अवरुद्ध डडेल्धुराका ग्रामीण सडक दसैँअघि नै खुल्ने

A+ A A-

वर्षायाममा बाढी र पहिरोका कारण अवरुद्ध भएका डडेल्धुराका ग्रामीण सडकहरू मर्मतसम्भार कार्य सुरु भएको छ । दसैँ अघिनै ग्रामीण सडक सुचारु गर्न मर्मतसम्भार गरिन थालिएको हो ।

वर्षासँंगै आएको बाढी र पहिरोका कारण सडक अवरुद्ध हुँदा आवतजावत गर्न समस्या भएपछि सुदू्रपश्चिम प्रदेश सरकारले मर्मतसम्भारका साथै पहिरो पन्छ्याएर अवरुद्ध सडकखण्ड सुचारु गर्न थालेको हो ।

प्रदेश सरकारको भौतिक पूर्वाधार विकास मन्त्रालयको निर्देशनपछि पूर्वाधार विकास कार्यालय डडेल्धुराले प्रदेश सरकारअन्तर्गत रहेका ग्रामीण सडकमा भएको क्षतिको विवरण संकलन गर्न थालेको छ ।

अविरल वर्षाकाका कारण बाढी र पहिरोले अवरुद्ध हुनुका साथै कोरोना भाइरस महामारीको जोखिमका कारण पनि मर्मतसम्भार कार्य हुन नसकेका सडकमा भएको क्षतिको सम्पूर्ण विवरण एक साताभित्रै आइसक्ने पूर्वाधार विकास कार्यालय डडेल्धुराका डिभिजन प्रमुख रामचन्द्र खत्रीले बताए ।

सुदूरपश्चिम प्रदेश सरकारअन्तर्गत रहेको बुडर-नाइल सडक, लिप्ना-जोगबुडा सडक, सलौन-चिरकिट्टे सडकमा बढी क्षति पुगेको पूर्वाधार विकास कार्यालय डडेल्धुराले जनाएको छ । त्यस्तै डडेल्धुराका अन्य ग्रामीण सडकहरूमा पनि पहिरो र बाढीले क्षति पुर्‍याएको छ ।

सडक मर्मत गर्न ५० लाख उपलब्ध

बाढीपहिरोका कारण क्षति पुगेका सडकको मर्मतका साथै सडकमा आएको पहिरो हटाउन प्रदेश सरकारले ५० लाख रुपैयाँ उपलब्ध गराएको पूर्वाधार विकास कार्यालय डडेल्धुराका लेखा अधिकृत वीरबहादुर ऐरले जानकारी दिए । डडेल्धुरामा विशेष गरी वर्षातका कारण बाढीले सडकमा ठूलाठूला खाल्डाखुल्डी पर्नुका साथै पहिरोका कारण ग्रामीण सडक अवरुद्ध भएका छन् ।

बाढी र पहिरोका कारण जोखिमपूर्ण बनेका ग्रामीण सडक दसैँअघि सुचारु गरिने सुदूरपश्चिमका भौतिक पूर्वाधार विकासमन्त्री पठानसिंह बोहराले बताए । प्रदेश सरकारअन्तर्गत रहेका डडेल्धुरा जिल्लाका प्रमुख ३ सडकलाई कालोपत्रे गर्ने काम पनि चालु आर्थिक बर्षदेखि सुरू भएको छ ।

जिल्लाका महत्वपूर्ण मानिने बागबजार-बगरकोट सडक, उग्रतारा मेलौली सडक र पोखरा बेलापुर सडकको कालोपत्रे गर्ने काम सुरु भएको मन्त्रालयले जनाएको छ । सुदूरपश्चिम प्रदेश सरकारअन्तर्गत डडेल्धुरामा प्रदेश गौरवको योजनासहित साना ठूलागरी २० वटा सडक छन् ।

प्रकाशित मिति: मंगलबार, भदौ २३, २०७७ १६:१५