भीमदत्त राजमार्गको स्तरोन्नति गरिँदै

A+ A A-

सुदूरपश्चिमका ७ पहाडी जिल्लालाई तराईका २ जिल्लासँग जोड्ने भीमदत्त राजमार्गका विभिन्न क्षेत्रमा सडक स्तरोन्नतिको काम भइरहेको छ । राजमार्गमा सवारी दुर्घटना बढ्न थालेपछि दुर्घटना न्यूनीकरण गर्नका लागि सडकको स्तरोन्नति थालिएको हो ।

भीमदत्त राजमार्गको हगुल्टेलेकदेखि डडेल्धुरा सदरमुकामसम्म सडकको मोड सुधार गरी स्तरोन्नतिको काम भइरहेको छ । साहुखर्कदेखि डडेल्धुरा बागबजारसम्मको करीब ३० किलोमिटरको सडकको मोड सुधारका लागि सडकलाई ३ भागमा विभाजन गरेर टेण्डर आह्वान गरेर काम सुरु गरिएको सडक डिभिजन कार्यालय कुलपाते डोटीका इन्जिनियर वीरेन्द्र चन्दले जानकारी दिए ।

संघीय सरकारको करीब ३ करोड रुपैयाँको लागतमा भीमदत्त राजमार्गको स्तरोन्नतितर्फ मोडहरू सुधार तथा सदरमुकाम बसपार्कनजिक ग्याभिङवाल लगाउने काम भइरहेको चन्दले बताए । अहिले मोड सुधारको काम भइरहेको र दोस्रो टेण्डर आह्वान गरेर सडक नाली र कालोपत्रे गर्ने काम अगाडि बढाइने उनको भनाइ छ ।

सडक साघुँरो हुनुका साथै विपरीत दिशाबाट आउने यातायातका सवारी साधन अग्ला घुम्तिले नदेखिदा बर्सेनि दर्जनौँ दुर्घटनाका घटना हुने गरेको विभिन्न सवारी साधनका चालकको भनाइ छ । भीमदत्त राजगर्मागलगायत सुदूरपश्चिमका अन्य राजमार्गमा आर्थिक वर्ष २०७४/७५ देखि २०७६/७७ सम्म ९२१ वटा सवारी साधन दुर्घटना भएका छन् ।

ती दुर्घटनामा परी ५ सय ३२ जनाले ज्यान गुमाएको सुदूरपश्चिम प्रदेश ट्राफिक कार्यालय अत्तरियाका सूचना अधिकारी प्रहरी निरीक्षक मोहन साउँदले जानकारी दिए । २०७४ देखि ०७७ सम्म सवारी दुर्घटनाबाट ५ सय ७४ जना गम्भीर तथा ५ सय ९३ जना सामान्य घाइते भएको समेत प्रदेश ट्राफिक कार्यालय अत्तरियाले जनाएको छ ।

साँघुरा सडक, क्षमताभन्दा बढी यात्रु बोक्ने, लाइसेन्सबिना नै सवारी साधन चलाउने जस्ता गतिविधिले पनि सुदूरपश्चिममा सवारी दुर्घटना बढ्दै गएको जनाइएको छ । पहाडी जिल्लामा साघुँरा एवं गुणस्तरहीन सडक निर्माण गरिँदा दुर्घटनाको जोखिम बढेको ट्राफिक प्रहरीको भनाइ छ । सवारी दुर्घटना बढ्नुको मुख्य कारण सडकको दुरवस्था, सवारीसाधनको चाप र चालकको लापरबाही रहेको जनाइएको छ ।

तराई र पहाडी जिल्लाहरुलाई जोड्ने मुख्य राजमार्ग नै भीमदत्त राजमार्ग रहेकोले दैनिक सयौँको संख्यामा मालबाहक ट्रक तथा अन्य साना ठूला सवारी साधनहरु संचालन हुने गरेका छन् ।

प्रकाशित मिति: आइतबार, असोज ४, २०७७ ०२:३२