वाणिज्य बैंकहरुको सीसीडी रेसियो ८१.०३ प्रतिशत पुग्यो, औसत आधार दर घट्यो

A+ A A-

चालू आर्थिक वर्षको आठ महिनामा वाणिज्य बैंकहरुको औसत आधार दर घटेको छ । नेपाल राष्ट्र बैंकले सार्वजनिक गरेको एक प्रतिवेदनले अघिल्लो आर्थिक वर्षको यही अवधिको तुलनामा बैंकहरुको औसत आधार दर घटेको देखाएको हो । २०७४ फागुन मसान्तसम्म वाणिज्य बैंकहरुको औसत आधार दर १०.३६ प्रतिशत थियो भने २०७५ फागुन मसान्तसम्म ९.६५ प्रतिशत कायम भएको केन्द्रीय बैंकले जनाएको छ ।

नेपाल राष्ट्र बैंकले सार्वजनिक गरेको ‘देशको वर्तमान आर्थिक तथा वित्तीय स्थितिको समीक्षा’ प्रतिवेदनले बैंकहरुको औसत आधार दर घटे पनि ऋणको ब्याजदर भने गत वर्षको तुलनामा बढेको देखाएको छ । २०७४ फागुन मसान्तसम्म वाणिज्य बैंकहरुको कर्जाको भारित औसत ब्याजदर ११.९६ प्रतिशत थियो भने २०७५ फागुन मसान्तसम्म यो बढेर १२.३३ प्रतिशत पुगेको छ ।

निक्षेपमा दिने औसत ब्याजदरमा वृद्धि

केन्द्रीय बैंकका अनुसार बैंकहरुले निक्षेपमा दिने औसत ब्याजदर बढेको छ । अघिल्लो वर्षको फागुनसम्ममा ६.४५ प्रतिशत रहेको निक्षेपको भारित औसत ब्याजदर यो वर्षको सोही अवधिमा ६.६२ प्रतिशत पुगेको छ । २०७४ फागुनमा ९१–दिने ट्रेजरी बिल्सको भारित औसत ब्याजदर ४.७० प्रतिशत थियो भने २०७५ फागुनसम्म यो बढेर ३.५५ प्रतिशत पुगेको छ ।

यसैगरी, वाणिज्य बैंकहरुबीचको अन्तर–बैंक कारोबारको भारित औसत ब्याजदरमा पनि बृद्धि देखिएको छ । २०७४ फागुनसम्मा ४.८७ प्रतिशत रहेको अन्तर–बैंक कारोबारको भारित औसत ब्याजदर २०७५ को सोही अवधिमा ५.१५ प्रतिशत कायम भएको छ ।

सीसीडी रेसियो बढ्यो

पुसभन्दा माघमा घटेको वाणिज्य बैंकहरुको ऋण–पुँजी–निक्षेप अनुपात (सिसिडी रेसियो) फागुनमा बढेको छ । केन्द्रीय बैंकका अनुसार पुससम्म ८१. १९ प्रतिशत रहेको र माघमा घटेर ८०.९५ प्रतिशतमा झरेको सिसिडी रेसियो फागुनमा ८१.०३ प्रतिशत पुगेको हो । बैंक तथा वित्तीय संस्थाले ऋण–पुँजी–निक्षेप अनुपात (सिसिडी रेसियो) ८० प्रतिशत नघाए सात प्रतिशत हर्जाना भराउने केन्द्रीय बैंककाे प्रावधान छ ।

प्रकाशित मिति: बुधबार, वैशाख ४, २०७६ १८:२५