काेराेना कहर :स्टार्टअपहरूलाई अवसर

A+ A A-

कोरोना महामारी कसैलाई महाविपद् बन्याे भने कसैका लागि अवसर । नेपालका कतिपय स्टार्टअपहरूले काेराेना महामारीलाई अवसरका रूपमा सदुपयाेग गरेका छन् । झन्डै ४ महिनासम्म लकडाउन, त्यसपछिकाे निषेधाज्ञाका कारण नेपालमा मानिसहरू अनलाइनमार्फत काराेबार गरिरहेका छन् भने आवश्यक सामान पनि अनलाइनमार्फत् नै खरिद गर्न थालेका छन् ।

त्यसैले पनि स्टार्टअपहरूले अहिले राम्रो कमाइ गरिरहेका छन् । इ-विजनेसहरू सस्तो डिल, ग्यापु, फूडमाण्डु, डोकोजस्ता थुप्रै अनलाइन विजनेस कोरोना कहरका माझमा राम्रो आम्दानी गर्न सफल भएका हुन् ।

कोरोना कहर अझै कति समयसम्म जारी रहन्छ, यसै भन्न सकिने अवस्था छैन । यस्ताे बेला अनलाइन विजनेस सेवाबारे नवउद्यमीलाई सोध्ने हो भने उनीहरू दुःखमा भेटिएको खुसी भन्छन् । यसअघि अनलाइन विजनेस खासै चित्तबुझ्दाे थिएन ।

अनलाइन सपिङ कम्पनी ‘ग्यापु’का सञ्चालक ज्ञानेन्द्र खड्का लकडाउनले जुराएको आइडियाले व्यावसायिक यात्रा तय गरेको बताउँछन् । लकडाउनमै सुरुवात भएको ग्यापुले अहिले काठमाडौँ, ललितपुर, भक्तपुरलगायतका जिल्लाहरूमा ग्रोसरी, लत्ताकपडादेखि अत्यावश्यक सामानहरू होम डेलिभरीको काम गर्दै आएको छ ।

विचौलियाको रूपमा स्थापित यस कम्पनीले लकडाउन सुरु भएपश्चात इ–विजनेसबाटै दैनिक १० लाखको कारोबार गर्न सफल भएको छ ।

सुरक्षाका सबै उपाय अपनाउँदै ग्यापुले दैनिक १० लाख बराबरको समान अनलाइन डेलिभरी गर्ने गरेकाे छ । लकडाउनको समयभर बाइक र स्कुटरबाट डेलिभरी गर्दै आएको ग्यापुले पछिल्लो समय सडकमा प्रहरीको अवरोध भएपछि ४ पाङ्ग्रे सवारीमा डेलिभरी गर्दै आएको छ ।

ग्यापुले लत्ताकपडा, भान्साका सामान, ग्रोसरी, मेसिनरी सामान घरघरमै लगिदिन्छ ।

त्यस्तै भोजे डिलले पनि लकडाउनकाे समयलाई अवसरको रूपमा प्रयोग गरेकाे छ । छोटो समयमा नै भोज डिलले १२ लाखभन्दा बढीको व्यापार गरिसकेको छ भने दैनिक ४० देखि ५० वटासम्मको अर्डर लिँदै आएको छ ।

सामान्य दिनमा खासै अर्डर नआए पनि अहिले बिहान बेलुकाको लागि दालभात नै भए पनि अर्डर गर्ने बढेका भोजडिलमार्फत् डेलिभरी गर्ने एक कर्मचारीले बताए । उनी अहिले खानेकुरामा दैनिक छाक टार्नका लागि विद्यार्थीहरूले धेरै अर्डर गर्ने गरेको बताउँछन् ।

निषेधाज्ञाकाे समयमा घरबाट निस्कन सकस हुने र पसलमा सजिलै पाउन नसक्ने खानेकुरा पकाए। पुर्‍याइदिने भएपछि अधिकांशले खाना अर्डर गर्ने गरेका छन् । उनले भने, ‘भोजडिलले पनि अहिले दैनिक रूपमा पाकेका रेस्टुरेन्टका परिकारहरू सस्तो मूल्यमा घरमै पुर्‍याउँदै आएको छ ।’

न्यूनतम १ सय रूपैयाँदेखि डेलिभर गर्ने भोज डिलले १ हजार रूपैयाँभन्दा माथिको अर्डर गर्नेलाई निःशुल्क डेलिभर सेवा दिँदै आएको छ ।

यस्तै, इ–कमर्सकै रूपमा उदाएको सस्तोडिलले पनि लकडाउनमा भरपुर सेवा प्रदान गर्दै आएको छ । लकडाउनमै फस्टाएको सस्तोडिलले अहिले अन्तर्राष्ट्रिय कम्पनीसँग सहकार्यसमेत गरेकाे छ ।

कोरोना कहरलाई अवसरमा बदलेका सस्तो डिलका सञ्चालक अमुन थापा कोरोनाकै समयमा इ कमर्सप्रति ग्राहकको आर्कषण बढ्दा इकर्मसहरू फस्टाएको बताउँछन् । उनले भने, ‘यो समय भनेको प्रविधिमा फड्को मार्ने सही समय हो, चाहे विजनेसले होस् वा जीवनशैली । अहिले घरमै बसेर सबैकुरा किन्न सकिने भएकाले अनलाइन सपिङतर्फ धेरैकाे आकर्षण बढेको छ । यसै कारणले विश्वसनीयता पनि बढ्दै गएको छ ।’

अन्य समयभन्दा लकडाउनको समयमा ५० प्रतिशतले अर्डर बढेको उनकाे भनाइ छ । अन्तर्राष्ट्रिय इ कमर्स फ्लिपकार्डसँग हालै मात्र जोडिएको सस्तोडिलले पनि अहिले कारोबार बढाएकाे छ ।

यस्तै, फूडमाण्डुका सञ्चालक मनोहर अधिकारी पनि फूडमाण्डुको अर्डर सामान्य दिनको तुलनामा ६० प्रतिशतले बढेको बताउँछन् ।

प्रकाशित मिति: शुक्रबार, भदौ १२, २०७७ २२:०५