भागबण्डा नमिल्दा ५ महिनामा पनि बनेन जसपा केन्द्रीय समिति

A+ A A-

वैकल्पिक राजनीतिक धार निर्माणको अभियानमा रहेका दाबी गर्ने जनता समाजवादी पार्टी (जसपा) ले एकताको पाँच महिनासम्म पनि केन्द्रीय समिति टुंगो लगाउन सकेको छैन । नेताहरूको पदीय व्यवस्थापन र आन्तरिक किचलोमा फस्दा समस्या गहिरिँदै गएको छ ।

१० वैशाखमा राष्ट्रिय जनता पार्टी (राजपा) र संघीय समाजवादी पार्टीबीच एकता भएको थियो । उनीहरूले ११ वैशाखमै निर्वाचन आयोग र संसद सचिवालयमा एकताको निवेदन दर्ता गराइसकेका थिए । त्यसै आधारमा टुंगो लाग्नुपर्ने केन्द्रीय समिति, संघीय परिषद्को संख्या त बल्लतल्ल टुंगो लगाएको छ तर नाम टुंगो लगाउन खुबै सकस परेको देखिन्छ । खासगरी, पूर्वराजपा समूहमा गुट धेरै भएका कारण त्यसले झनै समस्या निम्त्याएको नेताहरू बताउँछन् ।

पूर्वराजपामा मारामार

२१ साउनदेखि २४ गतेसम्म बसेको केन्द्रीय कार्यकारिणी समितिको बैठकले केन्द्रीय कार्यसमिति र कार्यविभाजन टुंगो लगाउने म्याण्डेट महन्थ ठाकुर, उपेन्द्र यादव, बाबुराम भट्टराई, राजेन्द्र महतो र अशोक राईलाई दिएको थियो । पाँच नेताको समूहले डेढ महिना बित्दासम्म पनि नाम टुंगो लगाउन सकेन । खासगरी, पूर्वराजपाभित्रको लफडाले समस्या आएको एक नेता बताउँछन । उनका अनुसार, राजपाभित्र ६ गुटको व्यवस्थापन जटिल बनेकाे छ ।

राजकिशोर यादव र अनिल झा समूहले केन्द्रीय समितिमा संख्या धेरै माग्दा नेताको नाम पनि तय गर्न सकेका छैनन् । राजपाको छवटै गुटलाई समानुपातिक संख्यामा केन्द्रीय सदस्य भागबण्डा भइसकेको छ । त्यसैअनुसार महन्थ ठाकुर, राजेन्द्र महतो र शरतसिंह भण्डारी समूहले संख्या र नाम टुंगो लगाइसकेको छ । तर, महेन्द्र राय यादव, अनिल झा र राजकिशोर यादवले लफडा निकालिरहेको पूर्वराजपाका एक नेताको टिप्पणी छ ।

जसपाको ५१ जना केन्द्रीय कार्यकारिणी समितिमा राजपाबाट २६ जना छन् । त्यसमा महन्थ ठाकुर र राजेन्द्र महतो समूहबाट ८/८ जना, शरतसिंह भण्डारी र महेन्द्र राय यादव समूहबाट ३/३ जना, अनिल झा र राजकिशोर यादव समूहबाट दुई/दुई जना छन् । महन्थ ठाकुरले त्यही अनुपातमा केन्द्रीय सदस्यको संख्यामा भागबण्डा गरेर पूर्वसमूहलाई संख्या तोकेको पूर्वराजपा स्रोतले बताएको छ ।

त्यसो हुँदा ३ सय ५० जनामा अनिल झा र राजकिशोर यादव समूहबाट २७/२७ जना, शरतसिंह भण्डारी र महेन्द्र राय यादव समूहबाट ४०/४० जना, महन्थ ठाकुर र राजेन्द्र महताे समूहबाट १०७/१०७ जना हुन्छ । तर, ठाकुर र महताे समूहले आफ्नो संख्याबाट घटाएर पूर्वराजपामा एकता गर्ने ती साना समूहलाई मात्र होइन, अन्य गुटलाई पनि संख्या थप गरिदिएका छन् ।

पूर्वराजपाका एक सदस्यका अनुसार, तत्कालीन जनमुक्ति पार्टी, जनशक्ति पार्टी र खम्बुवान् मुक्ति मोर्चाका लागि १२ जनाको कोटा छुट्याएका छन् भने अनिल झा र राजकिशोर यादवलाई २७ बाट बढाएर ३० बनाइदिएका छन् । शरतसिंह भण्डारी र महेन्द्र राय यादवको समूहलाई ४० बाट बढाएर ४४ पुर्‍याइदिएका छन् । आफ्नो १ सय ७ बाट घटाएर ९५ मा झारेका छन् ।

त्यही संख्याका आधारमा महन्थ ठाकुर, राजेन्द्र महतो र शरतसिंह भण्डारीको समूहले नाम टुंगो लगाइसकेको छ । र, ती नाम अहिले महन्थको हातमा पुगिसकेको छ । तर, अनिल झा, महेन्द्र यादव र राजकिशोर यादवले नाम बुझाउन परको कुरा संख्या अझै चित्त बुझाएका छैनन् ।

असन्तुष्ट पक्षले एकातिर संख्या थप माग्ने तर अर्कातिर अर्को पक्षका नेताहरूको नाम पनि आफ्नो समूहबाट पठाउने गरेको आरोप लागेको छ । पूर्वराजपाका एक नेताको भनाइमा अनिल झा, राजकिशोर यादव, महेन्द्र राय यादव समूहले आफ्नो पुरानो केन्द्रीय समितिभन्दा बाहिरका व्यक्तिलाई ल्याउन खोजेका छन् । जसले गर्दा पूर्वराजपामा समस्या आएको ती नेताको भनाइ छ । २९ भदौमा पूर्वराजपा समूहको बैठक बसेको थियो । त्यस दिनको बैठकमा त्यही समस्या देखिएको थियो ।

पूर्वराजपाका एक पदाधिकारी भन्छन्, 'उहाँहरूमा एकातिर सख्या थप माग्ने, अर्कातिर केन्द्रीय समिति बाहिरबाट मान्छे खोज्ने दोहोरो चरित्र देखिएको छ ।' त्यसरी टिप्न खोजिएका व्यक्ति पनि कोही उपेन्द्र यादवनिकटका र केही अन्य समूहमा रहेको ती नेताको दाबी छ ।

२९ भदौको बैठकमा पनि कुरा नमिल्नुमा त्यही कारण रहेको बताइएको छ । त्यस दिन आफूहरू नाम नदिने र जुन दिन बैठक हुन्छ, त्यही दिन नामावली प्रस्तुत गर्ने भन्दै असन्तुष्ट पक्ष निस्केको थियो । यही विषयमा बुझ्न खोज्दा राजकिशोर यादवले आफू बैठकमा भएकोले केही बताउन नसक्ने बताए । भन्छन्, 'अहिले म एउटा मिटिङमा छु, मिटिङ सकियो भने आफैँ फोन गरेर तपाईंलाई बताउँला ।'

कुन समूहका कति पदाधिकारी ?

जसपाको केन्द्रीय कार्यकारणी समिति अहिले ५१ जनाको छ । हुनलाई ५३ जना हुनुपर्ने थियो तर २ जना रिक्त भएकोले ५१ जना रहेको समितिमा पूर्वराजपा र पूर्वसंघीय समाजवादीका पदाधिकारीको संख्यालाई मानेको हो । जपाका एक नेताले दिएको जानकारीअनुसार अब केन्द्रीय समिति ७ सय १ जनाको हुनेछ भने संघीय परिषद्‌मा १ हजार एक सय १ जना हुनेछन् ।

यद्यपि, अनौपचारिक रूपमा संख्यामा सहमति जुटे पनि नामावली तय हुन सकेको छैन । पूर्वराजपा समूहका केही नेताहरूको भागबण्डामा असहमति जनाएकोले संख्या र नाम टुंगो लाग्न नसकेको बताइएको छ । अहिले पूर्वसमूहमध्ये संघीय समाजवादी पार्टीको पदाधिकारीको अनुपातमा राजपाबाट संख्या तह हुनुपर्ने उपेन्द यादव पक्षको भनाइ छ ।

त्यसअनुसार हुने हो भने जसपामा संघीय समाजवादीबाट २५ जना र राजपाबाट २६ जना केन्द्रीय कार्यकारिणी समिति अर्थात् पदाधिकारीको संख्या हुनेछ । यता, ७ सय १ जना हुने केन्द्रीय समितिमा दुवै समूहबाट ३ सय ५० भागमा ७ सय १ जना केन्द्रीय सदस्य हुनेछन् । त्यसको नाम टुंगो लगाउन भने अझै सकस छ । त्यो सकस पूर्वराजपाका समूहभित्रको लफडाले त्यस्तो भएको हो ।

परिषद् अध्यक्ष बाबुराम

जनता समाजवादी पार्टी (जसपा)को संघीय परिषद् अध्यक्ष बाबुराम भट्टराई हुने अनौपचारिक सहमति जुटेको छ । निर्वाचन आयोगमा दल दर्ता गर्दा चौथो नम्बरमा पुगेका भट्टराइलाई परिषद् अध्यक्ष बनाउने पूर्वराजपा र पूर्वसंघीय समाजवादी पार्टीका नेताहरूबीच सहमति जुटेको जसपाका एक नेताको भनाइ छ ।

तर, नेता भट्टराईका निजी सचिव विश्वदीप पाण्डे भने पूर्वमाओवादीहरू एक हुनुुपर्ने भन्दै ट्वीट मात्र होइन, सार्वजनिक अपिल पनि गरिरहेका छन् । नेकपाभित्र विवाद चलिरहँदा पाण्डेले त्यस्तो अपिल सार्वजनिक गर्नुले भट्टराई स्वयं जसपाभित्र मन फुकाएर बस्न नसकेको टिपप्णी पनि भइरहेको छ ।

प्रकाशित मिति: बिहीबार, असोज १, २०७७ ००:२६