प्रदेश ३ मा पहिलोपटक शून्य समय

A+ A A-

प्रदेश ३ को प्रदेशसभा बैठकले शून्य समयको अभ्यास थालेको छ । पहिलो बैठक बसेको १ वर्ष ३ महिनाको अवधिमा पहिलोपटक शून्य समयको व्यवस्था गरिएको छ ।

बुधबार बसेको प्रदेशसभाको बैठकमा पहिलोपटक शून्य समयको व्यवस्था गर्दै सांसदहरूलाई एक मिनेट बोल्न दिइएको छ । सांसदहरूले प्रदेशको राजधानी छिट्टै टुंगो लगाउनुपर्ने बताएका हुन् ।

सांसद जीवन डंगोलले राजधानी अध्ययन विशेष समितिको प्रतिवेदन तयार भएको ७ महिना बितिसक्दा पनि यसबारे निर्णय गर्न नसकेको भन्दै आपत्ति जनाए । त्यस्तै, सांसद जगत सिम्खडा र इन्द्रमाया गुरुङले योजना सम्झौतामा ढिलाइ भइरहेको र यसले विकास प्रभावित भएको भन्दै सरकारको ध्यानाकर्षण गराए ।

सांसद कल्पना नेपालीले प्रदेश सरकारले दलित समुदायलाई अवमूल्यन गरेकामा गुनासो गरिन् । उनले प्रदेश सरकारको मन्त्रिमण्डलदेखि विषयगत समितिका सभापतिसम्मको नेतृत्वमा दलितलाई उपेक्षा गरेको भन्दै समावेशी अवधारणा अवलम्बन गर्न सुझाव पनि दिइन् ।

सांसदहरूले विद्यालय भर्ना अभियान, विकासदेखि बाँदरका समस्याबारे धारणा राखे । १ बजेका लागि बोलाइएको बैठक ४० मिनेट ढिलो सुरु भएको थियो ।

बालबालिकाको अधिकारसम्बन्धी विधेयक पारित

प्रदेश ३ को प्रदेशसभामा बैठकले बालबालिकाको अधिकारसम्बन्धी विधेयक पारित गरेको छ ।

सामाजिक विकासमन्त्री युवराज दुलालले प्रस्तुत गरेको शिक्षा, स्वास्थ्य तथा कृषि समितिको प्रतिवेदनसहित प्रदेश बालबालिकाको अधिकारसम्बन्धी विधेयक सर्वसम्मत पारित भएको छ ।

प्रदेश मामिला समितिका सभापति माधवप्रसाद पौडेलले पदाधिकारी तथा सदस्यको सेवा सुविधासम्बन्धी संशोधन विधेयकको प्रतिवेदन पेस गरे । त्यस्तै, शिक्षा, स्वास्थ्य तथा कृषि समिति सभापति घनश्याम दाहालले प्रदेश सहकारीसम्बन्धी विधेयकको प्रतिवेदन पेस गरे । प्रदेशसभाको बैठक बिहीबार १ बजे बस्ने तय भएको छ ।