पूर्वी क्षेत्रमा खुल्याे सुविधासम्पन्न ५ तारे होटल, यस्ता छन् विशेषता

A+ A A-

विश्‍वव्यापी रूपमा कोरोनाको महामारी छ । व्यवसाय चौपट भएका छन् । कति व्यवसायी भविष्यलाई केन्द्रित गरेर व्यवसाय विस्तार गरिरहेका छन् ।

कति व्यवसायीहरूले भएका होटल पनि कसरी सञ्चालन गर्ने भनेर तनाव लिइरहेका बेला दीर्घकालीन योजनासहित लकडाउनकै समयमा झापाको धुलाबारीमा ५ तारे होटल 'मेची क्राउन' तयार भएको छ ।

उक्त होटलले सञ्चालनका लागि सरकारको अनुमतिको खोजेको छ र सेवाका लागि पाहुनाको पर्खाइमा रहेको छ ।१६ विगाह क्षेत्रफलमा फैलिएको होटल मेची क्राउनले नेपालकै ठूलो क्यासिनो भएको होटलको विशेषता बोक्नेछ ।

उक्त होटलमा ५ वटा स्विट, १० वटा भिल्ला, २० वटा क्लब र ७० वटा डिलक्स गरी १ सय ५ वटा कोठा रहेका छन् । २ वटा रेस्टुरेन्ट, बार र सभाहलसमेत रहेको होटलको प्रथामिकतामा आन्तरिक पर्यटन मात्र नभई भारत र बङ्गलादेशका पर्यटक तान्ने योजना रहेको छ ।

१५ वटाभन्दा बढी ५ तारे होटल भएर पनि पूर्व क्षेत्रमा पहिलो ५ तारे होटलका रूपमा पहिचान दिन सकेको यो होटलको व्यवस्थापनको जिम्मा द पिक हस्पिटालिटीले लिएको छ । होटल सञ्चालक पवित्रकुमार कार्की भन्छन्, 'हामीले पूर्वबाट आशाको सन्देश दिन खोजेका छौँ । कोभिड- १९ का कारण विश्‍वको पर्यटन क्षेत्र नै धरासायी बन्दै गएको बेला हामीले ५ तारे होटलको आराम्भ गरेका छौँ ।'

आइतबार मात्र उद्घाटन गरिएको उक्त होटल झापाको धुलाबारीबाट पाथीभरा, सगमाथा र हिमाली क्षेत्रमा ट्रेकिङ गर्न सकिने कार्की बताउछन् । दूरीको हिसाबले भारत र बङ्गलादेश नजिक भएका कारण पनि घुमफिर गर्ने पर्यटकको हबका रूपमा पनि लिइन्छ यो क्षेत्र ।

काठमाडौं, पोखरा र चितवनमा ठूला तथा स्तरीय होटल खुलाउन व्यवसायीहरूको प्रतिस्पर्धा देखिए पनि त्यसबाहिरका क्षेत्रमा धेरै व्यवसायीको ध्यान पुग्न नसकेको अवस्थामा झापामा सुविधा सम्मपन्न होटल निर्माण गरिएको हो ।

राजस्व सङ्कलनका हिसाबले पनि महत्त्वपूर्ण क्षेत्र मानिएकामा स्थानीय पर्यटनको विकासका लागि ५ तारे होटल सञ्चालनमा ल्याइएको यसका सञ्चालक बलराम सापकोटाले बताउँछन् ।

‘काठमाडौं, पोखराबाहिर पनि थुप्रै पर्यटकीय महत्त्वका स्थलहरू रहेका छन्’, सापकोटाले भने, ‘त्यसको प्रचारप्रसार गर्नु जरुरी छ । स्तरीय होटल, आवासको प्रबन्ध नहुँदा यस क्षेत्रमा मनग्य पर्यटक पुग्न सकेका छैनन् । हामी अब पाहुनाहरूलाई न्यानो आतिथ्य र सुरक्षित आवास दिन्छौँ, राज्यका लागि राजस्व पनि बढ्नेछ ।’

मेची क्राउन होटल उच्चस्तरीय सुविधासहितका सबै पूर्वाधार तयार पारेको र सरकारले अनुमति दिनेवितिक्कै सेवा सुरु गरिने बताइएको छ । केही पूर्वधार विस्तारसहित गत वैशाखबाट नै होटल उद्घाटनको तयारी गरिए पनि कोरोनाकोाकारण उद्घाटन मिति पर सारिएको थियो ।

प्रकाशित मिति: बुधबार, भदौ १०, २०७७ १५:५७