निर्यातभन्दा आयात बढ्दा अर्थतन्त्र झन् कमजाेर, प्रत्यक्ष वैदेशिक लगानी घट्यो

निर्यातभन्दा आयात बढ्दा अर्थतन्त्र झन् कमजाेर, प्रत्यक्ष वैदेशिक लगानी घट्यो

A+ A A-

चालू आर्थिक वर्षको फागुन महिनासम्म शोधनान्तर घाटा ठूलो मात्रामा बढेको छ । मुलुकमा निर्यातभन्दा आयात बढी हुँदा शोधनान्तर स्थिति बिग्रिएको हो । शोधनान्तरले मुलुक भित्रने र बाहिरिने रकमबीचको अवस्था देखाउँछ । बाहिरिनेभन्दा भित्रने रकम बढी भएमा शोधनान्तर बचतमा हुन्छ । भित्रनेभन्दा बाहिरिने रकम बढी भएमा शोधनान्तर स्थिति घाटामा हुन्छ ।

नेपाल राष्ट्र बैंकले मंगलबार सार्वजनिक गरेको ‘देशको वर्तमान आर्थिक तथा वित्तीय स्थितिको समीक्षा’ प्रतिवेदनअनुसार फागुनसम्म शोधनान्तर स्थिति ५८ अर्ब ९९ करोड रुपैयाँले घाटामा छ । जब कि, माघ मसान्तसम्म शोधनान्तर ४९ अर्ब ३२ करोड रुपैयाँले घाटामा थियो ।

अघिल्लो वर्षको फागुनमा शोधनान्तर २४ अर्ब ७३ करोड रुपैयाँले मात्र घाटामा थियो । अमेरिकी डलरमा शोधनान्तर स्थिति अघिल्लो वर्षको आठ महिनामा २४ करोड १४ लाखले घाटामा रहेको थियो भने समीक्षा अवधिमा यस्तो घाटा ५१ करोड ८१ लाख पुगेको छ ।

चालू खाता घाटा विस्तार

सरकारको चालू खाता घाटा पनि विस्तार भएको छ । गत आर्थिक वर्षको ८ महिनामा १ अर्ब ५४ अर्ब ९९ करोड रुपैयाँ रहेको चालू खाता घाटा बढेर १ खर्ब ९१ अर्ब १३ करोड रुपैयाँ पुगेको हो । अमेरिकी डलरमा अघिल्लो वर्षको आठ महिनामा १ अर्ब ५१ करोड रहेको चालू खाता घाटा समीक्षा अवधिमा १ अर्ब ६८ करोड पुगेको छ ।

वस्तु व्यापार घाटा २४.५ प्रतिशतले विस्तार

समीक्षा अवधिमा कुल वस्तु व्यापार घाटा २४.५ प्रतिशतले विस्तार भई ८ खर्ब ८७ अर्ब ८८ करोड पुगेको केन्द्रीय बैंकको प्रतिवेदनमा उल्लेख छ । आठ महिने अवधिमा निर्यात–आयात अनुपात ६.५ प्रतिशत कायम भएको छ । अघिल्लो वर्षको सोही अवधिमा सो अनुपात ७.० प्रतिशत रहेको थियो ।

प्रत्यक्ष वैदेशिक लगानी घट्यो

नेपालमा प्रत्यक्ष बैदेशिक लगानी पनि घटेको प्रतिवेदनले देखाएको छ । गत वर्ष फागुनमा १४ अर्ब २४ करोड रहेको प्रत्यक्ष वैदेशिक लगानी यस वर्ष ६ अर्ब ६६ करोड रुपैयाँमा झरेको छ ।

रमिट्यान्स बढ्याे

केन्द्रीय बैंकका अनुसार अघिल्लो वर्षको तुलनामा यो वर्ष विप्रेषण आप्रवाह २३.४ प्रतिशतले बढेको छ र यो ५ खर्ब ८२ अर्ब १९ करोड रुपैयाँ पुगेको छ । अघिल्लो वर्षको सोही अवधिमा विप्रेषण आप्रवाह ४.९ प्रतिशतले बढेको थियो । अमेरिकी डलरमा विप्रेषण आप्रवाह ११.६ प्रतिशतले वृद्धि भएको छ । अघिल्लो वर्ष यस्तो आप्रवाह ९.५ प्रतिशतले बढेको थियो ।

https://www.nrb.org.np/ofg/current_macroeconomic/CMEs%20Eight%20Months%20Nepali%202075-76.pdf

प्रकाशित मिति: बुधबार, वैशाख ४, २०७६ १८:५१