डडेल्धुरा र कैलालीमा निषेधाज्ञा लम्ब्याइयो, डोटीमा १४ गतेदेखि निषेधाज्ञा

A+ A A-

डडेल्धुरामा जारी निषेधाज्ञा आगामी १९ भदौसम्म थपिएको छ । जिल्लास्तरीय कोभिड–१९ जोखिम व्यवस्थापन समिति (डीसीसीएमसी)को शुक्रबारको बैठकले उक्त निणय गरेको हो ।

शुक्रबार सूचना जारी गर्दै सुदूरपश्चिम प्रदेशमा कोरोना संक्रमणको दर बढ्दै गएपछि जिल्लामा जारी निषेधाज्ञा लम्ब्याइएको सहायक प्रमुख जिल्ला अधिकारी बाबुराम अर्यालले बताए । जिल्लामा संचालित अतिआश्यक सेवा तथा वस्तु बिक्री वितरण गर्ने पसलबाहेक सम्पूर्ण पसल शुक्रबारदेखि १९ भदौसम्मका लागि बिहान ६ बजेदेखि ११ बजेसम्म मात्रै संचालन गर्न पाउने छन्।

पलस संचालन गर्दा सरकारले तोकेको स्वास्थ्य सुरक्षा मापदण्ड अनिवार्य रूपमा प्रयोग गर्नुपर्ने उनले बताए । बैंक तथा वित्तीय संस्था बिहान ८ बजेदेखि १२ बजेसम्म मात्रै संचालनमा रहने छन् । जिल्लामा संचालित निजी तथा सार्वजनिक सवारी साधन तथा मोटरसाइकललाई शुक्रबारदेखि नै जोर–बिजोर प्रणाली लागू गरिएको जारी सूचनामा उल्लेख गरिएको छ ।

सुदूरपश्चिमका सात पहाडी जिल्लाको केन्द्रबिन्दुको रूपमा रहेको डडेल्धुरा जिल्ला भएर आउने जाने ढुवानी सवारी साधनलाई विनाकाम जिल्ला सदरमुकाममा पार्किङ गर्न नपाउने र सदरमुकाममा मालसमान लोडअनलोडसमेत बिहान ८ बजेभित्र गराई गन्तव्य स्थलतर्फ जानुपर्ने डीसीसीएमसीले निर्णय गरेको छ । निर्णयको उल्लंघन हुने क्रियाकलाप कसैबाट भए गरेमा संक्रामक रोग ऐन, २०२० तथा अन्य प्रचलित कानुनबमोजिम कारबाही गरिने प्रशासन कार्यालयले जनाएको छ ।

कैलालीमा निषेधाज्ञा १९ गतेसम्म जारी

जिल्ला सुरक्षा समितिको बैठकले कैलालीमा निषेधाज्ञा १९ भदौसम्म बढाउन सिफारिस गरेको छ । यसअघि प्रमुख जिल्ला अधिकारी यज्ञराज बोहराको आदेश अनुसार १४ गतेसम्म निषेधाज्ञा जारी भएकोमा सुरक्षा समितिको बैठकले १९ गतेसम्म लम्ब्याउन सिफारिस गरेको हो ।

उक्त सिफारिसको आधारमा प्रमुख जिल्ला अधिकारी बोहराले भोलि आदेश जारी गर्नेछन् । कोरोना भाइरसको संक्रमण रोकथामका लागि कैलालीमा निषेधाज्ञा जारी भएको थियो । लकडाउनमा आग्रह र अनुरोध मात्रै गर्न पाउने तर निषेधाज्ञामा आदेश नै दिन पाउने भएकाले जिल्लामा निषेधाज्ञा नै जारी गरिएको जिल्ला प्रशासन कार्यालय कैलालीले बताउँदै आएको छ ।

निषेधाज्ञाको अवधिमा अत्यावश्यक सेवा तथा वस्तुबाहेकका अन्य सबै प्रकारका उद्योग, व्यापार व्यवसाय सञ्चालन गर्न पाइँदैन् । औषधि, खाद्यवस्तु तथा अन्य अत्यावश्क उपभोग्य वस्तु तथा सेवा खरिदको काममा बाहेक कुनै पनि व्यक्ति घरबाट बाहिर निस्कन रोक लगाईएको छ भने अत्यावश्यक कार्यका लागि घरबाहिर जाँदा अनिवार्य रूपमा मास्क प्रयोग गर्ने र भौतिक दूरी कायम गर्नुपर्ने हुन्छ ।

अत्यावश्यक सामग्रीलगायत मालबाहक ढुवानीका सवारी साधन, भन्सारबाट जाँचपास भई आएका ढुवानीका साधन, स्वास्थ्यकर्मी तथा सुरक्षा निकायले प्रयोग गर्ने सवारी साधनबाहेक अन्य सवारी साधन जिल्लाभित्र प्रवेश गर्न निषेध गरिएको छ । अहिले कैलालीमा कुनै पनि मेला, पर्व, महोत्सव र जात्रा सञ्चालन गर्न पाइने छैन् भने भीडभाड र जुलुस गर्न पनि पाईदैन भने आन्तरिक नित्य पूजाबाहेकका सम्पूर्ण धार्मिक, सास्कृतिक गतिविधि सञ्चालन गर्न पनि रोक लगाइएको छ ।

शैक्षिक सस्था, प्रशिक्षण केन्द्रहरु, ट्युसन सेन्टर, भाषा कक्षा सञ्चालन गर्न नपाउने भएको छ भने सभा, सम्मेलन, गोष्ठी, तालिम, सेमिनार, सिनेमा हल, पार्टी, प्यालेस, डिपार्टमेन्ट स्टोर, मनोरञ्जन स्थल, सैलुन, ब्यूटीपार्लर, स्वीमीङ पुल, जिमखाना, पुस्तकालय, संग्रहालय, सञ्चालन गर्न रोक लगाइएको छ । खाद्यान्न, तरकारी, दूध, फलफूल, माछा, मासुलगायत अत्यावश्यक वस्तुको हकमा बिहान ५ बजेदेखि ९ बजेसम्म चार घण्टा मात्रै सञ्चालन गर्न पाइन्छ ।

डोटीमा १४ गतेदेखि निषेधाज्ञा हुने

डोटीमा १४ भदौ आइतबार राती १२ बजेदेखि २१ गतेसम्म लागू हुने गरी निषेधाज्ञा लागू गर्ने निर्णय भएको छ । जिल्लाभित्र कोरोना महामारीको प्रभाव बढ्दै गएपछि संक्रमण रोकथाम, नियन्त्रण र उपचारमा सहजताका लागि जिल्ला संकट व्यवस्थापन केन्द्रको शुक्रबार बसेको बैठकले यस्तो निर्णय गरेको हो ।

डोटीका प्रमुख जिल्ला अधिकारी भीमप्रसाद भट्टराईले भोली आदेश जारी हुने बताए । निषेधाज्ञाका क्रममा अत्यावश्यकीय सेवा बाहेक अन्य सेवाहरु पूर्ण रुपमा बन्द हुने जिल्ला उनले बताए ।

प्रकाशित मिति: शनिबार, भदौ १३, २०७७ ०२:०८