डडेल्धुरामा आकासियो तरकारीको मूल्य

A+ A A-

कोरोना महामारीका कारण स्थानीय प्रशासनले लगाएको आशिंक निषेधाज्ञाको फाइदा उठाउँदै यहाँका व्यवसायीले तरकारी र फलफूलको मूल्य एक्कासी बढाएका छन् ।

दिनहुँ मूल्य बढ्दा तरकारी छोइ नसक्नु छ । जसको मारमा उपभोक्ता परेका छन् । तर, व्यवसायी भने तरकारी र फलफूलको मूल्य बढ्नुको कारण लकडाउनले उत्पादनमा परेको प्रभावका साथै बर्खे तरकारीको उत्पादन सकिनु र भारतबाट तरकारीको आयात कम हुनु रहेको बताउँछन्।

सर्वसाधरणको भान्सामा दैनिक उपभोगमा आउने आलु, प्याज, टमाटर, काउलीलगायत तरकारीको मूल्य लकडाउन अवधिको तुलनामा दोब्बर भएको छ । अहिले डडेल्धुरामा हरेक किसिमका तरकारीको मूल्य प्रतिकिलो सय रुपैयाँभन्दा बढी छ । जुन अघिल्लो वर्षको तुलनामा सतप्रतिशत बढी हो।

अहिले डडेल्धुरामा पसलै पिच्छे तरकारीको मूल्य फरकफरक छ । टमाटर प्रतिकिलो १ सय २०, तिते करेला प्रतिकिलो १ सय ३०, लौका र फर्सी प्रतिकिलो ८०, घिरौँला प्रतिकिलो १ सय ४०, आलु र प्याज प्रतिकिलो ७० रुपैँया मूल्य पुगेको छ । स्थानीय बजारमा दिन प्रतिदिन तरकारीको मूल्य फरकफरक हुने गरेको छ ।

लकडाउनका कारण बिक्री हुन नसक्दा गत चैत/वैशाखमा कृषकले लगाएको तरकारी खेतबारीमै कुहिएको कारण सोही समस्या दोहोरिने डरले तरकारी नलगाउँदा बाहिरबाट ल्याउनु परेकोले तरकारीको मूल्य आकासिएको स्थानीय ब्यवसायी हिमाल पन्तले बताए । विगतका वर्षमा तरकारीको मूल्य प्रतिकिलो २०/२५ रुपैयाँ हुने गरेकोमा यो वर्ष दोब्बर/तेब्बर भएको उनको भनाइ छ ।

‘जिल्लामा उत्पादन छैन । बाहिरबाटै चर्को मूल्यमा खरिद गरेर ल्याउनु पर्छ । अन्य पहाडी जिल्लाबाट आएको तरकारी पनि तराईका जिल्लाबाट व्यापारी आएर बढी पैसा दिएर लैजान्छन्,’ उनले भने, ‘अहिले बर्खामा लगाएको तरकारीको उत्पादन सकिने बेला हो । लकडाउन सुरु भएपछि भारतबाट आयात हुने तरकारी पनि घटेको छ ।’

किसानबाट तरकारी खरिद गर्दा सस्तोमा खरिद गर्ने र खरिद गरेको भन्दा दोब्बर/तेब्बर मूल्यमा बिक्रि गर्ने गरेकाले तरकारीको मूल्य एकाएक बढेको अगुवा कृषक प्रकाश अवस्थीले बताए । तरकारीको मूल्य बढ्नुमा बिचौलियाको भूमिका रहेको उनले दाबी गरे । सम्बन्धित निकायले यसतर्फ ध्यान दिन जरुरी रहेको उनको भनाइ छ ।

तरकारी उत्पादनका लागि डडेल्धुरा जिल्ला सुदूरपश्चिम प्रदेशमै अग्रणी मानिन्छ । मौसमको कारणले तरकारी उत्पादनमा कमी आउँदा मूल्य बढेको कृषि ज्ञान केन्द्र डडेल्धुराका वरिष्ठ कृषि विकास अधिकृत दिलबहादुर विष्ट बताउँछन् ।

‘भारतबाट तरकारी आउँदा भरतीय र स्थानीय तरकारीको प्रतिस्पर्धा हुन्थ्यो,’ उनले भने, ‘आजभोलि भारतबाट तरकारी नआउँदा बजारमा स्थानीय तरकारी मात्र छ ।’ बजारको माग अनुसारको उत्पादन जिल्लामा नभएकोले मूल्य बढेको विष्टले बताए ।

प्रकाशित मिति: शुक्रबार, भदौ १२, २०७७ १३:३४