नेपाल एग्रो लघुवित्तको आईपीओ विश्लेषणः लाभांश न्यून, हकप्रदमा जोड

A+ A A-

नेपाल एग्रो लघुवित्तले प्राथमिक सेयर (आईपीओ) जारी गर्न लागेको छ । नेपाल एग्रोले नेपाल राष्ट्र बैंकबाट २३ भदौ २०७३ मा ‘घ’ वर्गको वित्तीय संस्थाको रुपमा कारोबार गर्न स्वीकृति पाएर ४ असोजबाट औपचारिक कारोबार सुरु गरेको हो ।

कम्पनीले कास्की, पर्वत, बागलुङ, गुल्मी, प्यूठान, रोल्पा, सल्यान, पाल्पा, तनहुँ र लम्जुङ गरी १० जिल्लाका २६ वटा शाखा कार्यालयमार्फत लघुवित्त सेवा दिइरहेको छ । कम्पनीको रजिस्टर्ड (केन्द्रीय) कार्यालय कास्कीको विन्ध्यावासिनीमा छ ।

कम्पनीको जारी पुँजी, आवेदन मागिएको सेयर कित्तासम्बन्धी विस्तृत विवरण तालिकामा उल्लेख गरिएको छ ।

विषय	विवरण
अधिकृत पुँजी	१० करोड रुपैयाँ
जारी पुँजी	४ करोड ९७ लाख ७८ हजार रुपैयाँ
जारी हुने कित्ता	१ लाख ६१ हजार ७ सय ७८
कर्मचारी आरक्षित	२ हजार ४ सय ८९ कित्ता
सामूहिक लगानी कोष	८ हजार ८९ कित्ता
सर्वसाधारणमा आउने वास्तविक संख्या	१ लाख ५१ हजार कित्ता
प्रतिसेयर नेटवर्थ (आव २०७४/७५)	१०३.४८ रुपैयाँ
आवेदन खुल्ने मिति	२०७६ वैशाख ८ गते
आवेदन दिने अन्तिम मिति	छिटोमा वैशाख ११
न्यूनतम आवेदन गर्न सकिने कित्ता	१० कित्ता
रेटिङ	क्रेडिट रेटिङ नियमावली अनुसार आवश्यक नपर्ने

पुँजी उपयोग

कम्पनीले जारी गरेको प्राथमिक निष्कासनबाट प्राप्त हुने रकमलाई निम्न शीर्षकमा उपयोग गर्ने भएको छ :

शीर्षक	रकम (रुपैयाँ)
पशुपालन तथा कृषि कर्जा	९७ लाख ६ हजार ६ सय ८०
खुद्रा व्यापार र सेवा कर्जा	४८ लाख ५३ हजार ३ सय ४०
साना तथा घरेलु उद्योग कर्जा	१६ लाख १७ हजार ७ सय ८०
जम्मा	१ करोड ६१ लाख ७७ हजार ८ सय

नाफा-नोक्सान

कम्पनीले गत आर्थिक वर्ष २०७४/७५ को परिष्कृत वित्तीय विवरणअनुसार सो अवधिमा ५ करोड ८ लाख रुपैयाँ ब्याज आम्दानी र ३ करोड ७ लाख रुपैयाँ ब्याज खर्च गरी २ करोड १ लाख रुपैयाँ खुद ब्याज आम्दानी गरेको छ ।

यसबाहेक अन्य सञ्चालन आम्दानी १ करोड रुपैयाँसमेत गरी ३ करोड ७ लाख रुपैयाँ कुल सञ्चालन आम्दानी गरेको छ । कर्मचारी र सञ्चालन खर्चपश्चात् सम्भावित नोक्सानी व्यवस्था अघिको सञ्चालन नाफा ४३ लाख ६५ हजार रुपैयाँ रहेको छ । नोक्सानी व्यवस्था, कर्मचारी बोनस, आयकर करपश्चात् १७ लाख रुपैयाँ खुद नाफा गरेको छ ।

परिष्कृत विवरणअनुसार कुल सञ्चालन आम्दानीको ६० प्रतिशत रकम कर्मचारीका लागि खर्च गरेको छ । कुल सञ्चालन आम्दानीको ८५ प्रतिशतभन्दा बढी रकम कर्मचारी र सञ्चालनमा खर्च गरेको छ ।

नाफा–नोक्सान बाँडफाँट हिसाबअनुसार आव २०७४/७५ मा कम्पनी २५ लाख ५३ हजार रुपैयाँ सञ्चित नोक्सानीमा छ ।

२०७५ पुसको हिसाब

पुस मसान्तसम्म लेखापरीक्षण नभएको वित्तीय प्रतिवेदनअनुसार ४ करोड ८१ लाख रुपैयाँ ब्याज आम्दानी गरी ३ करोड ३७ लाख रुपैयाँ ब्याज खर्चपश्चात् १ करोड ४ लाख रुपैयाँ खुद ब्याज आम्दानी गरेको छ ।

अन्य सञ्चालन आम्दानी १ करोड ६ लाख रुपैयाँसहित २ करोड ११ लाख रुपैयाँ सञ्चालन आम्दानी गरेको छ । सञ्चालन, कर्मचारी खर्च, नोक्सानी व्यवस्था, कर्मचारी बोनस र करपछिको खुद नाफा ४७ लाख ५७ लाख रुपैयाँ छ । जगेडा तथा विभिन्न कोषमा ९८ लाख ३३ हजार रुपैयाँ पुगेको छ ।

प्रक्षेपित नाफा-नोक्सान

चालू आव २०७५/७६ को अन्त्यसम्म ८७ लाख ६४ हजार खुद नाफा गर्ने अनुमान गरेको छ । त्यस्तै, आव २०७६/७७ मा १ करोड ६७ लाख रुपैयाँ र आव २०७७/७८ मा २ करोड ४४ लाख रुपैयाँ खुद नाफा हुने अनुमान पेस गरेको छ । आव २०७५/७६ को अनुमानित नाफा बाँडफाँट हिसाबअनुसार विभिन्न जगेडा कोषमा रकम व्यवस्था र अघिल्लो आवसम्मको सञ्चित घाटा २५ लाख ५३ हजार रुपैयाँ घटाएपश्चात् ४२ लाख ८३ हजार रुपैयाँ सञ्चित नाफा हुने प्रक्षेपण गरेको छ ।

हरेक वर्ष हकप्रद

चालू आवमा साधारण सेयर जारी गरी बाँडफाँट गरेलगत्तै कम्पनीले २० प्रतिशत हकप्रदमार्फत पुँजी वृद्धि गर्ने भएको छ । आव २०७६/७७ मा पुँजी वृद्धि भएर ८ करोड २३ रुपैयाँ लाख पुग्नेछ । आव २०७७/७८ मा पुनः पुँजी बढेर १२ करोड ८४ लाख रुपैयाँ पुग्नेछ । कम्पनीले हरेक वर्ष ठूलो मात्रामा पुँजी वृद्धि हुने प्रक्षेपण गरे पनि आम्दानीले मात्र सम्भव नहुने देखिन्छ । यसका लागि कम्पनीले हरेक वर्ष हकप्रद जारी गर्नुपर्ने देखिन्छ ।

प्रक्षेपण र वास्तविकता

कम्पनीले प्रक्षेपण गरेका वित्तीय विवरण साह्रै महत्वाकांक्षी देखिन्न । सामान्य वृद्धिदरमा हासिल गर्न सकिने लक्ष्य राखेको छ । चालू आव २०७५/७६ को पुस मसान्तसम्मको ब्याज आम्दानीको दोब्बर ब्याज आम्दानी आवको अन्त्यमा हुने सामान्य अनुमान गरेको छ । त्यस्तै, आव २०७६/७७ मा पनि सामान्य हिसाबले ब्याज आम्दानी बढेर १२ करोड ८० लाख रुपैयाँ र आव २०७७/७८ मा करिब १९ करोड रुपैयाँ हुने अनुमान गरेको छ ।

लगानी निर्णय

यो विश्लेषण कम्पनीले प्रकाशन गरेको विवरणपत्र, कम्पनीको वेवसाइट, अनौपचारिक जानकारी र अन्य प्रकाशित समाचारलाई आधार मानेर पारिएको हो । यो विश्लेषणले लगानी गर्न वा नगर्न केही भन्दैन । यो विशुद्ध अवधारणा मात्र हो । लगानी गर्नुअघि आफैंले थप अध्ययन गर्न आवश्यक हुन्छ ।

प्रकाशित मिति: शुक्रबार, वैशाख ६, २०७६ २२:११