लुम्बिनी प्रादेशिक अस्पतालमा अर्को प्रयोगशाला सञ्चालनमा

A+ A A-

लुम्बिनी प्रादेशिक अस्पतालमा कोभिड–१९ परीक्षणको नयाँ सेवा सुरु भएको छ ।

नेपाल सरकार राष्ट्रिय क्षयरोग कार्यक्रम अन्तर्गत उपलब्ध जिन एक्सपट मेशिनलाई अपडेट गरी अस्पतालमा एक्सपर्ट एक्सप्रेस सार्स कोभ–२ परीक्षण सेवा सुरु गरिएको हो ।

सामाजिक विकासमन्त्री सुदर्शन बरालले शुक्रबार मेशिनबाट आफ्नै स्वाब परीक्षण गरी सेवा शुभारम्भ गरेका हुन् ।

सामान्य पीसीआर परीक्षणको समयावधि ढिला हुँदा उपचार समस्या भएको गुनासो आईरहेको बेला यो मेशिनबाट सहयोग मिल्ने उनले बताए । सेभ द चिल्ड्रेनका वरिष्ठ कार्यक्रम व्यवस्थापक निम बहादुर सिंहले यो विधि निक्कै प्रभावकारी र गुणस्तरी भएको दाबी गरे ।

कार्यक्रममा अस्पतालका मेडिकल सुपरिटेण्डेन्ट डा.राजेन्द्र खनालले मेशिनबाट कोभिड–१९ को शंकास्पद बिरामीको रिर्पोट पोजिटिभ भए ३० मिनेट र नेगेटिभ भए ४५ मिनेटमा नै उपलब्ध हुने हुँदा यो धेरै प्रभावकारी भएको बताए ।

अस्पतालका अस्पतालका अध्यक्ष सुर्यबहादुर भट्टराईले अस्पतालमा धेरै सेवाहरु वृद्धि गरिएको बताए । भौतिक संरचनादेखि सेवा बिस्तारमा आफूले जोड दिएको उनले दाबी गरे ।

कोभिड–१९ फोकल पर्सन डा.सुदर्शन थापाले कोरोना भाइरसका जटिल र लक्षण देखिने बिरामी बढेको दुःखेसो गरे ।

अस्पतालका बीआर टिभी क्लिनिङ इन्चार्ज सत्यराज शाक्यले क्षयरोगी र एचआईभी संकमितलाई पहिलो प्राथमिकता राखेर सेवा दिईने बताए । अन्य मेशिनको तुलनामा यसले छिटो रिपोर्ट दिने हुँदा प्रभावकारी भएको उनले बताए ।

यो निःशुल्क सेवा भएको उनले बताए । एक घण्टामा ४ जनाको परीक्षण गर्न सकिने उनले बताए ।

प्रकाशित मिति: शुक्रबार, साउन ३०, २०७७ २२:२१