पद्म र रूपज्योतिकाे सम्पत्ति झगडाले ग्राण्डी सिटी अस्पताल सञ्चालनमा समस्या

पद्म र रूपज्योतिकाे सम्पत्ति झगडाले ग्राण्डी सिटी अस्पताल सञ्चालनमा समस्या

A+ A A-

अर्बपति ज्योति ग्रुपको पारिवारिक अंशवण्डाको झगडा छताछुल्ल भएको छ । करिब तीन महिनादेखि चरम उत्कर्षमा पुगेको झगडामा थप बल पुग्ने गरी बुधबार ज्योति ग्रुपका पूर्वअध्यक्ष पद्म ज्योतिले सार्वजनिक सूचना जारी गरेका छन् ।

पद्म ज्योतिको आरोप छ, 'रूप ज्योतिले सञ्चालन गरेको ग्राण्डी सिटी हस्पिटलमा आफ्नो पनि केही खण्ड स्वामित्व रहेको र त्यो खण्ड भाइ रूप ज्योतिले बलजफ्ती हडपेका छन् । उनले बहालसम्म नतिरेकाे आरोप लगाएका छन् ।

भाइ रूप ज्योतिले भने ज्योति ग्रुपको अध्यक्ष बन्ने क्रममा मनपरी रूपमा जग्गा बिक्री गरेपछि सञ्चालक समितिले बहुमतबाट अध्यक्ष परिवर्तन गरेको र त्याे रिस आफूमाथि साँधेको आरोप लगाएका छन् ।

उनी हाल ज्योति ग्रुपका अध्यक्ष छन् । ज्योति ग्रुपमा तीन दाजुबहिनी पद्म ज्योति, रूप ज्योति र बैनी कमला कंसारकार सञ्चालक छन् । सञ्चालक समितिको बहुमतले अध्यक्ष परिवर्तन गरेको रूप ज्योतिले बताएका छन् । अन्य कम्पनीहरूमा पनि ५ जना सञ्चालक रहकोमा बहुमतबाट नै उनलाई अध्यक्षबाट हटाएर सञ्चालक समिति बनेकाे दाबी गरेका छन् । यसैको रिस साँधेको उनको दाबी छ ।

कानुनी उपचार हुँदाहुँदै पनि दाइ आफूमाथि निरन्तर जाइलागेको आरोप रूप ज्याेतिकाे छ । पद्म र रूप सहोदर दाजुभाइ हुन् । उनीहरूका पिता मणिहर्ष ज्योतिले सन् १९४० मा ज्योति ग्रुपका नाममा विभिन्न कम्पनीहरू सञ्चालन गरेका थिए ।

एक दर्जनभन्दा बढी कम्पनी तथा उद्योग रहेको यो ग्रुपभित्र रूप ज्योतिले दाइले सम्पत्ति बेचेको आरोप लगाउँदै आएका छन् भने पद्म ज्योतिले अवैधानिक रूपमा सम्पत्ति हडपेको आरोप लगाएका छन् । उनीहरूबीचको विवाद अहिले स्थानीय प्रशासनदेखि अदालतसम्मै पुगेकाे छ । कहिले दाइलाई प्रकाउ गर्न भन्दै भाइ र कहिले भाइलाई पक्राउ गर्ने भन्दै दाइ प्रहरी कार्यालय धाउने गरेका छन् ।

पारिवारिक कलहकाे आन्तर्य

ज्योति ग्रुपमा पद्म ज्योति, रूप ज्योति र बैनी कमला कंसाकार छन् । कतिपय कम्पनीमा अन्य २ जनासमेत गरी पाँच जनाकाे सञ्चालक समिति छ । अधिकांश कम्पनीहरू अध्यक्ष पद्म ज्योतिलाई हटाउने निर्णय भएसँगै विवाद बढेको देखिएको छ ।

अध्यक्ष रहेको बेला पद्म ज्योतिले परवानीपुर गेष्ट हाउसको तथा ५ विगाह जग्गा, भाजुरत्नको घरजग्गा, भाजुरत्न इन्जिनियरिङको शेयर बिक्री गरेको र विभिन्न कम्पनीको स्वामित्व एकल कम्पनीमा सारेको भन्दै सञ्चालक समितिबाट उनलाई अध्यक्षबाट हटाएको दाबी गरिएको छ । यद्पि आफ्नो स्वामित्व भाइले हडपेको सार्वजनिक सूचना निकालेका पद्म ज्योतिसँग टेलिफोन सम्पर्क गर्न खोज्दा सम्पर्कमा आएका छैनन् ।

सम्पत्ति बेचेको आरोपसहित पारिवारिक कलह सुरु भएको रूप ज्योति स्वीकार गर्छन् । रूपले दाजु पद्म ज्योतिका विरुद्धमा कानुनी उपचार खोज्नुको कारण यसरी प्रष्ट्याउँछन् ।

यसअघि पद्म ज्योतिले २०७७ असार ३ मा रूप ज्योति, मिला सायमीलगायतले सञ्चालन गरेको ग्राण्डी सिटी अस्पतालको घरमा आफ्नो केही खण्ड रहेको र त्योबापतको बहाल आफूलाई नबुझाएको आरोपसहित पत्र पठाएका थिए । उनले स्वीकृतिबिना आफ्नो नाममा रहेको प्रथम तल्ला र दोस्रो तल्ला प्रयोग गरेको भन्दै दाइ पद्म ज्योतिले भाइलाई फ्लाइट खाली गराउन र ६ वर्षको बक्यौता तिर्नका लागि पत्र काटेका थिए । जसको बोधार्थ वडा कार्यालय, जिल्ला प्रशासन कार्यालय, महानगरीय प्रहरी वृत्त स्वास्थ्य सेवा विभाग र स्वास्थ्य तथा जनसंख्या विभागलाई दिइएको थियो ।

यस विषयमा तीन हप्ता पारिवारिक विवाद चलेपछि ग्राण्ड सिटी क्लिनिक हस्पिटलबाट बहाल बुझाएको रकमको विवरण १७ असारमा सञ्चालक मिला सायमीले पद्म ज्योतिलाई जवाफ फर्काएकी छन् । उनले लेखेको पत्रमा ६ वर्षको बहालबापतको रकम १ करोड २९ लाखको सट्टा अन्य रकमसमेत गरी ४ करोड ३९ लाख रुपैयाँ अग्रिम बुझाएको उल्लेख गरिएको छ ।

उनले तत्काल बन्द गरेर अन्यत्र जान सक्ने अवस्था नरहेको दाबी गरेकी छन् । लेनादेनाको हिसाब मिलाएपछि भने घरको बहाल लिएको क्षेत्रफल प्रयोग नगर्ने जनाएकी छन् ।

दाइ पद्म ज्योति र भाइ रूप ज्योतिको भनाइ मौखिक रूपमा २ तल्ला लिने सहमति भएको उल्लेख गरिएको छ । तर भाडा लिएको नलिएको भन्ने विवाद भने देखिएको छ । तर पद्म ज्योतिले पछिल्लो समय हस्पिटल सञ्चालनमा अवरोध गरेको जसमा उनका छोरा सौरभ ज्योतिलाई पनि प्रयोग गरिएको आरोप रूप ज्योतिको छ ।

पद्म ज्योतिले भने बलजफ्ती आफ्नो सम्पत्ति हडपेको र अस्पतालसमेत अवैधानिक रूपमा सञ्चालन भएको दाबी गरेका छन् । पद्म ज्योतिले भनेजस्तै ग्राण्डी सिटी हस्पिटल रहेको भवनले भवन विभागबाट दर्ता प्रमाण भने लिएको छैन । यस विषयमा रूप ज्योतिको स्वीकारोक्ति रहेको छ ।

उनले भनेका छन्, 'अन्य प्रकिया पूरा छ तर रेट्रोफिटिङ पूरा नभएको कारणले भवन विभागको प्रमाण लिन बाँकी हो ।'

निरन्तर झगडा रहेको यो मुद्दा अदालतमा समेत गएको छ । पद्म ज्योतिले रूप ज्योतिको कम्पनीहरू खराब अवस्थामा छन् भनेर बैंकहरूले पत्र काटेपछि चारवटा बैंकको कर्जा चुक्ता गरेको रूप ज्योतिले बताएका छन् । 'दाइले पनि यति गर्न सक्दा रहेछन् । मेरा सबै कम्पनी खराब छन् भन्दै हिमालयन बैंक, सनराइज बैक, सिभिल बैंकका पत्र काटेका कारण मलाई कर्जा तिर्न भनियो । मैले कर्जा तिरेको छु' रूप ज्योतिले शिलापत्रसँग भने ।

भाइ रूप ज्योतिले प्रहरीले गत असारमा एकपछि अर्को गर्दै दाइ र भाइलाई पक्राउ गर्न माग गरेपछि वकिल र चार्टर अकाउन्टेन्ट राखेर विवाद मिलाउन सुझाएको थियो ।

प्रकाशित मिति: शुक्रबार, भदौ २६, २०७७ ०१:५६