उडानमा अन्याेल : शतप्रतिशत यात्रु बोक्न पाउनुपर्ने अडान कायमै

A+ A A-

लामो समयदेखि हवाई सेवा खुलाउनुपर्छ भन्दै पटकपटक सरकारलाई दबाब दिँदै आन्दोलनमा उत्रिने चेतावनी दिएका हवाई सञ्चालकहरू सरकारले उडान अनुमति दिएसँगै बार्गेनिङमा उत्रिएका छन् ।

सरकारले सम्पूर्ण मापदण्ड पूरा गरेर १ असोजदेखि सञ्चालन गर्न अनुमति दिएको थियो । तथापि मापदण्डअनुसार नै सञ्चालन गर्न पाउनुपर्ने माग गर्दै आएका वायु सेवा सञ्चालकहरू पुन: अर्को मागसहित उडान नचलाउने निर्णयमा पुगेका छन् ।

वायु सेवा सञ्चालक संघले विज्ञप्ति नै जारी गरेर शतप्रतिशत यात्रु बोक्न पाउनुपर्ने माग राख्दै सञ्चालन नगर्ने निर्णय गरेको छ । सरकारले ५० प्रतिशत मात्रै यात्रु बोक्न पाउने निर्णय गरेपछि विरोधमा उत्रिएका हवाई सञ्चालकहरू सञ्चालन खर्चसमेत नआउने भएकाले शतप्रतिशत नै यात्रु बोक्न पाउनुपर्ने माग गर्दै आएका छन् ।

संघका प्रवक्ता योगेन्द्रराज कँडेलले मागप्रति सरकारले अझै कुनै प्रतिक्रिया नदिएको हुनाले उडान गर्ने नगर्ने अन्याेलमा नै रहेको बताए ।

कडेँल हवाई उडानमा कम्तीमा पनि ७५ प्रतिशत यात्रु नभई उडान खर्चसमेत नआउने बताउँछन् । उनले भने, ‘छ महिनासम्म ठप्प रहँदा वायुसेवा थलिएका छन्, अझ ७५ प्रतिशत यात्रु भए पनि बल्ल उडानको खर्च उठाउन सकिन्छ । बाँकी २५ प्रतिशत मात्रै हो हामीले पाउने नाफा । अब सरकारले खर्च पनि नउठ्ने गरी उडान सुरु गर भनेपछि आफ्नै खुट्टामा बञ्चरो किन हान्ने हामी व्यवसायीले ?

पहाडी र हिमाली क्षेत्रमा मात्रै हवाई उडान सञ्चालन गर्दा अन्य समयको भन्दा यात्रु अवश्य घट्ने हुँदा पहाडी र हिमाली क्षेत्रबाटै सञ्चालन खर्च उठाउन हम्मेहम्मे पर्छ । अझ अधा मात्रै यात्रु बोक्दा थप घाटामा जाने भन्दै सरकारको निर्णय कदापि मान्य नहुने संघको अडान छ ।

यद्यपि संघले निर्णय सच्याउन पयर्टन मन्त्रालयलाई आग्रह गरेको छ भने आइतबारसम्म सरकारी निर्णय आउने कँडेल बताउँछन् ।

संंघले अन्तर्राष्ट्रिय परिवेशमा हवाईउडान शतप्रतिशत नै भइरहेको भन्दै सरकारले भने नेपाल वायु सेवालाई थप धराशयी बनाउन भ्रामक निर्णय गरेको बताउँदै आएको छ ।

संघका अध्यक्ष रामेश्वर थापा पनि सरकारीले सञ्चालन अनुमति दिएपछिको खुसी ५० प्रतिशतले खोसेको बताए ।

उनल भने, ‘सरकारले जतिसुकै निर्णय गरे पनि सञ्चालन खर्च नै नआउने भएपछि उडान ठप्प नै राख्छौँ । सरकारले व्यवसायीको मर्म नबुझ्ने भएपछि हामी किन घाटामा चल्ने ?’

संघले विश्व स्वास्थ्य संगठनको सम्पूर्ण मापदण्ड पूरा गरेर सञ्चालन गर्ने बताएको छ । जबकि संगठनले सामाजिक दूरी कायम राख्नुपर्नेलाई कुरालाई प्रमुख मान्दै आएको छ । यता हवाई व्यवसायीहरू भने सामाजिक दूरी कायम गर्न नसके पनि चार तहमा कन्ट्याक्ट ट्रेसिङ, स्यानिटाइजर मास्क उपलब्ध गराएर सञ्चालन गर्दा संक्रमणको कुनै खतरा नुहने दाबी गर्दै आएका छन् ।

स्क्रिनिङका आधारमा संक्रमित छन् छैनन् भन्नु गलत : चिकित्सक

यात्रुको तापक्रम स्क्रिनिङ गरेकै अधारमा कोरोना संक्रमित जहाजमा छिर्न नसक्ने संघको तर्क भने तथ्यहीन देखिएको छ । जबकि पीसीआर टेस्ट गरेर त्यसको नतिजा आउनसमेत २४ घण्टा लाग्ने अवस्थामा तापक्रम स्क्रिनिङका आधारमा संक्रमित छ छैन भन्नु गलत हुने चिकित्सकहरूकाे दाबी छ ।

शुक्रराज ट्रपिकल तथा सरुवा रोग अस्पताल टेकुका रिर्सच युनिट प्रमुख डा. शेरबहादुर पुन पीसीआरबिना जुनसुकै उपाय अपनाएर पनि संक्रमित हुन् होइनन् छुट्याउने कुरा गलत भएको बताउँछन् ।

सरकारको निर्णय अमान्य भएको भन्दै निजी हवाई सञ्चालकहरूको संगठन वायुसेवा सञ्चालक संघले चार तहमा कन्ट्याक ट्रेसिङ गर्ने, थर्मल गनबाट तापक्रम नापेर मात्रै विमानमा छिर्न दिने हुनाले संक्रमित विमानभित्र जान नसक्ने दाबी गर्दै आएको छ । यद्यपि चिकित्सक भने यो दाबी सरासर गलत भएको बताउँछन् । योसँगै सामाजिक दूरी कायम नगर्दा संक्रमण जोखिम बढेर जाने डा. पुन को भनाइ छ ।

उनी भन्छन्, ‘सँगै बसेपछि एकअर्काको सम्पर्कमा धेरै व्यक्ति एकै पटक आउने हुँदा झन् संक्रमण बढ्ने सम्भावना हुन्छ ।’

भौतिक दूरी कायम गरेर सिट लहरमा एक जना मात्र यात्रु राख्न पाइने, यात्रुले मास्क अनिवार्य लगाउनुपर्ने, विमान चढ्दा र ओर्लंदा ढोकामा स्यानिटाइजर राख्नुपर्ने, विमानचालक दलका अन्य सदस्यहरूले मास्क, भाइजर, पन्जा अनिवार्य लगाउनुपर्ने मापदण्डमा उल्लेख छ । जसमा भौतिक दूरीमा भने वायुसेवा सञ्चालकको विमति रहँदै आएको छ ।

अब के हुन्छ ?

आइतबार बस्ने मन्त्रिपरिषद बैठकले आफ्ना माग पूरा नगरे दसैँतिहार नभनी वायुसेवा ठप्प पारेरै बस्ने वायुसेवा सञ्चालकहरूको निर्णय छ । संघका प्रवक्ता कँडेलले सरकारले कि अनुदानको व्यवस्था गर्नुपर्छ, कि त शतप्रतिशत यात्रु बाेक्न अनुमति दिनुपर्छ । अनि मात्र हवाई सेवा सञ्चालन हुने बताए ।

सरकारले प्रतिव्यक्ति यात्रुबाट ५० प्रतिशतसम्म भाडा बढाउने छुट दिए पनि त्यो मान्य नहुने संघले बताएको छ । यातायातमा जस्तो थोरै भाडा नहुने हुँदा भाडा थप गर्दा यात्रुले भाडा धान्न नसक्ने भन्दै भाडा बढाउनु गलत भएको बताउँदै आएको छ ।

प्रकाशित मिति: शुक्रबार, असोज २, २०७७ २१:१२