सीडीएसको सर्भरमा समस्या : क्लोज आउट बढ्न सक्ने

A+ A A-

आज दिनभर जस्तै केन्द्रीय निक्षेपक अर्थात् सीडीएस (सेन्ट्रल डिपोजिटरी)को वेब खुलेन । मेरो सेयर खोल्दा ‘502 Bad Gateway nginx/1.12.2’ भन्ने सन्देश देखारहेको छ । यसो हुनुको कारण सम्बन्धमा केही नबताइए पनि ५ वैशाखदेखि एकैपटक चारवटा कम्पनीको साधारण सेयरमा आवेदन खुलेको हुँदा आवेदकको चाप बढेपछि सर्भरले भार थाम्न नसेको अनुमान गरिएको छ ।

यसका अतिरिक्त दुई कम्पनीको हकप्रद, एक कम्पनीको ऋणपत्र र युनियन हाइड्रोपावरको साधारण सेयरसमेत खुलिरहेको छ । एकैपटक ८ वटा कम्पनीको सेयर खुलेको हुँदा आवेदक पनि स्वाभाविक रुपमा बढेको अनुमान गर्न सकिन्छ । आजसम्म चारवटा कम्पनीको मात्र साधारण सेयर खुलिरहेकामा भोलिदेखि अर्को एक कम्पनीको पनि साधारण सेयरमा आवेदन खुल्दै छ । भोलिबाट अझ जटिल हुने हो कि भन्ने गुनासो आमलगानीकर्ताबाट आइरहेको सन्दर्भमा कम्पनीहरुले सीडीएससँग सहकार्य गरी आवेदन खुला गर्नुपर्ने लगानीकर्ताले बताए ।

लगानीकर्ताको गुनासो भने रसुवागढी र सान्जेनमाथि बढी परेको देखिन्छ । यी दुई कम्पनीमा स्वाभाविक रुपमा बढी अपेक्षा र चाप परेको अनुमान गर्न सकिन्छ । यी दुई कम्पनीले एकैसाथ आवेदन माग गर्नुको सट्टा एउटाको आवेदन बन्द भएपछि अर्को कम्पनीको खुला गर्नुपर्ने व्यवस्था मिलाउन कम्पनी स्वयं किन लागेनन् र सीडीएसले पनि किन पहल गरेन भन्ने रहेको छ । स्मरण रहोस्, यी दुई कम्पनीले अगिल्लोपटक आरक्षित सेयर आवेदन माग गर्दा पनि एकैपटक मागेका थिए ।

त्यस्तै, लगानीकर्ताले बिक्री भएको सेयर ‘मेरो सेयर’ को ईडीआईएसमार्फत ट्रान्सफर गर्न सीडीएसको वेवसाइट खोल्ने हुँदा यसमा दबाब परेको हुन सक्छ ।

क्लोज आउटको जिम्मेवारी

आज सेटलमेन्ट मिति तोकिएका ग्राहकको सर्भरमा आएको समस्याको कारण रोकिएको भए त्यसको जिम्मेवारी कसले लिने भन्ने अर्को प्रश्न उठेको छ । निकै वाहवाह पाइरहेको सीडीएसले सर्भरको क्षमता वृद्धि गर्नेलगायतको समस्याको समाधान कहिले गर्ला भन्ने पनि आम चासो बढेको छ । कहिले कारोबार बढ्दा नेपाल स्टक एक्सचेन्जको सर्भरमा समस्या कहिले आवेदनकर्ता बढी हुँदा सीडीएसको सर्भरमा समस्या आइरहने हो भने सेयर कारोबारमा समस्याले कहिल्यै नछाड्ने देखिन्छ । हाल आवेदन खुलिरहेका कम्पनीको सूची निम्न रहेका छन् ।

कम्पनी	अवधि	प्रकार
नबिल ब्यालेन्स फन्ड– २	वैशाख ५ गतेदेखि ९ गतेसम्म	म्युचुअल फन्ड
सान्जेन विद्युत् कम्पनी	वैशाख ६ गतेदेखि १० गतेसम्म	प्राथमिक
रसुवागढी हाइड्रोपावर	वैशाख ६ गतेदेखि १० गतेसम्म	प्राथमिक
नेपाल एग्रो लघुवित्त	वैशाख ८ गतेदेखि ११ गतेसम्म	प्राथमिक
गणपति लघुवित्त	वैशाख ९ गतेदेखि १२ गतेसम्म	प्राथमिक
युनियन हाइड्रोपावर	वैशाख १२ गतेसम्म	प्राथमिक
सनराइज बैंक (१० प्रतिशत)	वैशाख १९ गतेसम्म	ऋणपत्र
एसियन लाइफ इन्स्योरेन्स	वैशाख २९ गतेसम्म	हकप्रद (१०:६)
गुराँस लाइफ इन्स्योरेन्स	जेठ १ गतेसम्म	हकप्रद (२:१)