महाभारत क्षेत्रका प्राकृतिक पोखरी मासिँदै

A+ A A-

प्राकृतिक रुपमा रहेको पोखरी, दह र सिमसार क्षेत्रको महत्व र उपयोगिताबारे स्थानीयले चासो नदिँदा सिन्धुलीमा महाभारत क्षेत्रका प्राकृतिक पोखरीहरु मासिँदै गएका छन् । सरकारले घोषणा गरेको एक सय पर्यटकीय गन्तव्यमध्ये महाभारत पद्मार्गलाई प्रमुख प्राथमिकतामा राखेको छ । प्रस्तावित पदमार्ग तथा आसपास रहेका प्राकृतिक पोखरी, धाप, सिमसार, चौतारा, देउराली, भञ्ज्याङ, कुवा, पधेँरा, धाराको संरक्षणमा स्थानीयले भने खासै चासो दिएका छैनन् । ती सम्पदाको महत्त्व स्थानीयलाई थाहा नहुँदा पोखरीलगायतका सम्पदा मासिने क्रममा छन् ।

सुनकोशी गाउँपालिका ७ नागीका लालबहादुर लामाका अनुसार नागीमा रहेका पाँचवटा प्राकृतिक पोखरीमध्ये सिमपोखरी मात्र अस्तित्वमा छ । ऐतिहासिक किंबदन्तीअनुसार, गोल्मे राजारानी नुहाउने विश्वास गरिएको गोल्मेडाँडाका दुई पोखरीमध्ये एउटा पुरेर भुमेश्वर आधारभूत विद्यालयको आँगन बनाइएको छ । अर्को पोखरी विद्यालयकै अतिक्रमणमा परेको छ । त्यस्तै, लामाडाँडा पोखरी पुरेर चन्द्रकन्या आधारभूत विद्यालय र पोखरीचोकको पोखरी मासेर कच्ची बाटोको चोक बनाइएको छ ।

यस्तै मतानवासको पोखरीलाई कच्चीसडकले मिचेको छ । यो पोखरी पुर्ने तयारी भइरहेको स्थानीयले बताए । सोही वडाको मतानवासस्थित रमणीय बोजो पोखरीमा बसपार्क बनाउने योजना रहेको स्थानीयले बताए । चारकुने सो पोखरीको पूर्वी कुनो सडकले मिचेको छ । स्थानीय तीर्थबहादुर स्याङ्वाका अनुसार, सो पोखरी मासेर बसपार्क बनाउने योजना छ ।

सुनकोशी गाउँपालिका ५ का वडा सदस्य यमबहादुर सुनुवारका अनुसार बन्दिपुरमा रहेको गुम्बा नजिकैको पोखरी गाउँलेकै अनुरोधमा पुरेर बसपार्क बनाइएको हो । बन्दिपुरकै ऐतिहासिक बोजो पोखरी पनि सडकको अतिक्रमणमा परेको छ ।

प्रकाशित मिति: शनिबार, वैशाख ७, २०७६ १६:४८