गायब भएका भनिएका शिशु केन्द्रका सामग्री अस्पतालमै भेटिए

A+ A A-

डडेल्धुरा अस्पतालबाट गायब भएका भनिएका एनआईसियू (नवजात शिशु विषेश स्याहार कक्ष) निर्माणको सामग्री अस्पताल भित्रै पाइएको छ ।

डडेल्धुरा अस्पतालाई सामाखुसी लायन्स क्लब काठमाडौंले उपलब्ध गराएको सामग्री अचानक हराएका भनिएको थियो । तर, एनआईसियूका १६ प्रकारका उपकरण अस्पतालमा जडान गरिएको अवस्थामा भेटिएका हुन् ।

डडेल्धुरामा रहेको अमरगढी लायन्स क्लबको माग र केन्द्रीय लायन्सको पहलमा सामाखुसी लायन्स क्लब काठमाडौंले एनआईसियू स्थापना गर्न डडेल्धुरा अस्पतालका लागि उपलब्ध गराएको ११ कार्टुन सामग्री गत ५ मंसिरमा अस्पलातको परिसरभित्र पुर्‍याएको अमरगढी लायन्स क्लब डडेल्धुराले दाबी गर्दै आएको थियो । तर, अस्पताल प्रशासन यो विषयमा जानकारी नै नभएको जवाफ दिँदै आएको थियो ।

उपकरण अहिले अस्पतालको एनआईसियू कक्षमा जडान गरेको पाइएको हो । उपकरण अस्पतालमै जडित भएको पाइएपछि लायन्स क्लब डडेल्धुराले हस्तान्तरण गरेको छ । औपचारिक कार्यक्रमका साथ क्लबले शनिबार उपकरण हस्तान्तरण गरेको हो ।

विदेशबाट आएका उपकरणको मूल्य २१ लाख छ । करिब १२ लाखका उपकरण विदेशबाट ढुवानी गर्दा ९ लाख खर्च भएको लायन्स क्लब डडेल्धुराका निवर्तमान अध्यक्ष अमर पुनले बताए । क्लबका वर्तमान अध्यक्ष प्रेम महरले अस्पताल विकास समिति अध्यक्ष करुणाकर ओझालाई उपकरण हस्तान्तर गरे ।

सबैलाई सरकारी जागिर मन परे पनि सरकारी सामग्रीको हेरचाह नगरिँदा समस्या हुने जिल्ला समन्वय समिति डडेल्धुराका प्रमुख गणेशराज भट्टले बताए ।

यो पनि पढ्नुहोस्

शिशु केन्द्रका सामग्री डडेल्धुरा अस्पतालबाटै गायब

सामग्री कसैले बुझेको वा कसैले बुझाएको भन्ने एकिन प्रमाण नहुँदा सामग्री कहाँ छ भनेर भन्न नसकेको र लायन्स क्लबले बुझाएको सामग्रीको विवरण हेर्दा ती सामग्री अस्पतालमै भेटिएको अस्पतालका निमित्त मेसु डा.जगदीश चन्द्र विष्टले बताए ।

गत पुसमा अस्पतालका मेसु परिवर्तन भएका थिए । स्टोरकिपर पनि परिवर्तन भएकाले लायन्स क्लबले उपलब्ध गराएका उपकरण हराएको जस्तो देखिएको अस्पतालका मेसु विष्टको भनाइ छ ।

८ शय्याकाे एनआईसियू सञ्चालनमा

उपकरण जडानपछि अहिले अस्पतालमा ८ शय्याको एनआईसियू सञ्चालनमा छ । अस्पतालमा जडान भएका एनआईसियूका उपकरणले अहिले २ श्या थप भएको छ । यसअघि अस्पतालमा ६ शय्याको
एनआईसियू सञ्चालनमा थियो ।

प्रकाशित मिति: आइतबार, भदौ १४, २०७७ १४:४४