मेस्सीः मैदानमा हुँदा पनि भूकम्प, मैदान बाहिर पनि भूकम्प

A+ A A-

सन् २००७ मा फिफा वर्ष खेलाडी बनेका ब्राजिली काकाले भनेका थिए, ‘यो रात मेरा लागि साँच्चै विषेश छ । म सानो हुँदा मेरो एउटै सपना व्यवसायिक खेलाडि बन्ने र एक खेल भएपनि देशका लागि खेल्ने सपना थियो ।’

सन् २००७ को फिफा वर्ष खेलाडीको अवार्ड वितरण समारोह तपाईले हेर्नु भएको भए मेस्सी र रोनाल्डोको दोस्रो र तेस्रो स्थानको ट्रफी साटिएपछि मञ्चमै रोनाल्डोले मेस्सीसँग ट्रफी साटेको देख्नुभयो होला ।

यो दृश्य निकै रोमाञ्चक थियो । त्यसपछिका वर्षहरुमा यो ट्रफी मञ्चमा गएर त मेस्सी र रोनाल्डोले साटेनन्, तर लगातार १० वर्षसम्म पालैपालो कब्जा जमाए । २००८ मा क्रिष्टियानो रोनाल्डो फिफा वर्ष खेलाडी भए भने २००९ देखि २०१२ सम्म लगातार ४ पटक मेस्सी सर्वोत्कृष्ट ठहरिए ।

त्यसपछि २०१३, २०१४, २०१६, २०१७ मा क्रिष्टियानो रोनाल्डो तथा २०१५ र १९ मा पुनः लियोनल मेस्सीले ट्रफी जिते । २०१८ मा भने क्रोएसियालाई विश्वकपको फाइनलमा पु¥याएका लुका मड्रिच फिफा वर्ष खेलाडी भएका थिए ।

मेस्सी सर्वाधिक ५ पटक फिफा बर्ष खेलाडी घोषित भएका छन् । विश्व फुटबलमा केहीमात्रै त्यस्ता खेलाडी छन्, जसले आफ्नो जादुमयी खेलका माध्यमबाट सबैको ध्यान आफूतिर तान्न सफल भएका छन् ।

वर्तमानमा लियोनल मेस्सी र क्रिष्टियानो रोनाल्डो एक अर्काका प्रतिस्पर्धी मानिन्छन् । मेस्सी र रोनाल्डोमध्ये को महान् खेलाडी भनेर बेलाबेलामा बहस समेत उठ्ने गर्छ । तर दुवै आफ्नो ठाउँमा महान् र प्रतिभाशाली खेलाडी भएकोेमा दुईमत नै छैन ।

स्पोर्टिङ सीपीबाट करिअर सुरु गरेका रोनाल्डो म्यान्चेस्टर युनाइटेड, रियल मड्रिड हुँदै अहिले इटालियन क्लब युभेन्टसमा छन् । मेस्सीले सन् २००३–०४ मा बार्सिलोनाको सी टिमबाट करिअर सुरु गरेका हुन् ।

कीर्तिमानी अर्जेन्टिनी स्टारले सिनियर टिममा बार्सिलोनाका लागि ६३४ गोल गरेका छन् । उनी स्पेनिस ला लिगाको अहिलेसम्मकै सर्वाधिक गोलकर्ता पनि हुन् । उनले बार्सिलोनाका लागि ला लिगामा ४४४ गोल गरेका छन् ।

यतिबेला यी नै कीर्तिमानी लियोनल मेस्सीले क्लब छाड्न पत्र लेखेपछि बार्सिलोनामा भूकम्प गएको छ । उनले क्लब छाड्ने चाहानाका पछि केही असफलताले निम्त्याएको निराशा र क्लब व्यवस्थापनसँगको टकराबलाई कारक मानिएको छ ।

च्याम्पियन्स लिगको गत सिजनको क्वाटरफाइनलमा मेस्सीको कप्तानीमा रहेको बार्सिलोनाले ८–२ को लज्जास्पद हार भोग्यो भने ला लिगाको उपाधि रियल मड्रिडलाई सुम्पिन बाध्य भएको थियो ।

मेस्सीले अर्जेन्टिनाका लागि पनि मुख्य उपाधि जित्न नसक्दा आलोचना हुने गर्छ । उनी जति आलोचित छन्, त्यो भन्दा धेरै गुणा बढी प्रशंसकका मनमा छन् ।

त्यसैले मेस्सी त्यस्ता गोल मेसिन हुन्, जो बार्सिलोनामा रहँदा र नरहँदा दुवै अवस्थामा भूकम्प आउने गर्छ ।

मेस्सीको पत्रको सार

३३ वर्षे अर्जेन्टिनी स्टारले आफ्नो सम्पूर्ण व्यावसायिक खेल जीवन गुजारेको क्याटलान क्लबबाट अलग्गिन चाहेको जनाएका छन् । उनलाई क्लबबाट जान दिन मिल्ने प्रावधानको प्रयोग गरेर उनका वकिलहरूले बार्सिलोनालाई फ्याक्स पठाए पनि बार्सिलोनाले भने सो प्रावधान गत जुनमा नै अन्त्य भइसकेको जनाएको छ ।

कोरोना भाइरसको महामारीका कारण सिजन लम्बिएका कारण सो प्रावधान पनि कायम रहेको मेस्सीको तर्क छ । सन् २००४ देखि बार्सिलोनाको टिममा रहेका मेस्सीले देशका लागि कुनै उपाधि नजिते पनि क्लब फुटबलमा उनले हासिल गर्न बाँकी कुनै उपलब्धि सायदै होला ।

यद्यपि पछिल्लो समयमा उनको क्लबसँग नै टकराब परेको थियो । ४ पटक बार्सिलोनाका लागि च्याम्पियन्स लिगको उपाधि जित्दा प्रमुख खेलाडी मेस्सी यस वर्ष च्याम्पियन्स लिगको क्वार्टरफाइनलमा व्येहोरेको हारले स्तब्ध थिए ।

बार्सिलोनासँग उनको २०२१ सम्म सम्झौता रहेको छ । त्यसअघि कसैले किन्ने हो भने उनका लागि ७० करोड युरो तिर्नुपर्छ । तर मेस्सीलाई मनाउन बार्सिलोनाले हरसम्भव प्रयास गरिरहेको छ । मेस्सीलाई क्लबले मनाउन नसकेको अवस्थामा मेस्सीले कानुनी लडाइ लड्न सक्छन् ।

१० जुनसम्म मेस्सीले बार्सिलोना छाड्न चाहेको भए निःशुल्क क्लबबाट जान सक्ने प्रावधान थियो । मेस्सी १३ वर्षको उमेरमा अर्जेन्टिनाको निवेल्स ओल्ड ब्वाइजबाट बार्सिलोना पुगेका थिए । बार्सिलोनाका सर्वाधिक गोलकर्ता मेस्सीले क्लबका लागि १० पटक ला लिगा, ४ पटक च्याम्पियन्स लिगसहित ३४ वटा ठूला उपाधि जिताएका छन् ।

मैदानमा मेस्सीले ल्याउने भूकम्प

लियोनल मेस्सी त्यस्ता खेलाडी हुन्, जसले मैदानमा भूकम्प ल्याइदिन्छन् । हो, धेरैलाई पत्यार नलाग्न सक्छ, तर स्पेनका वैज्ञानिकहरूले अर्जेन्टिनी फुटबल स्टार लियोनल मेस्सीले बार्सिलोनाका लागि गोल हान्दा बार्सिलोना सहरमा ‘साँच्चै नै कम्पन हुने’ पत्ता लगाएका छन् ।

अनुसन्धानकर्ताहरूले क्याम्प नोउ नजिकै कम्पन मापन गर्ने सिस्मोमिटर जडान गरेका थिए । र, मेसीले गोल हानेपछि दर्शकले खुसियाली मनाउँदा त्यस क्षेत्रमा मानिसहरूले महसुस गर्न सक्ने कम्पन हुने गरेको पाइएको हो । गोल हानेको खुसियालीमा समर्थकहरू उफ्रिँदा र तल झर्दा कम्पन बढ्ने गरेको अनुसन्धानकर्ताहरूले उल्लेख गरेका छन् ।

अर्थ साइन्सेस् इन्स्टिच्युटका अनुसन्धानकर्ताहरूले बार्सिलोनामा हुने फुटबल खेलसँग जोडिएका मानवीय गतिविधि र सवारीसाधनबाट उत्पन्न हुने कम्पनबारे अध्ययन गरेका हुन् ।

विश्वकप महान खेलाडीको मापक हो ?

अर्जेन्टिनाका पूर्व स्ट्राइकर हर्नान क्रेस्पो मेस्सीलाई सर्वकालीन महान् खेलाडी मान्न उनले विश्वकप नै जित्नु आवश्यक नरहेको ठान्छन् ।

‘विश्वकप नजितेपनि धेरै खेलाडीहरू हाम्रो स्मृतिमा महान् भएर रहेका छन् । मेस्सी गज्जबका खेलाडी हुन् । उनले खेलेको हेर्न मलाई मन पर्छ र उनी राम्रा व्यक्ति हुन्,’ उनले भने, ‘कति महान् खेलाडीले यो जितेनन्, योहान क्रफ र मिशेल प्लाटिनिले जितेको मलाई थाहा छैन ।’

मैदानबाहिर पनि भूकम्प

मेस्सी वर्तमान विश्व फुटबलका महान् खेलाडी हुन् । त्यसैले उनका साना कुराले पनि मैदानभित्र र बाहिर हलचल ल्याइदिन्छ । विश्वमा उनी महान् हुन् या होइनन् भन्नेदेखि लिएर उनको प्रभावले समेत चर्चा ल्याइदिन्छ ।

कतिपयले उनी बार्सिलोनाका निर्णायक खेलाडीमात्रै नभएर व्यवस्थापनमा समेत निर्णायक व्यक्तिका रुपमा लिन्छन् । उनको समर्थनबिना बार्सिलोनामा कुनै प्रशिक्षक समेत टिक्न नसक्ने ठानिन्छ ।

बार्सिलोनाको टिम निर्माणमा पनि उनी निर्णायक मानिन्छन् । गत वर्ष उनले बार्सिलोनाबाट फ्रान्सेली क्लब पेरिस सेन्ट जर्मेन (पीएसजी) गएका ब्राजिलका स्ट्राइकर नेयमारलाई पुनः क्लबमा ल्याउनुपर्ने बताएका थिए । तर क्लबले नेयमारलाई फर्काउन नसकेकोमा उनी निराश बनेका थिए ।

यस वर्ष पनि मेस्सीलाई केन्द्रमा राखेर बार्सिलोनाका नयाँ प्रशिक्षक रोनाल्ड कोम्यानले टिम बनाउन खोजेका छन् । तर मेस्सीको मेस्सीको बार्सिलोना छाड्ने पत्रले प्रशिक्षक र व्यवस्थापनभित्र पनि भूकम्प ल्याइदिएको छ ।

प्रकाशित मिति: शुक्रबार, भदौ १२, २०७७ १९:१५