ज्याेति ग्रुपकाे रडाकाेले छिमेकीलाई तनाव, प्रशासनलाई आपत

A+ A A-

नेपालीमा एउटा उखान छ, 'बाघको मुख हेर्न मन लागे बिरालो खोज्नू, शत्रुको अनुहार हेर्न मन लागे दाजुभाइको अनुहार हेर्नू ।' उखान आफैँमा 'पाेलिटिकल्ली करेक्ट' छैन । तर, यही उक्तिलाई पुष्टि गरेको छ - पुरानो व्यावसायिक घराना ज्योति ग्रुपले ।

यहाँ अहिले दाइको शत्रु भाइ र भाइको शत्रु दाइजस्तै भएका छन् ।

ज्योति ग्रुपमा २ भाइ (पद्मज्योति र रूपज्योति) को लफडाले पछिल्लो डेढ महिनामा काठमाडौं महानगर पालिका- २७ का वडाअध्यक्ष चिनियामान वज्राचार्य हैरान छन् । वडा २७ मा पर्छ ग्राण्डी सिटी हस्पिटल ।

हस्पिटल सञ्चालकमध्ये तीन जना मणिहर्ष ज्योतिका छोरा-छोरी पद्म, रूप र कमला कंसाकार हुन् । तर, पद्मज्योतिले हस्पिटल अवैधानिक रहेको भन्दै बन्द गराउन स्थानीय प्रशासनलाई गुहारेका छन् । भाइ रूपज्योतिले हस्पिटल सञ्चालनमा बाधा पुर्‍याएको भन्दै निरन्तर स्थानीय प्रशासनसँग सुरक्षा मागेका छन् । अब यस्ताेमा गर्ने के ? प्रशासनलाई पनि आपत ।

'साहुजी (पद्मज्योति) हस्पिटल अवैधानिक छ, बन्द गराउनुपर्‍यो भन्छन् । भाइ (रूपज्योति) हस्पिटल सञ्चालनमा अवरोध भयो भन्छन्,' वडा अध्यक्ष वज्राचार्य भन्छन्, 'कानुनी रूपमा मैले बाटो देखाइदिएको छु, व्यावहारिक रूपमा के गर्न सकिन्छ भनेर पुलको काम पनि गरिनै रहेको छु, कानुनबाहिरबाट हस्तक्षेप गर्न खोज्दा साहुजीहरूले मलाई पनि त मुद्दा हाल्लान् । '

यसरी सतहमा आयो झगडा क्लिक गरेर यहाँ पढ्नुस्

दुई साताअघि रूपज्योतिले वडा अध्यक्ष वज्राचार्यलाई फोन गरेर 'हस्पिटलको गेटमा दाइले ताला लगाइदिए' भन्दै खुलाउन आग्रह गरे । उनको गुनासोपछि वज्राचार्यले पद्मज्याेतिलाई फोन गरेर भाइको गुनासो सुनाए ।

पद्मज्योतिको भनाइ उद्धृत गर्दै वडाअध्यक्ष वज्राचार्य भन्छन्, 'मेरो साइडको ढोका बन्द गरेको हुँ, खोल्दिनँ ।'

पद्मज्योतिले यस्तो जवाफ फर्काएपछि वज्राचार्य अलमल्ल परे, केही भन्न सकेनन् । अस्पताल सञ्चालनमा कस्तो समस्या परेको भनेर उनले एक जना वडा सदस्यलाई अनुगमनमा पठाए । एउटा ढोका भए पनि चल्दो रहेछ भन्ने थाहा पाएपछि चुप लागे ।

'फेरि आयो गुनासो, दाइले पानी बन्द गरिदिए, महामारीकाे याे बेला बिरामीले पनि दुःख पाए, हस्पिटल चलाउन पनि गाह्रो भयो भन्ने । उनीहरूले एक/अर्कालाई आरोप लगाएर गुनासो गरिरहेका छन्, कानुन मेरो हातमा छैन, मैले के गर्न सक्छु,' वज्राचार्यले थपे, 'काठमाडौं महानगरपालिकाको न्यायिक समितिमा निवेदन पठाएको छु ।'

वज्राचार्य स्वयम्‌ले न्यायिक समितिकी अध्यक्ष रहेकी उपमेयर हरिप्रभा खड्गीलाई फोन गरेका छन् । महानगरपालिकामा उनीहरूको घरायसी झगडा छलफल क्रममा छ ।

कम्पनीकै समस्या लिएर पद्मज्याेति गत महिना कम्पनी रजिष्ट्रारको कार्यालय पनि पुगेका थिए । त्यहाँ उनले इच्छाविपरीत अध्यक्ष परिवर्तन गरिएकाे गुनासो राखे । कम्पनी रजिष्ट्रारकाे कार्यालय स्रोतका अनुसार 'सञ्चालक समितिको बहुमतले नेतृत्व परिवर्तन गर्न सक्छ, चित्त नबुझे अदालत जान सक्नुहुन्छ' भनेर फर्काइदियो ।

उता आफैँ पनि सञ्चालक रहेको ग्राण्डी सिटी हस्पिटल अवैधानिक छ भन्दै पद्मज्याेति र उनका छोराले जिल्ला प्रशासन कार्यालयमा पनि २५ साउन २०७७ मा निवेदन दर्ता गराएका छन् ।

अहिले चर्किएको सम्पत्ति विषयमा प्रतिक्रिया दिन नचाहेका पद्मज्याेति र उनको परिवारले भने हस्पटिल अवैधानिक भएकाले बन्द गर्नुपर्ने भन्दै अदालतदेखि प्रशासनसम्ममा माग गरेका छन् । सर्वसाधारणको स्वास्थ्यमा गम्भीर खेलवाड भइरहँदा पनि अस्पताल बन्द नगराएर प्रशासनले हेलचेक्र्याइँ गरेको आरोप पद्मज्याेतिको छ ।

ज्योति ग्रुपको अध्यक्ष को ?

यता, आफ्नै परिवारभित्रको झगडाका कारण ज्योति ग्रुपमा काम गर्ने कर्मचारी र त्यो ग्रुपका विभिन्न कम्पनीबाट सेवा लिने सेवाग्राही अन्योलमा परेका छन् । पद्मज्याेति र रुपज्याेति दुवैले ग्रुपको अध्यक्ष आफैँ भएको दाबी गरेका छन् ।

'२७ वर्षसम्म अध्यक्ष पद सम्हाली नेतृत्व प्रदान गर्नुभएकोमा निवर्तमान अध्यक्ष पद्मज्योतिलाई हार्दिक कृतज्ञता ज्ञापन गर्दछौँ,' ज्योति ग्रुपका सबै कम्पनीबाट निकालिएको सूचनामा कृतज्ञता ज्ञापन गरिए पनि पद्मज्याेतिमाथिको आरोप भने सम्पत्ति बेचेको, मनपरी आफूमातहतमा नामसारी गरेको र थप सम्पत्तिको रक्षाका लागि हटाउनुपरेको भन्ने छ ।

रूपज्याेतिलाई बधाई र पद्मज्याेतिलाई धन्यवाद दिएर निकालिएको सूचनामा ज्योति ग्रुपका १८ कम्पनी छन् । जसमा स्वयम् पद्मज्याेति पनि सञ्चालक समिति सदस्य छन् । यी प्रायः कम्पनीमा तीन जना सञ्चालक छन् भने केहीमा पाँच जना छन् । पाँच जना भएकोमा तीन जनाको बहुमत र तीन जना सञ्चालक रहेको कम्पनीमा दुई जनाको बहुमतले पद्मज्याेतिलाई विस्थापित गरी आफूलाई अध्यक्ष बनाइएको रूपज्याेतिको दाबी छ ।

अध्यक्षबाट हटिसकेपछि पनि आफैँ अध्यक्ष भएको वक्तव्य जारी भएपछि सर्वसाधारण र सेवाग्राहीलाई भ्रम नहोस् भनेर हामीले विगतको अध्यक्ष अहिले साे पदमा नरहेको जानकारी गराउन खोजेको हो,' रूपज्याेतिले भने । यता पद्मज्याेति भने यस विषयमा अहिले बोल्न चाहेका छैनन् ।

पद्मज्योतिद्वारा विवरण माग, स्याकार कम्पनी वडामा छैन दर्ता

पद्मज्योतिले ग्राण्डी हस्पिटल र स्याकार कम्पनीको विषयमा वडा कार्यालयसँग विवरण मागेका छन् । उनले व्यवसाय दर्ता भए नभएको बहाल कर तिरे/नतिरेको लगायतका विषयमा विवरण मागेको वडाअध्यक्ष वज्राचार्यले पुष्टि गरे ।

'साहुजीले विवरण माग गरेका छैनन् । मैले विवरण उल्लेख गरेर पत्र पठाउँदै छु,' उनले बने । वज्राचार्यका अनुसार, ज्योति ग्रुपले सञ्चालनन गरेको ग्राण्डी सिटी हस्पिटल वडामा दर्ता भए पनि पछिल्लो दुई वर्षमा बहाल कर तिरेकाे छैन । त्यस्तै, ज्योति ग्रुपकै स्याकार कम्पनी वडा कार्यालयमा दर्ता भएकाे भेटिएको छैन । बहाल कर पनि तिरेको पाइएको छैन ।

'शायद अन्त दर्ता होला । यहाँ दर्ता रहेनछ । मैले जे स्थिति छ, त्यही विवरण खुलाएर पत्र फिर्ता गर्दै छु,' वज्राचार्यले भने ।

प्रकाशित मिति: सोमबार, भदौ २९, २०७७ २१:२४