प्रचण्ड र माधवको धाप पाएका कुलमानलाई ओलीले सकार्लान् ?

A+ A A-

नेपाल विद्युत् प्राधिकरणको कार्यकारी निर्देशकमा कुलमान घिसिङ पुनः ४ वर्षका लागि नियुक्त होलान् त ? अहिले आमचासोको विषय बनेको छ । २८ भदौमा कार्यकाल पूरा गरेका कुलमानको पुनर्नियुक्तिका लागि साँझ बस्ने मन्त्रिपरिषद्‌मा ऊर्जा, जलस्रोत तथा सिँचाईमन्त्री वर्षमान पुनले घिसिङको पुनर्नियुक्तिको प्रस्ताव मन्त्रिपरिषद्‌मा लैजानुपर्ने हुन्छ ।

नेकपा अध्यक्ष प्रचण्डसहित माधव नेपाललगायतका नेताहरू कुलमानलाई दोहोर्‍याउने पक्षमा छन् । तर, प्रधानमन्त्री केपी ओली र ऊर्जामन्त्री वर्षमान पुन कुलमानलाई दोहोर्‍याउने पक्षमा नदेखिँदा ढिलाइ भइरहेको थियो । कानुनतः कुलमानको कार्यकाल नदोहोरिने अवस्थामा एक महिनाअघि नै खुला प्रतिस्पर्धाका लागि विज्ञापन गरिसक्नुपर्ने थियो । त्यसो पनि गर्न नसकेको सरकारले कुलमानलाई सहजै दोहोर्‍याउने पक्षमा देखिएको छैन ।

४ भदौमा नेपाल विद्युत प्राधिकरणका कार्यकारी निर्देशक कुलमान घिसिङले नेकपा अध्यक्ष प्रचण्ड र वरिष्ठ नेता माधव नेपालसँग भेट गरेका थिए । २९ भदौमा कार्यकाल सकिने भएपछि पुनर्नियुक्तिका लागि पहल गर्ने क्रममा कुलमान ती नेतासम्म पुगेका थिए ।

दुवै नेताको साथ पाएका कुलमानले अन्तिम समयसम्म पनि प्रधानमन्त्री तथा अध्यक्ष केपी ओली र ऊर्जामन्त्री वर्षमान पुनको साथ भने पाउन सकेनन् । प्रचण्ड र नेपाललाई भेटेका कुलमानले त्यहीबीचमा एउटा विज्ञप्ति प्रकाशित गरेर उज्यालो नेपालको अभियानमा प्रधानमन्त्री ओली र ऊर्जामन्त्री पुनको सपनाअनुसार काम गरेको बताए ।

पुनर्नियुक्तिको वातावरण बनाउन कुलमानको त्यो प्रयासबाट पनि प्रधानमन्त्री ओली खुसी हुन नसक्दा २८ भदौसम्म कुलमान पुन: नियुक्त हुन सकेनन् ।

भदौ महिनामा नेकपा अध्यक्ष प्रचण्डसँग कुलमानले तीन पटक भेटेका थिए । केही हप्तापहिला प्रचण्डलाई कुलमानले भेटेर फर्किएलगत्तै प्रचण्डले ऊर्जामन्त्री वर्षमान पुनलाई बोलाएर कुलमानको पुनर्नियुक्तिबारे चासो राख्थे । तर, प्रचण्डको चासोअनुसार काम नभएपछि २२ भदौमा चाँहि प्रचण्डले ऊर्जामन्त्री पुन र कुलमानलाई एकसाथ राखेर छलफल गरेका थिए ।

प्रचण्डले कुलमानको नियुक्तिमा पुनलाई सकारात्मक भइदिन आग्रह गरेपछि पुनको सचिवालयले कुलमानको पुनर्नियुक्ति प्रस्ताव मन्त्रिपरिषद्‌मा लैजाने सूचना चुहाए । तर, ऊर्जामन्त्री पुन आफैँ भने कुलमानलाई दोहोर्‍याउने पक्षमा थिएनन् । त्यसमाथि प्रधानमन्त्री ओली पनि कुलमानसँग बेखुसी देखिएको बुझेका पुनले अन्तिम दिनसम्म पनि मन्त्रिपरिषद्‌मा प्रस्ताव लगेनन् ।

नेकपाभित्रको राजनीतिमा पूर्वऊर्जामन्त्री जनार्दन शर्मा र ऊर्जामन्त्री वर्षमान पुन प्रतिस्पर्धी हुन् । र, एकले अर्कोलाई असहयोग गरिरहेका हुन्छन् । कुलमानलाई तत्कालीन प्रधानमन्त्री प्रचण्ड र ऊर्जामन्त्री शर्माले प्राधिकरणको कार्यकारी निर्देशक नियुक्त गरेका थिए ।

अहिले पनि कुलमानको सम्बन्ध शर्मासँग निकट रहेकाले पुन कुलमानको पक्षमा नरहेको नेकपा नेताहरूको भनाइ छ । कुलमानको नागरिक तहमा देखिएको समर्थनलाई बाइपास गर्न नसकेका पुनले सचिवायलयमार्फत पुनर्नियुक्तिको चर्चा चलाए र नियुक्ति रोक्ने पनि दोहोरो भूमिका देखिएका ऊर्जामन्त्री पुन अध्यक्ष प्रचण्डको साथ पाएका कुलमानलाई बाइपास गरेर जान सक्ने अवस्थामा भने नरहेको नेकपाका नेताको दाबी छ ।

त्यसो त केही दिनअघिसम्म पनि नेकपाभित्रको अन्तरविरोधका कारण प्रचण्डको साथ रहने कर्मचारी वा नेताविरुद्ध अर्का अध्यक्ष केपी ओली उभिने गरेका थिए । र, प्रचण्डले भनेका पनि थिए, 'मलाई भेट्ने कर्मचारीलाई ओलीले भित्तैमा पुर्‍याउने गरेका छन् ।

दुई अध्यक्षको लफडाकै कारण प्रेस काउन्सिल नेपाल, नेपाल रेडक्रस, युवा स्वरोजगार कोष, समाज कल्याण परिषद्लगायतका पदाधिकारी नियुक्तिमा प्रधानमन्त्री ओलीले अध्यक्ष प्रचण्ड पक्षलाई बाइपास गरेका थिए । समाज कल्याण परिषद्को कोषाध्यक्ष पद पूर्वमाओवादी कोटा भनेर छुट्याएको भए पनि पछि नदिएको नेकपाका नेताहरूको भनाइ छ ।

यो बीचमा कुलमान पनि त्यसैको मारमा परेको टिप्पणी छ । त्यही कारण केही दिनअघिसम्म ओलीनिकट कार्यकर्ताले सोसल मिडियामा कुलमानको विपक्षमा धारणाहरू सार्वजनिक गर्ने लहर चलेको थियो । तर, दुई अध्यक्षबीच सम्बन्ध सुध्रिन थालेपछि कुलमानविरुद्धको त्यस्तो अभियान रोकिएको छ ।

प्रकाशित मिति: सोमबार, भदौ २९, २०७७ १७:२८