भीमदत्त ‘आदर्श बस्ती’को काम अघि बढ्यो

A+ A A-

डडेल्धुराको अमरगढी नगरपालिका- २ मा रहेको शहीद भीमदत्त पन्तको कारीगाउँलाई आर्दश बस्तीको रूपमा विकास गर्ने अमरगढी नगरपालिका अग्रसर भएको छ । अमरगढी नगरपालिकाले भीमदत्त जन्मेको कारीगाउँलाई आदर्श बस्तीको रूपमा विकास गर्ने काम सुरु गरेको हो ।

‘कि त जोत हलो, कि त छोड थलो, यदि होइन भने अब छैन भलो’ भन्दै सशक्त रूपमा किसान आन्दोलन गरेका विद्रोही किसान नेता पन्तलाई तत्कालीन शासकले हत्या गरेका थिए । किसान र गरिव मजदुरको हितमा आवाज उठाएका पन्तको गाँउलाई आदर्श बस्तीको रूपमा विकास गर्ने कार्यको सुरुवात गरिएको अमरगढीका नगरप्रमुख विशेश्वरप्रसाद ओझाले बताए ।

स्थानीय तहमा निर्वाचित भएर आइसकेपछि नगरप्रमुख ओझाले भीमदत्त आदर्श बस्तीकोे अवधारणा अघि सारेका थिए । पन्तको गाउँलाई आदर्श बस्तीको रूपमा घोषणा गरे पनि काम अगाडि बढ्न सकेको थिएन ।

आर्थिक स्रोतको अभावमा विगतमा उल्लेख्य रूपमा प्रगति हुन नसके पनि अहिले संघीय सरकारको पर्यटन पूर्वाधार विकास आयोजनामार्फत ७२ लाख रुपैयाँको लागतमा उक्त कार्यको प्रारम्भ गरिएको नगरपालिका इन्जिनियर कवीन्द्र विष्टले बताए ।

पहिलो पटक समाजको सामन्ती संस्कारका विरुद्ध आफ्नै घरबाट विद्रोह गर्ने व्यक्ति शहीद पन्तको जीर्ण बनेको घरलाई पुनः निर्माण गर्ने काम सुरु भएको नगरउपप्रमुख संगिता भण्डारीले बताइन् । उनले पन्तको गाउँ जाने सडक निमार्ण भइरहेको बताइन् ।

कारीगाउँ प्रवेशद्धार ६ वर्षदेखि निर्माणाधीन रहेकाले गेट निर्माणको काम समेत सुरु भएको नगरप्रमुख ओझाले बताए । ‘यो बस्तीलाई आर्दश बस्ती बनाउने पहिलेकै योजना थियो । तर, केही आर्थिक तथा प्राविधिक समस्याको कारण सुरु भएको थिएन,’ उनले भने ।

आदर्श बस्ती मात्रै नभएर पन्तले उठाएका विषयको सम्बोधन गर्नु पनि आफूहरूको दायित्व भएको उनको भनाइ छ । उनले शहीद पन्त जन्मिएको घरको पुनःनिर्माण, घरसम्म कच्ची सडक निर्माण र सिंगो गाँउमा बाटो निर्माण तथा भीमदत्त पन्तको घर संग्रहालयको रूपमा परिणत भइरहेको बताए ।

कारीगाँउलाई आदर्श बस्तीका रूपमा विकास गर्ने कार्यक्रमअन्तर्गत भौतिक संरचना निर्माणको काम भइरहेको छ । भीमदत्त आदर्श बस्ती कारीगाउँ बनेमा पर्यटन प्रवद्धनमा टेवा पुग्ने स्थानीय प्रदीप पन्तले बताए ।

‘डोटी घटाल क्षेत्र रमणीय क्षेत्र हो, नजिकै घटाल थान, बूढी घटाल र डोटी घटालको मैदानलगायतका पर्यटकीय क्षेत्र छन्, यी क्षेत्रको प्रचारप्रसार पनि हुन्छ,’ उनले भने, ‘यहाँका स्थानीयले पनि रोजगारी पाउँछन् । यस क्षेत्रको विकास पनि हुन्छ ।’

शहीद पन्तका भाई यदुनाथ पन्तले शहीदको सपना पूरा गर्न स्थानीय तहको भूमिका महत्त्वपूर्ण रहेको बताए । उनले अब भीमदत्तका सपना साकार हुनेमा आफू विश्वस्त रहेको बताए ।

को हुन् भीमदत्त पन्त ?

नेपाली किसान आन्दोलनका शहीद पन्त डडेल्धुराको अमरगढी- २ कारीगाउँमा १० मंसिर १९८३ मा जन्मिएका थिए ।

उत्तरप्रदेश भारतको सिन्हाईबाट संस्कृत विषयमा हाइस्कुलसम्मको अध्ययन गरेका पन्तलाई गीता र मार्क्सवादको राम्रो ज्ञान थियो । यसले नै उनमा राजनीतिक चेतना बढायो । पन्त सामन्ती संस्कारविरुद्ध आफ्नै घरबाट विद्रोह गर्ने व्यक्ति पनि थिए ।

पन्तले ‘ठालु खान्ना आलु गरिब खान्ना बास्मती’ भन्ने नाराका साथ ‘तमसुक च्यात, भकारी फोड’ अभियान चलाएका थिए । पन्त नेपालको किसान आन्दोलनको गाथामा समेटिएको एउटा महत्त्वपूर्ण विद्रोही नाम पनि हो ।

‘जसको जोत, उसको पोत, किसान जिन्दावाद-जनताको राज जिन्दावाद’, ‘कि त जोत हलो, कि त छोड थलो, यदि हाेइन भने अब छैन भलो’ भन्ने नाराका साथ जोताहा किसानका पक्षमा वकालत गरेका थिए ।

किसान योद्धाका रूपमा चिनिने पन्तको १७ साउन २०१० टाउको काटी हत्या गरिएको थियो । १९ फागुन २०७२ फागुन प्रधानमन्त्री केपी शर्मा ओली नेतृत्वको सरकारले औपचारिक रूपमा भीमदत्त पन्तलाई शहीद घोषणा गरेको थियो ।

प्रकाशित मिति: मंगलबार, भदौ ३०, २०७७ १८:३०