मुख्यमन्त्रीसँग लिदीबासीको पीडा : हामीलाई पहिरोसँगै बग्नु छैन, यहाँ बस्न सक्दैनौँ

मुख्यमन्त्रीसँग लिदीबासीको पीडा : हामीलाई पहिरोसँगै बग्नु छैन, यहाँ बस्न सक्दैनौँ

A+ A A-

सिन्धुपाल्चोकको पहिरो प्रभावित क्षेत्र लिदीका बासिन्दाले यहाँ बस्नै नसक्ने भन्दै सुरक्षित ठाउँमा स्थानान्तरण गर्न माग गरेका छन् ।

बागमती प्रदेशको मुख्यमन्त्री डोरमणि पौडेलसँग लिदीबासीले शनिबार पीडा पोखेका हुन् । उनीहरूले लिदी क्षेत्रमा कुनै हालतमा बस्न नसक्ने बताएका छन् । ‘यहाँ कुल बेला पहिरो जान्छ थाहा छैन् । हामीलाई पहिरोसँगै बग्नु छैन् । सुरक्षित स्थानमा सार्दिनुस्’, लिदीका एक युवकले भने । स्थानीयले बसोबासको लागि लिदी क्षेत्र उपयुक्त नभएको बताएका छन् ।

जुगल गाउँपालिका–२ लिदीमा शुक्रबार बिहान पहिरो खसेको थियो । लिदी बस्तीभन्दा माथिबाट आएको पहिरोले ३६ घरमा पूर्ण क्षति पुर्‍याएको छ । आज शनिबार दिउँसोसम्म १६ जनाको शव फेला परिसकेको मुख्यमन्त्री पौडेलका प्रेस सल्लाहकार प्रकाश दाहालले जानकारी दिए । पहिरोमा परी बेपत्ता भएका २३ जना अझै फेला परेका छैनन् । लिदी क्षेत्रमा १ सय ७२ घरधुरी छ ।

शनिबार बिहान मुख्यमन्त्री पौडेल, संघीय सरकारका पूर्वमन्त्री शेरबहादुर तामाङ, उद्योग पर्यटन वन तथा वातावरणमन्त्री अरुण नेपाल, सामाजिक विकास मन्त्री युवराज दुलाल, प्रदेशका अर्थ तथा विकास समिति शरेस नेपाल, मध्यपृतनापति ताराध्वज पाण्डेलगायत पहिरो प्रभावित क्षेत्र लिदीमा राहत सामग्रीसहित पुगेका थिए ।

पहिरो पीडितलाई राहत सामग्री वितरण पश्चात मुख्यमन्त्री पौडेलले लिदीबासीसँग अन्तक्र्रिया गरेका हुन् । लिदीबासीले तत्काल यहाँबाट सुरक्षित स्थानमा स्थानान्तरण गर्न पौडेलसँग माग गरेका हुन् । ‘उहाँहरूले यहाँ बस्नै सक्दिन भन्नु भएको छ । छिटो सुरक्षित ठाउँमा पुर्‍याइदिन आग्रह गर्नु भएको छ । सोहीअनुसार मुख्यमन्त्री पौडेलले स्थानान्तरण गर्ने आश्वासन दिनु भएको छ’, प्रेस सल्लाहकार दाहालले भने ।

मुख्यमन्त्री पौडेलले तत्काल अस्थायी बास स्थान राहत तथा क्षतिपूर्ति उपलब्ध गराउने बताएका छन् । ‘सिन्धुपाल्चोकका धेरै बस्तीहरू बसोबासको लागि योग्य छैनन् । लिदीसम्म आइपुग्दा धेरै बस्तीहरू असुरक्षित देखेँ । यो सरकारको लागि चुनौतीको विषय छ । असुरक्षित बस्तीहरु स्थानान्तरण नगरी कुनै विकल्प नै छैन’, पौडेलले निरीक्षणको क्रममा भने ।

पौडेलले लिदीबासीलाई स्थानन्तरण गरेर मात्र समस्या समाधान नहुने भन्दै उनीहरूको जीविकोपार्जन र रोजगारीको व्यवस्थापन गर्नुपर्ने बताए । उचित व्यवस्थापन गर्ने सरकारको दायित्व भएको भन्दै तत्काल काम थाल्ने उनको भनाइ छ । पहिरोमा बेपत्ता भएकाहरू हालसम्म पनि फेला नपरेकोले उद्धार कार्यलाई थप प्रभावकारी बनाइएको पौडेलले बताएका छन् ।

मुख्यमन्त्री पौडेलले लिदी क्षेत्रमा खानेपानीका पाइप, अस्थायी शौचालयका सामग्री, दैनिक उपभोग्य खाद्य वस्तु हस्तान्तरण गरेका छन् । सिन्धुपाल्चोक बागमती प्रदेशको अति प्रभावित जिल्ला हो । यही बर्खामा सिन्धुपाल्चोकका करिब ४/५ स्थानमा बाढी र पहिरोले ठूलो क्षति पुर्‍याएको छ । सिन्धुपाल्चोकबासीलाई विपद्‍बाट बचाउन सदरमुकाम चौतारामा केही दिनभित्रै छलफल गरी कार्ययोजना बनाएर अघि बढ्ने प्रदेश सरकारको योजना छ ।

प्रकाशित मिति: आइतबार, साउन ३२, २०७७ ०२:३३