डडेल्धुरामा शहरी खानेपानीले महँगो शुल्क असुलेको उपभोक्ताको गुनासो

A+ A A-

खानेपानीको हाहाकार भएको डडेल्धुरा सदरमुकाममा तेस्रो साना शहरी खानेपानी आयोजना कार्यान्वयनमा आएको छ ।

खानेपानीको अभावलाई समाधान गर्न ३० कारोडभन्दा बढी लगानीमा खलंगा खानेपानी उपभोक्ता समितिमार्फत साना शहरी खानेपानी योजना भरखरै सम्पन्न भएको छ ।

तर, उपभोक्ता समितिले आफ्ना उपभोक्तालाई खानेपानी उपभोग गरेबापत लिने गरेको शुल्क चर्को भएको भन्दै उपभोक्ता रुष्ट भएका छन् । उपभोक्ता समितिले साना शहरी खानेपानी आयोजना सम्पन्न गरेलगत्तै चर्को शुल्क निर्धारण गरेकोमा उपभोक्ता रुष्ट बनेका हुन् ।

गत साउनदेखि खलंगा खानेपानी उपभोक्ता समितिले न्यूनतम ८ यूनिट (८ हजार लिटर पानी) प्रयोग गरेवापत २ सय ५० रुपैयाँ निर्धारण गरेको छ भने, ८ देखि १२ यूनिटसम्म प्रतियुनिट ५० रुपैयाँ र १२ यूनिटभन्दामाथि प्रतियुनिट थप सय रुपैयाँका दरले कायम गरेको छ।

किफायती तरिकाले पानी प्रयोग गरे पनि महिनाको १ हजारभन्दा बढी शुल्क आउने गरेको स्थानीय शान्ति कुँवर बिष्टले बताइन् । ‘कोठा भाडामा दिएकी छु, अल्लिअल्लि प्रयोग गरे पनि चर्को मूल्य आउँछ, महसुल न्यूनतम् गरिदिए सजिलो हुन्थ्यो’, उनले भनिन् ।

खलंगा खानेपानीले दिएको पानी धेरै महँगो भएको अर्की अपभोक्ता लक्ष्मी साउदको गुनासो छ । ‘सुरुमा धारा खोल्दा हावा आउँछ, त्यसैले मिटर घुमाइदिन्छ, अनि बन्द गर्दा पनि मिटर घुम्छ’, उनले भनिन्, ‘यहाँको पानी जल होकी अमृत हो छुट्याउन गार्‍हो भयो’

पानीको महसुल बढी हुँदा कोठा भाडामा बस्नेहरू समस्यामा परेका छन् । धनीहरूले सहजै तिर्न सक्ने भए पनि गरिबले भने समस्या झेल्नु परिरहेको उनीहरूको गुनासो छ । पानीको महसुल बढ्दा घरबेटीहरूले अनावश्यक दुःख दिने गरेको रमेश पनेरूले बताए । अहिले जिल्ला सदरमुकाममा बढी पानी प्रयोग हुने कार्यालयहरू समेत हजारौँ रकम महसुल बुझाउन बाध्य भएका छन् ।

खानेपानी नियमावली २०५५, अनुसार नेपाल सरकारले तोकेको व्यक्ति अध्यक्ष रहनेगरी आपूर्तिकर्तालगायतको पाँच जनाको समितिले सेवा शुल्क निर्धारण गर्ने व्यवस्था छ । तर, खलंगा उपभोक्ता समितिले भने आफ्ना उपभोक्तासँग सामान्य छलफल नै नगरी चर्को शुल्क निर्धारण गरेको आरोप लागेको छ।

समितिले सेवा शुल्कको दर निर्धारण गर्दा परियोजनाको लागत, संरचनाको संञ्चालन तरिका, सेवाको किसिम, मर्मत सम्भारमा लाग्ने खर्च, उपभोक्ताको संख्या, वार्षिक ह्रासकट्टी दर, उपयुक्त लाभ, मूल्य सूचीको परिवर्तन लगायतका विषयलाई ध्यान दिने गर्दछ।

समितिका अध्यक्ष भन्छन् : उपभोक्तसँग छलफल गरेरै शुल्क निर्धारण भएको हो

खलंगा खानेपानी उपभोक्ता समितिका अध्यक्ष रवीन्द्र केसीले उपभोक्ताको आमभेला बोलाएर नै शुल्क निर्धारण गरेको बताएका छन् ।

अध्यक्ष केसीले धारा खोल्दा सुरुमा हावा आउने गरेको भने स्वीकार गरेका छन् । पानीमा अक्सिजनको केही मात्र हुने भएर हावा आउने गरेको उनले बताए । तर, त्यसले खासै मिटर नघुमाउनेसमेत उनले बताए । साथै उनले असोजमा हुने साधारण सभाबाट शुल्कमा परिमार्जन गर्नेसमेत प्रतिबद्धता गरेका छन् ।

‘छलफलमा न्यूनतम् शुल्क ३ सय तोकिएको थियो । हामीले त्यो घटाएर २ सय ५० बनाएका छौँ, उहाँहरूले नबुझेर गुनासो गरेका हुन्, हामी परीक्षणमा छौँ’, उनले भने, ‘अन्धाधुन्ध पानी प्रयोग नगरी नआत्तिन अनुरोध गर्दछु ।’ उनले सामान्य उपभोक्तालाई ५ सय रुपैयाँभन्दा बढी नपर्ने गरेर शुल्क घटाउने बताए ।

नागरिक समाजको ध्यानाकर्षण

खानेपानी आयोजनाअन्तर्गत वितरण भइरहेको खानेपानी योजना अवैज्ञानिक र अव्यावहारिक भएको भन्दै नागरिक समाज डडेल्धुराले यसअघि प्रेस विज्ञप्तिमार्फत ध्यानाकर्षण गराएको छ ।

नागरिक समाज डडेल्धुराका संयोजक रमेशप्रसाद जोशीद्वारा हस्ताक्षरित विज्ञप्तिमा भनिएको छ, ‘करिब १५ सय घरधुरी परिवार तथा उपभोक्तालाई हाल जारी भएको खानेपानी महशुल अव्यावहारिक र अवैज्ञानिक देखिएकोले फोहोररहीत शुद्ध खानेपानी उपलब्धसहित न्यायोचित महसुल निर्धारण गरियोस भन्ने नागरिक समाज डडेल्धुरा आग्रह गर्दछ ।’

साथै नागरिक समाजले आयोजना निर्माणका क्रममा क्षति भएका सडक निर्माण कम्पनीबाट यथाशीघ्र मर्मतसंभार गर्नसमेत आग्रह गरेको छ ।

प्रकाशित मिति: बिहीबार, असोज १, २०७७ १९:५४