४ अर्ब ४५ करोडभन्दा बढीको आईपीओ निष्कासनका लागि पाइपलाइनमा

A+ A A-

नेपाल धितोपत्र बोर्डले ४ अर्ब ४५ करोड रुपैयाँ बढीको साधारण शेयर (आईपीओ) निष्कासनका लागि पाइपलाइनमा रहेको बताएको छ ।

बोर्डले बीमा, लघुवित्त, जलविद्युत् र अन्य गरी हालसम्म ४ अर्ब ४५ करोड रुपैयाँभन्दा बढीको आईपीओ सार्वजनिक निष्कासनको लागि आवेदन परेको बताएको हो ।

बोर्डका सहायक कार्यकारी निर्देशक रुपेश केसीले बोर्डमा प्राप्त भएका आवेदनमा अध्ययन भइराखेकाले सम्भवतः चालू आर्थिक वर्षभित्रमै अधिकांश कम्पनीले आईपीओ सार्वजनिक निष्कासन गर्न पाउने बताए ।

यस्तै, अहिले पनि करिब १ अर्बबराबरको आईपीओ स्वीकृत भइसकेको उनले बताए । जसमध्ये रिलायन्स लाइफ इन्स्योरेन्सको ६३ करोड रुपैयाँबराबरको र समाज लघुवित्त वित्तीय संस्थाको ८६ लाख रुपैयाँबराबरको साधारण शेयर निष्कासन हुँदै छ ।

त्यस्तै, लिबर्टी इनर्जी कम्पनीको ३७ करोड ५० लाख रुपैयाँबराबरको साधारण शेयर निष्कासन हुँदै छ । जसमध्ये लिबर्टीले ३ भदौदेखि र रिलायन्स लाइफ इन्स्योरेन्स र समाज लघुवित्तले ४ भदौदेखि आईपीओ सार्वजनिक निष्कासन गर्ने मिति तय गरेका छन् ।

चालू आथिक वर्षमा जीवन बीमा, निर्जीवन बीमा र लघुवित्त कम्पनीहरूको सबैभन्दा बढी आवेदन पर्ने सम्भावना रहेको पनि केसीले बताए ।

अहिले पनि केही कम्पनीहरू आईपीओ निष्कासनको प्रक्रिया बुझ्न आइराखेकाले अझ बढी आवेदन पर्न सक्ने सम्भावना रहेको बताए ।

त्यसबाहेक केही जलविद्युत कम्पनीहरूले पनि आईपीओ निष्कासनका लागि बुझ्न आएको उनले बताए । हाल बोर्डमा १६ वटा कम्पनीले आईपीओ निष्कासनका लागि आवेदन दिएका छन् ।

जसमध्ये चारवटा कम्पनी प्रारम्भिक अध्ययनका क्रममा छन् भने ५ वटा कम्पनीको अध्ययन सँगै प्रतिवद्धताका लागि पठाएको र बाँकी सातवटा कम्पनीको अध्ययन भइरहेकाे बोर्डले जनाएको छ ।

प्रकाशित मिति: शनिबार, साउन ३१, २०७७ ००:१८