सान्जेन जलविद्युत् : २०७७/७८ मा लाभांश दिन सक्छ

A+ A A-

चिलिमे जलविद्युत् कम्पनीको प्रवर्द्धकत्वमा निर्माण भइरहेको सान्जेन जलविद्युत् कम्पनीले साधारण सेयर जारी गर्न आह्वानपत्र प्रकाशन गरेको छ | रसुवाको सान्जेन खोलामा माथिल्लो सान्जेन र सान्जेन जलविद्युत आयोजना निर्माणको अन्तिम चरणमा छन् |

विषय	विवरण
जारी पुँजी	३ अर्ब ६५ करोड रुपैयाँ
जारी हुने कित्ता	५४ लाख ७५ हजार
कर्मचारीलाई आरक्षित	२ लाख १९ हजार
सामूहिक लगानी कोषलाई आरक्षित	२ लाख ७३ हजार
सर्वसाधारणमा जारी हुने वास्तविक कित्ता	४९ लाख ८२ हजार २ सय ५०
आयोजनाको कुल लागत	८ अर्ब ६५ करोड रुपैयाँ (निर्माण अवधिको ब्याजसहित)
प्रतिमेगावाट लागत	१५ करोड रुपैयाँ (निर्माण अवधिको ब्याजसहित)
जडित क्षमता (माथिल्लो सान्जेन)	१४.८ मेगावाट
वार्षिक उर्जा (माथिल्लो सान्जेन)	८ करोड २४ लाख युनिट
हिउँद (माथिल्लो सान्जेन)	१ करोड ५ लाख युनिट
वर्षा (माथिल्लो सान्जेन)	७ करोड १८ लाख युनिट
सान्जेन	४२.५ मेगावाट
वार्षिक उर्जा (सान्जेन)	२४ करोड १८ लाख युनिट
हिउँद (सान्जेन)	३ करोड ४२ लाख युनिट
वर्षा (सान्जेन)	२० करोड ७५ लाख युनिट
कुल क्षमता	५७.३ मेगावाट
व्यापारिक उत्पादन मिति	दुबै आयोजनाको २०७६ पुस १५ गते
प्रतिसेयर नेटवर्थ (आव २०७४/७५)	रु. ९६.३२
आवेदन खुल्ने मिति	२०७६ वैशाख ६ गते
आवेदन दिने अन्तिम मिति	छिटोमा वैशाख १० गते
न्यूनतम आवेदन गर्न सकिने कित्ता	१० कित्ता
रेटिङ	इक्राएनपी आईपीओ ग्रेड ४+

पुँजीको उपयोग

कम्पनीले जारी गरेको प्राथमिक निष्कासनबाट प्राप्त हुने रकम ५ लटमा विभाजन गरी निर्माण भइरहेको आयोजनामा खर्च हुनेछ |

प्रसारण लाइन

विवरणपत्रअनुसार आयोजनाबाट उत्पादन हुने विद्युत् शक्ति विद्युत गृहदेखि चिलिमे हबसम्म ५ किमि लामो १ सय ३२ केभी प्रसारण लाइन कम्पनी आफैँले निर्माण गर्नेछ | त्यहाँबाट नेपाल विद्युत प्राधिकरणले निर्माण गर्ने २ सय २० केभी प्रसारण लाइनमार्फत राष्ट्रिय विद्युत प्रसारण लाइनमा जोडिनेछ |

विद्युत खरिद बिक्री विशेष

उत्पादित विद्युत खरिद बिक्री सम्बन्धमा व्यापारिक उत्पादन सुरु हुनुपर्ने मितिको तुलनामा व्यापारिक उत्पादन सुरु हुने मिति २०७६ पुस १५ गतेभन्दा ढिलो हुन गएमा निम्नानुसार वार्षिक मूल्य वृद्धि प्राप्त हुनेछ

१. व्यापारिक उत्पादन सुरु हुनुपर्ने मितिपछि ६ महिनाभन्दा बढी १८ महिनासम्म ढिलो हुन गएमा जम्मा चारवटा मात्र मूल्य वृद्धि पाउनेछ |

२. व्यापारिक उत्पादन सुरु हुने मिति १८ महिनाभन्दा बढी ३० महिनासम्म ढिलो हुन गएमा जम्मा तीनवटा मात्र मूल्य वृद्धि पाउनेछ ।

३. व्यापारिक उत्पादन सुरु हुने मिति ३० महिनाभन्दा बढी ४२ महिनासम्म ढिलो हुन गएमा जम्मा दुईवटा मात्र मूल्य वृद्धि दिइनेछ ।

४. व्यापारिक उत्पादन सुरु हुने मिति ४२ महिनाभन्दा बढी ५४ महिनासम्म ढिलो हुन गएमा जम्मा १ वटा मात्र मूल्य वृद्धि दिइनेछ ।

५. व्यापारिक उत्पादन सुरु हुने मिति ४२ महिनाभन्दा बढी ढिलो हुन गएमा मूल्य वृद्धि दिइनेछैन ।

नाफा र नोक्सान

कम्पनीले व्यावसायिक उत्पादन सुरु गरिसकेको छैन | अझ पनि निर्माणाधीन अवस्थामा छ | विभिन्न पाँचवटा लटमा बाँडेर आयोजना निर्माण भइरहेको छ | विवरणपत्रअनुसार लेखापरीक्षण भएको आर्थिक वर्ष २०७४/७५ अनुसार कम्पनीको सञ्चित घाटा १० करोड रुपैयाँ छ | निर्माण अवधिमा सञ्चित घाटा देखिनु स्वाभाविक हो | प्रक्षेपणअनुसार आगामी पुसमा व्यापारिक उत्पादन भएमा आव २०७६/७७ मा आम्दानी गर्ने अनुमान गर्न सकिन्छ |

प्रक्षेपित नाफा र नोक्सान

चालू आव २०७५/७६ मा आयोजना निर्माणाधीन अवस्थामा रहने हुँदा ४ करोड रुपैयाँ सञ्चालन घाटा हुने प्रक्षेपण गरिएको छ | व्यापारिक उत्पादन हुने भनिएको आव २०७६/७७ मा ८० करोड रुपैयाँबराबरको बिक्री आम्दानी हुने प्रक्षेपण छ | सबै खर्च कटाएर आव २०७६/७७ मा २४ करोड रुपैयाँ खुद नाफा भएर सञ्चित घाटा पूर्ति गरी यस वर्ष कम्पनीको नेटवर्थ करिब १ सय ३ रुपैयाँ हुनेछ | आव २०७७/७८ मा १ अर्ब ७४ करोड रुपैयाँ बराबरको विद्युत बिक्री भएमा खुद नाफा ७६ करोड रुपैयाँ हुँदा नेटवर्थ १ सय १३ रुपैयाँ हुने प्रक्षेपण छ | त्यस्तै, आव २०७८/७९ मा १ अर्ब ७९ करोड रुपैयाँ र आव २०७९/८० मा १ अर्ब ८४ करोड रुपैयाँ बिक्री आम्दानी हुने अनुमान छ |

कम्पनीले आम्दानी र खुद नाफा हुने प्रक्षेपण गरे पनि लाभांश प्रस्ताव गरेको छैन | आव २०७६/७७ सम्म लाभांश दिन सक्ने अवस्था देखिन्न | आव २०७७/७८ का लागि गरिएको प्रक्षेपित खुद आम्दानीलाई आधार बनाउँदा यसै वर्षबाट १५ प्रतिशत लाभांश घोषणा गर्न सक्छ | यस वर्ष लाभांशको ढाेका खुलेमा त्यसपछिका वर्षमा कम्पनीकै प्रक्षेपणअनुसार लाभांशको दर बढ्न सक्ने देखिन्छ |

चिलिमेलाई योगदान

सान्जेनले के देला भन्ने भन्दा पनि यसको चिलिमेलाई के योगदान होला भन्ने चासो बढी देखिन्छ | यस विषयमा पनि संक्षिप्त चर्चा गर्न मनासिब देखिन्छ |

चिलिमेको सान्जेन जलविद्युत कम्पनीमा ३९.३६ प्रतिशत सेयर लगानी छ | कम्पनीले पहिलो वर्ष (आव २०७७/७८) मा १५ प्रतिशत लाभांश प्रस्ताव गरेमा चिलिमेले करिब २१ करोड रुपैयाँ प्राप्त गर्नेछ | यही साल चिलिमेले रसुवागढीबाट २२ करोड रुपैयाँ लाभांश प्राप्त गर्ने अनुमान गरिएको छ | यसरी यी दुई आयोजना (रसुवागढी र सान्जेन)बाट प्राप्त हुने ४३ करोड रुपैयाँ लाभांश आम्दानी रकम चिलिमेले आव २०७८/७९ मा आफ्ना सेयरधनीलाई बाँड्न सक्छ |

चिलिमेको आव २०७४/७५ को खुद नाफा करिब ९० करोड रुपैयाँलाई आधार मानी रसुवागढी र सान्जेनको लाभांशसमेत जोड्दा चिलिमेको खुद आम्दानी १ अर्ब ३३ करोड रुपैयाँ हुन आउँछ | चिलिमेको अहिलेको पुँजी ४ अर्ब ७६ करोड रुपैयाँलाई आधार मान्दा प्रतिसेयर आम्दानी करिब २८ रुपैयाँ कायम हुने अनुमान गर्न सकिन्छ | यस हिसाबले त्यतिबेलासम्म चिलिमेको पुँजी वृद्धि भएन भने २५ प्रतिशत लाभांश वितरण गर्न चिलिमे सक्षम हुने देखिन्छ | तर, चिलिमेले पुँजी बढाएमा भने प्रतिसेयर आम्दानी सोहीबमोजिम समायोजन हुँदै जानेछ |

तर, प्रसारण लाइनको निर्माण बेलैमा हुन नसकेमा भने रसुवागढी र सान्जेनको आम्दानी हुन नसक्दा चिलिमेले पाउने लाभांश पनि पर सर्दै जान्छ | काबेली करिडोर प्रसारण लाइन बेलैमा नबनेको उदाहरण हाम्रो सामु छँदै छ |

लगानी निर्णय

बजारमा हुने मूल्य उतारचढावको विषयमा कुनै आँकलन गर्न सकिन्न | बजारमा सूचीकरण हुँदा यसमा चिलिमे क्रेज देखिन सक्ने अनुमान गर्न सकिन्छ | तर, लाभांशको पाटोबाट हेर्दा चिलिमे जत्तिकै लाभांश वितरण गर्न भने यस कम्पनीले सक्नेछैन | यसको मुख्य कारण खरिद बिक्री दर हो | कम्पनीले प्रकाशन गरेको विवरणपत्रको आधारमा यो विश्लेषण गरिएको हो | यो विश्लेषणले लगानी गर्न वा नगर्न कुनै सल्लाह दिँदैन | सेयर लगानी जोखिम हुने हुँदा निर्णय आफैँले लिनुपर्छ | लाभांशबाहेक सेयरबजारमा हुन सक्ने मूल्य उतारचढावबाट पनि लाभ लिन सकिने हुँदा अर्को पाटो पनि रहन्छ |

प्रकाशित मिति: बिहीबार, वैशाख ५, २०७६ २१:३७