अघिल्लो साताको भन्दा ४३ प्रतिशतले घट्यो शेयर कारोबार

A+ A A-

यो साता पनि पुँजी बजार ओरालो लाग्ने क्रम जारी नै रह्यो । अघिल्लो साता ११७२.७८ बिन्दुमा अडिएको नेप्से परिसूचक यो साताको अन्तिम कारोबार दिन बिहीबार ११६१.६३ बिन्दुमा आइपुगेको छ ।

यो साता सबैभन्दा उच्च ११६३.८९ बिन्दुसम्म पुगेको नेप्से परिसुचक सबैभन्दा कम ११६०.५९ बिन्दुसम्म झरेको थियो ।

नेपाल स्टक एक्सचेन्ज (नेप्से) ले दिएको जानकारी अनुसार यो साता समग्रमा ४५ लाख ७२ हजार ८ सय ६० कित्ता शेयर १ अर्ब ३३ करोड ८१ लाख ८० हजार रुपैयामा कारोबार भए ।

यो साता जलविद्युत कम्पनीहरुका लागि सवैभन्दा खराब रह्यो । सो समुहले अघिल्लो साताको तुलनामा ७२.५४ प्रतिशतले कम कारोबार भएको छ । जलविद्युत समुहको ६ लाख ४ हजार ४ सय ६० हजार कित्ता शेयर कारोबार हुँदा १४ करोड ३४ लाख रुपैँया बराबरको कारोबार भएको छ ।

अन्य समुहको लागि निरासाजनक स्थिति रहे पनि फाइनान्स समुहका लागि भने धेरै सुखद रह्यो । अघिल्लो साता २० प्रतिशतले कम कारोबार भएको फाइनान्स समुहले १ लाख ५२ हजार १० कित्ता शेयर मार्फत १ करोड ८९ लाख २० हजार रुपैयाको कारोबार गरेको छ । फाइनान्स समुहको कारोबार अघिल्लो साताको तुलनामा शतप्रतिशत बृद्धि भएको छ ।

होटल समुहका लागि पनि यो साता सुखद नै रह्यो । होटल समुहको कारोबार ७७.३९ प्रतिशत बृद्धि भएको छ । होटल समुहको कूल ४२ हजार ७ सय कित्ता शेयर कारोबार हुँदा १ करोड २० लाख ८० हजार बराबरको कारोबार भएको छ ।

प्रोमोटर शेयरको कारोबार ७०.९९ प्रतिशतले बृद्धि भएको छ । ६ लाख ८९ हजार ७ सय ८० कित्ता कारोबार भएको प्रोमोटर शेयर समुहले १० करोड ८१ लाख २० हजार रुपैयाँ कारोबार गरेका छन् ।

यो साता १ लाख १२ हजार ८५० कित्ता शेयर बापत ८ करोड ५० लाख ४० हजार रुपैया कारोबार गरेको जीबन बीमा समूहको कारोबार ४.३६ प्रतिशतले बढेको छ । व्यापार समुहले ५ सय ७० कित्ता शेयर मार्फत ५ लाख ७० हजार रुपैयाको कारोबार गरेको छ ।

निर्जीवन बीमा समुहले १ लाख ६४ हजार ३२० कित्ता शेयर १० करोड ४९ लाख ४० हजार रुपैयामा कारोबार भएको भएको छ । जुन अघिल्लो साताको तुलनामा १.१९ प्रतिशतले बढी हो ।

बाणिज्य बैंक समुहको यो साता १८ लाख ९८ हजार २५० कित्ता शेयर कारोबार भएको छ । ५१ करोड ११ लाख ३० हजार रुपैया कारोबार गरेको बाणिज्य बैंक समुहको कारोबार रकम अघिल्लो साताको तुलनामा ८.५३ प्रतिशतले बढेको छ ।

त्यस्तै विकास बैंक समुहको ३ लाख ७० हजार ९९० कित्ता शेयर कारोबार हुदाँ ६ करोड १६ लाख ६० हजार रुपैँया बराबरको कारोबार भएको छ । जुन अघिल्लो साताको तुलनामा ७.६१ प्रतिशतले कम हो ।

यो साता १७.४७ प्रतिशतले कम कारोबार भएको अन्य समुहको ९५ हजार ८० कित्ता बराबर ११ करोड २८ लाख ७० हजार रुपैयाको कारोबार भएको छ । लघुबित्त समुहको १ लाख ९३ हजार ९७० कित्ता शेयर कारोबार हुँदा १७ करोड २५ लाख १० हजार रुपैयाँको कारोबार भएको छ । जुन अघिल्लो साताको तुलनामा १६.१७ प्रतिशतले बढी हो ।

उत्पादन समुहको कारोबार पनि ३९.८२ प्रतिशतले कम भएको छ । जम्मा ७४० कित्ता शेयर कारोबार भएको उत्पादन समुहको ५२ लाख ३० हजार रुपैयाको कारोबार भएको छ ।
यो साता औसत दैनिक २६ हजार ६८८ कित्ता शेयर र २७ करोड ६६ लाख ४० हजार रुपैँया कारोबार भएको छ ।

नेप्से यो साता माथिल्लो तामाकोशीको सवैभन्दा बढी ३ लाख ९१ हजार कित्ता शेयर कारोबार हुदाँ सो कम्पनीको १० करोड ३२ लाख ३० हजार रुपैया बराबरको कारोबार भएको छ ।

त्यस्तै कारोबार रकमका आधारमा माथिल्लो तामाकोशी पछि दोस्रो स्थानमा रहेको नागरिक लगानी कोषको ९ करोड ४० लाख ४० हजार रुपैयाँ कारोबार भएको छ । नेपाल बैकको ४ करोड ९८ लाख २० हजार, एनआइसी एसिया बैंकको ३ करोड ८७ लाख ९० हजार, प्रभु बैंकको प्रोमोटर शेयर ३ करोड ८६ लाख १० हजार रुपैया बराबरको कारोबार भएको छ ।

त्यस्तै नेपाल इन्भेष्टमेन्ट बैंकको ३ करोड ४१ लाख ८० हजार, प्राइम कमर्सियल बैकको ३ करोड २३ लाख १० हजार रुपैया बराबरको कारोबार भएको छ । एनएमबी बैंक, नेपाल लाइफ इन्स्यारेन्स र छिमेक लघुवित्त विकास बैंकले पनि २ करोड भन्दा बढीको कारोबार गर्दै आफुलाई टप १० भित्र राखेका छन् ।

प्रकाशित मिति: शुक्रबार, माघ १८, २०७५ १७:५५