर्न सहज छ । गाउँघरमै आयआर्जनका स्रोत खोज्न आलु खेतीमा जुटेका छौँ,’ उनले भने, ‘बाँझो जमिनमा अहिले लगानी मात्रै लाग्ने भए पनि भविष्यमा आमदानीको स्रोत बन्न सक्छ ।’

बन्तोलामा घर नभएकाले युवाहरू टहरा बनाई आलु खेती गर्न सुरुवात गरिरहेका छन् । स्थानीय सरकारलगायत सारेकारवाला निकायको सहयोग आवश्यक रहेको अर्का स्थानीय देवराज भट्टले बताए ।

जंगलमा खेती सुरु गरिएकाले पहिलो वर्ष उत्पादन नहुने उनको भनाइ छ । एकातिर उत्पादन कम हुने र अर्कातिर जंगली जनावरबाट बचाउनुपर्ने चुनौती छ ।

स्थानीय सरकार, कृषि ज्ञान केन्द्रलगायत कृषि पशुपालनका क्षेत्रमा काम गर्ने संघ संस्थाको सहयोग र हौसला आवश्यक रहेको उनले बताए । भट्टले आलु खेतीसँगै भैँसी र बाख्रापालन पनि गरिने बताए ।

प्रकाशित मिति: आइतबार, असोज ४, २०७७ १८:३६