लिदी पहिरो : पीडितको बासस्थानका लागि वैकल्पिक व्यवस्था गरिने

A+ A A-

गृहमन्त्री रामबहादुर थापाले सिन्धुपाल्चोकको जुगल-२, लिदी गाउँ जोखिमयुक्त रहेको भन्दै बस्ती स्थानान्तरण गरी पीडितहरूका लागि बासस्थानको व्यवस्था गर्न पहलअघि बढाइने बताएका छन् ।

राहत सामग्रीसहित घटनास्थलमा पुगेका गृहमन्त्री थापाले सरकारले उद्धार कार्य सुरु गरिसकेको र नेपाली सेना र प्रहरीले उद्धारलाई पहिलो प्राथमिकता दिएर कार्य गरिरहेको उल्लेख गरे । यहाँका ३८ घरमा क्षति पुगेको जानकारी गराउँदै उनीहरूको वैकल्पिक बासस्थानको व्यवस्थापन कार्य सुरु गरिएको बताए ।

'वडाक्षेत्र नै जोखिम स्थानमा रहेको पहिलेदेखि थाहा थियो, अझ ठूलो क्षति हुन सक्थ्यो भन्ने हाम्रो आँकलन थियो । पूर्वसावधानी अपनाएका कारण क्षति केही कम भयो,' उनले भने, 'सरकारकाे तर्फबाट छिटोछिटो उद्धार सम्पन्न गरेर पुनर्निर्माणको कामलाई अगाडि बढाउँछौँ ।'

लिदीमा गएको पहिरोमा परी मृत्यु हुनेको संख्या ११ पुगेको छ । शुक्रबार बिहान जुगल गाउँपालिका-२, लिदीमा पहिरो जाँदा ३८ जना पुरिएका थिए । त्यसमध्ये ११ जनाको शव फेला परेको जुगल गाउँपालिका-२ का वडा अध्यक्ष प्रताप लामाले शिलापत्रलाई बताए । 'अहिले ११ जनाको शव निकालिएको छ,' उनले भने, 'बेपत्ता अन्य २७ जनाको खोजी गर्ने कार्य भइरहेको छ ।'

त्यस्तै, पहिरोमा परी घाइते भएका ५ जनाको उद्धार गरिएको छ । ४ जनाको चौतारामा र गम्भीर घाइते १ जनाको काठमाडौंमा उपचार भइरहेको उनको भनाइ छ । गम्भीर घाइते ४५ वर्षीया यामुलामु दोङलाई हेलिकोप्टरमार्फत काठमाडौंको सिभिल अस्पतालमा लगिएको छ ।

शुक्रबार बिहान आएको पहिरोले ३७ घरमा क्षति पुर्‍याएको उनले बताए । अहिले उद्धारका साथसाथै घरबारविहीन भएका स्थानीयका लागि वैकल्पिक बासको व्यवस्थापन भइरहेको उनको भनाइ छ । उनका अनुसार पहिरोका कारण १ सय ७२ घर उच्च जोखिममा परेका छन् ।

प्रकाशित मिति: शनिबार, साउन ३१, २०७७ ००:२४