प्रचण्डले ओलीसँग ‘गोप्य सम्झौता गरेको’ नेपालको आशंका

A+ A A-

आन्तरिक विवाद मिलाउन गठित कार्यदलको प्रतिवेदन आए पछि सत्तारुढ नेपाल कम्युनिस्ट पार्टी (नेकपा) अध्यक्ष पुष्पकमल दाहाल (प्रचण्ड) र वरिष्ठ नेता माधवकुमार नेपाल समूहबीच आशंका उत्पन्न भएको छ ।

पार्टी विधि र पद्धति अनुसार चल्नुपर्ने भन्दै ‘एक व्यक्ति एक पद’ को एजेन्डा उठाउँदै आएका वरिष्ठ नेता नेपालले अध्यक्ष प्रचण्डले अर्का अध्यक्ष केपी शर्मा ओलीसँग गोप्य सम्झौता गरेको भन्दै आशंका व्यक्त गरेका हुन् ।

‘ओलीजीले प्रधानमन्त्री र अध्यक्ष दुवै पदवाट राजीनामा दिनुपर्ने भनेर माग गर्ने प्रचण्डजी नै हुनुहुन्थ्यो तर अहिले उहाँ आफैले उठाएको एजेन्डावाट उहाँ एकाएक पछि हटनुभएको छ,’ नेपाल निकट एक स्थायी कमिटी सदस्यले भने, ‘बरु, माधव कमरेडले त पार्टीलाई विधि र पद्धतिअनुसार चलाऊँ, त्यसका लागि एक व्यक्ति एक पदको नीति अख्तियार गरौँ भन्ने मात्रै विषय उठाउँदै आउनुभएको थियो ।’ उनका अनुसार वरिष्ठ नेता नेपाल अहिले पनि सोही ‘पोजिसन’मा स्पष्ट छन् ।

तर, अर्का अध्यक्ष प्रचण्डले प्रधानमन्त्री र अध्यक्ष दुवै पदवाट राजीनामा दिनुपर्ने माग गत १६ असारको स्थायी कमिटी बैठकमा उठाएपछि नेकपाभित्र विवाद उत्पन्न भएको थियो । तर, आफैँले उठाएको एजेन्डाबाट प्रचण्ड पछि हटेर ओलीसँग ‘नयाँ सम्झौता गरेको’ आशंका नेपाल समूहको छ ।

‘हाेइन भने, उहाँ एकाएक आफैले उठाएको एजेन्डावाट कसरी एकाएक पछि हटनुभयो त ?,’ उनले अगाडि भने, ‘यसमा दुईवटा मात्रै कारण हुन सक्छन, एउटा ओलीजीसँग प्रचण्डले आत्मसमर्पण गर्नुभयो, अर्को उहाँले फेरि कुनै नयाँ सम्झौता गर्नुभयो वा उहाँ ओलीजीको आश्वासनमा पर्नुभयो ।’

उनका अनुसार आत्मसमर्पण वा नयाँ आश्वासन पाएपछि मात्र प्रचण्ड पूर्ववत् अडानबाट पछि हटेको नेपाल समूहको विश्लेषण छ ।

कार्यदलले ओलीलाई प्रधानमन्त्री र अध्यक्ष दुईमध्ये एक पदबाट राजीनामा दिनुपर्नेलगायतका प्रचण्ड–नेपाल समूहको पूर्ववत् सर्तमा सुझाव दिने हैसियत नराखे पनि पछिल्ला समयमा कार्यदलले बुझाएको सुझाव प्रतिवेदनको शैलीमा नै प्रचण्डले देखाएको व्यवहारले नेपाल समूह अचम्मित परेको छ ।

यद्धपि, वरिष्ठ नेता नेपालले पूर्ववत् अडान भने आगामी १८ भदौमा बस्ने सचिवालय बैठकमा पनि राख्नेछन् । ‘प्रचण्डजीको फेरिएको व्यवहार र पछिल्लो समयमा देखाइएको उहाँको मौनतालाई हामीले ‘पर्ख र हेर’ को नीतिमा राखेका छौँ, १८ असारको सचिवालय बैठकमा कसरी प्रस्तुत हुनुहुनेछ, त्योअनुसार हामी अघि बढ्नेछौँ,’ नेपालनिकट अर्का नेताले भने ।